بلوچ نیشنل موومنٹ ( بی این ایم ) نا ترجمان تینا اَسے بیان سیٹی پارے کہ بلوچ و پاکستان نا رشتہ اولیکو دے اَن پاش مسونءِ ، بلوچستان اَسے کالونی اَسے پاکستان نا قوضہ ٹی ، پنجاپی استعمار طاقت ورءِ و بلوچ اَسے محکومءُ قوم اَسے۔ راجی مُچیءِ طاقت ئٹ تورنِگ کِن پاکستان اسوار پدا ثابت کرینءِ کہ بلوچستان ئٹی انسانی حقوق کِن جُہد کننگ اَسے نہ منُوکو جُہد اَسے ولے ریاستی تشدد اَن بیدس بلوچ پرایمنءُ مزاحمتیءُ جُہد اَس برجا تخانءِ۔ اینو پورا دنیا خننگ ئٹیءِ کہ بے سلہ آ ، چُپ ءُ پرایمن آ بندغاتے امَر بے پاوان گولی خلِنگ ئٹیءِ۔ دا سوال خالی بلوچ آتیکِن اَف بلکِن کُل آتِکِنءِ کہ پاکستان ئٹی بلوچ قوم محفوظ و پرایمنُ زندگی اَس تدیفنگ ئٹی اَف؟
ھو پارے بلوچ یکجہتی کمیٹی انسانی حقوق نا اَسے عوامیءُ تحریک اَسے ارا بلوچستان ئٹی انسانی حقوق نا خلاف ورزی تا خلاف گوادر ئٹی ، راجی مچی نا پِن ئٹ قومی اجتماع نا کال تسوسس۔ دا تحریک نا مطالبہ غاک امو حقوق آتِیکنءِ ارا نا ضمانتءِ پاکستان نا آئین تِسونءِ۔ اگہ پاکستانی ریاست نا کُنڈ اَن طاقت نا استعمال مفَروس تو دا اجتماع پورا پرایمن ، پرُ سکون و مافوظ مَسکہءَ ولے پاکستانی پوج ہر شار ئٹ ، ہر موڑو شاہراہ تیٹی رکاوٹ شاغیسہ بندغاتے زور ئٹ تورِنگ و دِتر وہیفنگ ئٹ مخلوک نا مونءِ بس۔ بی وائی سی تون ھوار انسانی حقوق کِن کاریم کروکا کُل بندغاتے تنگ کننگا و بازنگا راہنماتے جبرئٹ بیگوا کننگاءَ۔ پاکستان نا مون پہ مون فائرنگ اَن درزن آتا کچ ئٹ بندغاک ٹپی مسُر و ایرا بندغ نا کہنگ نا احوال ھم پکاہ مسونءِ ارافتے پاکستان نا فورسزآک گوادر ئٹی گولی خلکور و کسیفینءُ۔
ترجمان پارے گوادر پورا چارمہ کُنڈ بند کننگانءِ ، گوادر نا زمین نا کَسرک بندءُ و موبائل سروس ھم بند کننگانءِ۔ ہونا حالیت اَن ہچ کسءِ مالوں داری رسینگ کننگ کپک۔ آخریکو معلوم داری دادے کہ کاریمی آ انسانی حقوق نا کارکن آتا گرفتاری کِن چھاپہ خلِنگ ئٹیءِ ، باز بندغ آتا شناختی کارڈ ، موبائل سم و بینک اکاؤنٹ آتے بند کرینءِ اَسے پرایمنءُ جلسہ سینا خلاف طاقت نا دا وڑئٹ استعمال کننگ پاکستان نا جمہوریت و سیاسی انگا جماعت آتون ھوار جمہوری ادارغاتہ مون ئٹی مہونو دبہ سے دا ہچُو وخت اَس ساف مننگ کپک۔ جبر کننگ اَن بیدس بندغاک جلسہ نا جاگہءِ یکجا مننگ نا کوشستءِ کریر ، ہزار آتا کچ ئٹ بندغاتہ یکجا مننگ قوضہ گیر نا خلاف بلوچ آتا حق ئٹی فیصلہ اَسے کہ بلوچ سرزمین نا زی آ قوضہ و جبرءِ بلوچ مخلوک منیپک۔
ھو پارے پاکستان نا وجود بلوچ قومی بقاء کِن اَسے بلُو خطرہ اَسے ارانا ختم مننگ اَن بلوچ قومءِ خلاسی ملِلیک۔ کُل بلوچ طاقت آتے یک مُشت داسہ فیصلہ ئس کروی تمیک۔ تینا کُل اختلاف و نظریاتی انگا تضاد آتَن بیدس اَسے قومیءُ سوچ سیتون مونی برویءِ ، ہچُو سیاسیءُ یا کہ نظریاتیءُ اختلاف ئس ہوفتے تورنگ کپ۔
امریکہ نا کمک کننگ نا زی آ اِیت کریسہ ترجمان پارے امریکی انتظامیہ نا گڑاس شخصیت آک تینا حکومت نا پارغ اَن پاکستان کِن مدت و کمک الِنگ نا کوشست کننگ ئٹیءُ داڑے ننے حیرانی ارفِک۔ دا انسانی قدر آتَن تینے مُر کننگ نا اِیت ئسے۔کہ پاکستان نا وڑو ملک سیٹی انسانیتءِ ہچُو قیمت ئس اَف امریکہ نا مخلوک نا خید آتن جمع کروکا ڈالر آتے دُون خرچ کننگ ئٹیءُ۔ نن باز وخت پارین اُون پاکستان امریکہ نا کمک اَن انسانیت نا خلاف کاریم کننگ ئٹیءِ دا حد اِسکان امریکہ نا جندئنا مفاد آتا خلاف استعمال کننگ ئٹیءِ۔
امریکہ نا حکومت و سینیٹر آتن نن خواست کینا کہ ھو پاکستان نا وڑنا انسانیت نا دشمن انگا ملک ئنا کمک کننگ اَن بلوچستان نا تحریکءِ آجوہی نا حمایتءِ کیر۔ بلوچ ، پشتون ، سندھی و ایلو محکوم انگا قوم آتا براہ راست کمک و مدت کننگ اَن دا خطہ نا حالیت بدل مریک اراڑن دنیا ٹی ھم امن بریک۔
ھو پارے بلوچستان ئٹی ہیومین رائٹس کمیشن آف پاکستان نا وڑنگا انسانی حقوق نا ادارغاتہ ذمہ دار آتے ھم انسانی حقوق نا حالیتءِ مونی اَتِنگ نا وجہ اَن قیدوبند و کسیفنگ نا دھمکی تننگ گیک دا امُو بد ترین انگا حالیتءِ ہرادے بہتر کننگ کِن اقوام متحدہ تون ھوار ایلو عالمی ادارغاتے داسہ زوتس ھوار تموہیءِ۔ نن دا سمجھنءَ کہ اقوام متحدہ بلوچستان نا حالیتءِ بہتر کننگ کِن جوانو کِرد ئس مونءِ اتِنگ کیک۔
