بلوچ راجی زْرمبشت ( بی این ایم ) ءِ برتانیا تک ءِ پنچمی تکی پتر ماں لندن ءَ بیتگ ، اے نیاد پہ زور بیگواھیں مردماں شول کشیں جھد کنوک ماما قدیر ءِ نام ءَ کنگ بیتگ۔گچینکاریانی آسر ءَ نسیم عباس کماش ، کمبر بخشی کمک کماش ، سلیم الاھی کارگشاد ، کفایت کمک کارگشاد ءُ اعجاز باران کلیتدار گچین بیتگ اَنت۔
نوک گچین بیتگیں کماش نسیم عباس ءَ وتی تْران ءَ گْوشتگ نوکیں اگدہ داری پتر درسیں باسکاں ھمراہ کنت ءُ گوں ھم دستی ءَ تک ءِ مگیمی ءُ پہ گل ءِ سیاسی مولاں کار کنت۔آئی ءَ میان راجی تک ءَ گل ءِ دری شوندات ءُ سفاری کارانی دیم ءَ برگ ءَ گوں گل ءِ دری کارانی بھرگ ءَ راھوت داری ءُ ھم آھنگی ھژدری لیک اتگ۔
پتر ءَ بی این ایم ءِ سرکماش ڈاکٹر نسیم ، کستریں کمک سرکارگشاد حسن دوست ، دری کارانی کارگشاد فھیم ، بی این ایم ءِ دری کارانی راھوتکار نیاز ، برتانیا تک ءِ ساریگیں کماش منظور ءُ تک ءِ باسکاں بھر زرت۔ تک ءِ ساریگیں کارگشاد کمبر بخشی ءَ تک ءِ کارکرد ءُ کلیتدار یونس ءَ مالی گزارش پیش کرت۔ باسکاں گزارشانی سر ءَ چمشانک دات ءُ گل ءِ کارانی سر ءَ وتی دید ءُ پیشنھاد درشانت اَنت۔
گچینکاریانی آسری ءِ جار ءَ پد بی این ایم ءِ سرکماش ڈاکٹر نسیم ءَ نوک گچین بیتگیں اگدہ دار سوگند دات اَنت۔ آئی ءَ گل ءِ آئین ءُ راھبندانی سر ءَ کار کنگ ءِ نیمگ ءَ دلگوش پرینت ءُ نیاد ءِ تہ ءَ باسکانی اوپار ، ھمراہ داری ، تْرام ءُ ھاٹیگ ساڑات۔
بی این ایم یوکے تک ءِ پنچمی پتر ءِ نوک گچین بیتگیں اگدہ داری پتر ءِ جوڑ بیگ ءُ سوگند واری ءِ پجیگ ءَ نیاد آسر بوت ، گْور ایشی ءَ تک ءِ نوکیں گلی باریگے بندات بوت ۔
