بلوچ راجی زْرمبشت ( بی این ایم ) ءِ سرکماش ءَ جرمنی ءَ نیادے ءَ تْران کنان ءَ گْوشتگ کہ بلوچ آزادی ءِ لوٹ ایوک ءَ راجی جستے نہ اِنت بلکیں پہ شاھگانیں دمگ ءَ تبریتی جستے ، ءُ آئی ءَ پہ روکپتی واکانی دلگوش ءَ درائینتگ کہ پاکستان ءِ بارہ ءَ وتی شونداتاں سر ءَ چار ءُ بہ چار بہ کن اَنت۔
ڈاکٹر نسیم ءَ ماں ھینوور ءَ بی این ایم ءِ چیردستی ءَ برجم دارگ بیتگیں بلوچ شھمیرانی روچ ءِ نیاد ءَ تْران کنان ءَ گْوشتگ کہ بلوچانی وتی دمگ ، سیاسی واک ءُ الباریں باندات ءِ شور کنگ ءِ اگبال چہ پدریچاں ڈالچار کنگ بیگ ءَ اِنت۔ آئی ءَ اے جست گْوستانکی وڑے ءَ 19 می سدھک ءِ زورشاھی ءِ تالانی ، 20 می سدھک ءَ نوک آبادیانک ءِ آسر بیگ ءُ گوں بی این ایم ءِ سیاسی مراگش ءِ تہ ءِ آجوئی ءِ مروچیگیں لوٹ ءَ پیوست کرت۔
آئی ءَ بلوچستان ءَ پراہ ، چہ مڈیاں چکار ءُ زباری ایشیا ، میانی ایشیا ءُ میان رودرتک ءَ ھم دپ تبریتی ارزشت داریں دمگے گْوشتگ ، کہ آئی ءِ تہ ءَ دینی رواداری ءُ رنگ پہ رنگیں ربیدگ ءِ دودے ھست۔ بلے پد ءَ ھم بلوچ ءِ سیاسی ءُ راجی اگبال ، وت واکی ءِ اگبال ءَ ماں جھانی واکدارانی دمگی شونداتاں ڈالچار کنگ بیتگ اَنت۔
ڈاکٹر نسیم بلوچ ءَ گْوشتگ کہ سرد جنگ ءِ میان ءَ پاکستان ءَ روکپتی پلہ مرزی ءُ پد ءَ ماں افغانستان ءَ سوویت دزمانجنی ءَ رند دینی جنگی گلانی ھمراھی ءِ پد ءَ بیتگیں نتیجہ افغانستان ءِ ھدانی چہ باز دیمتر شتگ اَنت۔ آئی ءِ گْوشت اَت کہ بلوچ راجی جست ءَ ھبر ءَ گیر کنگ آسر روکپتی شونداتانی بنکی سیاسی ءُ تبریتی بے سوبی بیتگ ، ءُ ایشی ءَ یکشل ءَ ڈالچار کنگ روکپتی سیتانی چپ بیتگ۔
آئی ءَ بی این ایم ءِ ھمے دیدانک دیم ءَ آرت کہ آزات ، سیکولر ، راجمستر ءُ وتواکیں بلوچستان زرباری ایشیا ، میانی ایشیا ، میان رودرتک ءُ چہ آئی ءَ دیم تر دمگی ھم کاری ، گزرانکی راھوت ءُ سیاسی آمید ءَ وتی کردے گون کرت کنت۔ آئی ءِ گْوشگ اَت کہ اے دید ایوک ءَ ڈگار ءُ مڈیانی سر ءَ نہ اِنت بلکیں مردمی اگبالانی منگہ ءُ بلوچ گْوست ءِ دودانی سر ءَ برجاھیں راجمستری ءُ سیکولر تْرامے ءِ واھگ ءُ مسام ءِ بنپدان اِنت۔
آئی ءَ چہ روکپتی واکاں دزبندی کرت کہ آ بلوچستان ءِ جیڑہ ءَ پاکستان ءِ تھی جیڑہ سرپد مہ بیت ءُ بلوچ راجی زْرمبشت ( بی این ایم )ءَ سنگینیں سیاسی واکے ءِ بستار ءَ بہ من ایت۔
وتی گل ءِ گْوستانک ءِ سر ءَ گپ جنان ڈاکٹر نسیم بلوچ ءَ گْوشتگ کہ بی این ایم ءِ راہ ءُ پند بھ آسان نہ بیتگ۔ آئی ءَ پیسرگیں سرکماش غلام محمد ءُ بنجاھی پتر ءِ باسک ڈاکٹر عبدالرشید ءِ پجیگ ءَ سروک ءُ جھدکارانی زیان ، دزگیری ، زور بیگواھی ، درانڈیھی ءُ سیاسی لگتمالی ءِ گپ جت۔ آئی ءِ گْوشگ اَت کہ کسے سیاسی گلے ءِ گْوست ءَ ھما باسکانی ھما کار ھم گون بہ اَنت کہ ناگیگیں جاوراں ءَ گل ءِ راھوتاں برجاہ دار اَنت ، ءُ راجمستری ءِ مگیم ءُ پزوری سروکانی مٹ بیگ ، باسکانی لوٹ ءُ گچین ءِ منگہ ءُ گْوست ءِ شونداتانی چارگ ءَ زانگ بیت۔ آئی ءِ گْوشگ ءِ رد ءَ دگردیدی ءِ گل ءِ راجمستری ڈولاں گیشگ گھتری راہ ءُ درے زانگ بہ بیت۔
آئی ءَ گڈی ءَ گل ءِ تْرامگیجانی مگیم کنگ ، وتی ڈبواں گوں سنگینی ءُ دلجمی پیلو کنگ ءُ الباریں شورانی منگہ دیگ ءِ سر ءَ زور دات کہ باسک اے نیمگ ءَ سکا سک دلگوش بہ کن اَنت۔
