بلوچ نیشنل موومنٹ (بی این ایم) نا چیئرمین ڈاکٹر نسیم بلوچ سی (30) امریکن کانگریس نا مبرآتا پارغن پاکستانءِ نہ مننگ نا خواست کننگءِ خوشہی نا اِیت اَس پارینءِ۔
ھو پارے دا بلوچ نیشنل موومنٹ نا موقفءِ مننگ نا اِیت اَسے ہوُفک اِیرا دہائی موست پاکستان ئٹی پارلیمانی سیاستءِ اَسے بے حاصلءُ جُہد اَس پاریسہ غیر پارلیمانی سیاستءِ کچین کریسور۔ اینو پاکستانی سیاست نا پِنی اِنگا لیڈرآک پارلیمانی سیاست اَن کنارہ کشی نا اِیت کننگ ئٹیءُ انتیکہ پاکستان ئٹی جمہوریت اَسے ڈھونگ اَسے و محکوم انگا قوم آتا زی قوضہءِ جائز پاننگ نا حربہ اَسے۔
چیئرمین پارے امریکن کانگریس نا اراکین آک اینو دائنہ زی آ اِیت کننگ ئٹیءُ کہ امریکاءِ دنیا ٹی ہمو ملک آتا کمکءِ کرویءِ ہف ارا جمہوریت و بندغی حق آتا خلاف ورزیءِ کننگ ئٹیءُ۔ دا اَسے اُمیت سینا اِیت ئسے کہ اینو مسئلہءِ بلوچستان نا زی بحث مننگ ئٹیءِ۔ داڑے پاکستانی پوج بندغی حق آتا باز زیات خلاف ورزی کریسہءِ۔ بلوچستان ئٹی ڈیتھ اسکواڈ نا سرغنہ ، سرفراز بگٹیءِ وزیراعلی جوڑ کرینءُ امو ششمی بدمعاشءُ بلوچ آتا قاتلءِ۔
ھو پارے معزز امریکی رکن کانگریس کریگ کاسار راستی نا کُنڈا سوچ خلیسہءِ بد قسمتی ٹی امریکہ دنیا ٹی امو حکمران آتا کمکءِ کریسہءِ اموکہ جمہوریت و بندغی حق آتا ہچو پروا اَس کَتنءُ۔ پاکستانی ڈکٹیٹر پرویز مشرفءِ ہم امریکہ کمک کننگ ئٹی اَس امو بلوچستان ئٹی بلوچ نسل کشیءِ زیات کننگ ئٹی اَس بی این ایم نا وڑو پر ایمنءُ سیاسی جماعت ہکِن سیاست نا دروازغ آتے بند کریسوس۔
بی این ایم نا چیئرمین پارے جبرئٹ بیگواہی انسانیت نا خلاف جرم اَسے ، دونکہ پاکستان نا پوج ہر دے بلوچ آتے جبرئٹ بیگوا کننگ ئٹیءِ۔ امریکن اراکین کانگریس ، صدر جوبائیڈن و وزیر خارجہ انٹونی بلنکن پاکستانءِ دا بابت ئٹ سوج کِیر تنکہ داڑے بلوچ نا نسل کشی تورنگے و بند کننگءِ ۔
