پہ راجی آجوئی ءَ بلوچ ءُ سندیانی میان ءَ سیاسی ھم آھنگی ءُ ھم کاری المی اِنت، ڈاکٹر نسیم

بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ جھانی سندھی پتر ءِ 23می سندھ میان راجی کانفرنس ءَ گپ جنان ءَ گْوشتگ پہ بلوچ ءُ سندیاں راجی آجوئی ، راجمستری ، ایمنی ءُ پاداریں باندات ءِ گرگ گوں یک دومی ءَ جھلانکی ءَ ھمگرنچ اِنت ، پرچا کہ چہ راجی آجوئی ءَ ابید راجمستری ، ایمنی ءُ پاداریں باندات ایوک ءَ بْراھداریں دانک ءُ پہ دلبڈی ءَ واب اَنت۔

آئی ءَ گْوشت آ بلوچ راجی زْرمبشت ( بی این ایم ) ءِ سرکماش ءِ بستار ءَ گپ ءَ اِنت ، بلے سندیانی میان ءَ آئی ءَ چوش سما نہ بیت کہ آ درامدانی تہ ءَ اِنت۔سند ءُ بلوچستان ناں ایوک ءَ ھمساھگیں سرڈگار اَنت بلکیں سدانی سال اِنت کہ مردمی ، ربیدگی ، گزرانکی ءُ سیاسی سیادیاں بندوک اَنت۔ ایشانی سیمسر ، دودمانی یات ، گْوست ءِ دربرت ءُ انیگیں جیڑہ گوں یک دومی ءَ بندوک اَنت۔

آئی ءَ گْوشت اگاں راجی آجوئی تچکیں سیاسی جھد ، گوں داشت ءَ کار ءُ دیمونیاں ابید بہ رس اتیں گڑا جھان ءِ گْوستانک ءَ لکاں مردماں وتی جان دیمون نہ کرت۔ راجی آجوئی ایوک ءَ اوگامے نہ اِنت بلکیں شول کشیں سیاسی جھد ، تچکیں لوٹ ءُ بے کچیں دیمونیانی نام اِنت۔ بلوچ ءُ سندیانی وتی سرڈگار ءِ سر ءَ برجاھیں زوراکی ءُ زورگری ءِ دْرچ ناں ایوک ءَ راجی پجار بلکیں پہ آیانی باندات ءَ ھم ترسے ، پرچا کہ اے سرڈگار ءِ جست ایوک ءَ زمین ءِ نہ اِنت بلکیں راجی ھستی ، پجار ءُ آیوکیں پدریچ ءِ مانشت ءِ جست اِنت۔

ڈاکٹر نسیم بلوچ ءَ گْوشت بلوچ ءُ سندی راھشون وتی وتی راجی پجار ، سیاسی گل ءُ جتائیں من ءُ واھگاں منگہ دیان مردمی اگبال ، زور بیگواھی ، سیاسی زندانی ، مڈی ، اگواز ( ماحولیات ) ءُ میان راجی پترانی سر ءَ سانمندیں جھگیری رنگیں پھناتاں پجیگ ءَ کار بہ کن اَنت۔ ھم کاری ءِ بنیاد پرباھندیں اوگامانی جاہ ءَ وت ماں وتی منگہ دئی ءُ برابری بہ بیت۔راستیں ھم سنتی ھمیش اِنت کہ دوئیں راج وتی پجار ءُ من ءُ واھگاں برجاہ داران وتی یک وڑیں جیڑھانی گیشینگ ءَ یک دومی ءِ ھم کوپگی ءَ بہ اوشت اَنت ءُ ھم دردی ءَ گامگیجی یکجھتی جوڑ بہ کن اَنت ۔

ڈاکٹر نسیم ءَ گْوشتگ گْوستانک ءَ بلوچ ءُ سندی راج بے کچیں ٹپ داتگ ، بلے گْوستانک راہ ءُ در ھم بوج ایت ءُ مروچی دوئیں راجانی دیم ءَ وتی راجی مھترھند ءُ سیاسی تْرامانی چہ بن ءُ بندات ءَ ساچگ ءِ رد ءَ پر ارزشتیں پاس ءُ زمانے ھست۔ بئے ھمیش اِنت کہ چہ یک دومی ءِ دربرتاں سیت چست کنگ ءُ وتی شنگ ءُ شانگیں بودشت ءُ وس ءُ واک تْرام اتگیں سیاسی ءُ سفارتی توانے ٹاھینگ بہ بیت۔

آئی ءَ بلوچ ءُ سندی راجانی میان ءَ یکجھتی ءِ بارہ ءَ گپ جتگ کہ شما ھرچ جاہ ءَ توار پر بہ کن اِت ، سیاسی تلو ءَ بہ گراں داں گْران تریں سنگراں ، بلوچ ءَ وتی ھم کوپگی ءَ گند اِت۔