بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ گزارشے شنگ کرتگ ، کہ آئی ءِ تہ ءَ ڈاکٹر عبدالرشید پنام نوکاپ ءِ نشانگیں کوش ءِ سر ءَ سکا بے تاھیری درشان کنگ بیتگ۔ ڈاکٹر نوکاپ ڈاکٹر ، استاد ، سیاسی کارکن ءُ بی این ایم ءِ بنجاھی پتر ءِ باسک اَت۔ آئی ءِ کھول ءُ چہ پانک ءِ نیمگ ءَ راست کنگ بیتگیں گپانی رد ءَ ، ڈاکٹر نوکاپ 11 ستمبر 2026 ءِ بام ءَ روکپتی بلوچستان ءِ ھند شمسر ( حق آباد ) ءَ وتی گس ءَ کشگ بیتگ۔ چم دیستگیں گواھے ءَ پانک ءَ گْوشتگ کہ دو سلاھبندیں مردماں وت ءَ نادْراہ پیش داشتگ ، آئی ءِ مھمانجاہ ءَ شتگ اَنت ءُ پد ءَ آ تیر جتگ ءُ کشتگ اش۔ گزارش ءِ رد ءَ ، ارش کنوک پاکستانی لشکر ءِ چیردستی ءَ کار کنوکیں مردم کشیں رمبے ءَ گون اَنت۔
ڈاکٹر نوکاپ 1982 ءَ آواران ھنکین ءِ ھند کولواہ ءِ گنڈاچائی ءَ ودی بیتگ ءُ وتی زند ءِ مزنیں بھرے پہ وانگ ءُ مردماں کمک ءَ داتگ۔ پانک ءِ رد ءَ آئی ءَ بازیں سال نزیکیں میتگ کنیچی ءَ پہ دلجمی ءَ چک وانینتگ کہ آ اود ءِ وانگجاھاں استادانی کمی اَت۔ ءُ پد ءَ وتی ھلک ءُ کلگانی مردم ئِے بے زر ءَ دارگ ءُ درمان ئِے کرت اَنت۔ آ 2010 ءَ چہ کولواہ ءِ دمگ ءِ بنداتی باسکاں یکے اَت کہ بی این ایم ءَ ھوار بوت ، گیشکور ھنکین ءِ کمک سرکماش ءُ پد ءَ سرکماش بیتگ ، رند ءَ گنڈاچائی ھنکین ءِ سرکماش ءُ 2022 ءَ بی این ایم ءِ بنجاھی پتر ءِ باسک گچین بوت ءُ داں وتی شھمیری ءَ ھمے ڈبو ئِے سر ءَ اَت۔
گزارش ءَ گْوست ءَ ڈاکٹر نوکاپ ءِ بگیری ءَ بیرگریں کارروائیانی سر ءَ ھم گْوشگ بیتگ۔ آئی ءِ کھول ءِ رد ءَ 2016 ءَ لشکرکشی ءِ میان ءَ پاکستانی لشکر ءَ آئی ءِ لوگ ڈرینتگ ءُ مڈی پل اتگ اَنت ، آئی ءِ جند ءِ کوش ءِ ھم کوشست کنگ بیتگ۔ یکشلیں بیھارانی پد ءَ پہ ناچاری آئی ءَ 2018 ءَ وتی لوگ یلہ دات ، لڈ اِت ءُ روکپتی بلوچستان ءَ شت۔ پہ زور درانڈیھ بیگ ءَ پد ھم ، آ دیر ءُ پندمنتگیں دمگاں وانڈوئیں بلوچ ءُ بومی ئیں مردماں بے زر ءَ درمان کنگ ءُ وانینگ ءَ اَت ، چہ ایشی ءَ نزوریں کھولاں ھما بنکی آسراتی رس اتگ اَنت کہ چہ آیانی دزرس ءَ ڈن اَت اَنت۔
پانک ءَ گْوشتگ کہ اے کوش چہ پاکستان ءِ سیمسراں ڈن بیتگ کہ بلوچ سیاسی کارکن ءُ وانڈوئیں مردمانی چہ سیمسر ءَ ڈن نشانگ کنگ ءِ بارہ ءَ مزنیں بے تاھیری ودی کنت۔ پانک ءَ زمہ وارانی پجار ءُ ھم گْرنچی ، پرمان دیوکیں مردمانی لڑ ، ارش ءِ شور ءُ آئی ءِ سر ءَ کار کنوک ، ءُ گوں پاکستانی مھترھند ، لشکر یا گوں چیریں واکاں ھرچ وڑیں ھم گْرنچی ءِ سر ءَ آزادیں رنگے ءَ پٹ ءُ پول ءِ لوٹ کرتگ۔ پانک ءَ زور داتگ کہ درانڈیھیں مردماں وانگ ءُ جاندْراھی ءِ آسراتی دیوکیں ڈاکٹر ءُ استاد پھریزگ بہ بہ اَنت ۔ جاندْراھی ءُ وانگ ءِ کارانی سر ءَ ھچ کس زوراکی یا آزار ءِ نشانگ مہ بیت۔