بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ زور گریں سرکار ءِ اے پرمان سکا ایر جتگ کہ آئی ءِ رد ءَ نزیک ء 5 ہزار کھول بزاں 30 ہزار مردم ، لشکرکشی ءِ شور ءِ پد ءَ پیش چہ 30 اکتوبر 2026 ءَ چہ شور پارود ، کلات ءَ وتی پت ءُ پیرکی لوگانی یلہ کنگ ءِ گْوشگ بیتگ اَنت۔ پانک ءَ وتی درشان ءَ گْوشتگ اے درکنگ بنکی مردمی اگبال ، شھرمنندانی پھریز ءُ بومی ئیں مردماں وتی پت ءُ پیرکی ھنکین ، روزگار ءُ دودمانی پجار ءِ رد ءَ مزنیں بے تاھیری ودی کنت۔ درشان ءَ گْوشگ بیتگ کہ ’ پت ءُ پیرکی ھنکین تیوک ءَ دمگے ءِ نام نہ اِنت ، بلکیں راجے ءِ پجار ، گْوستانک ءُ الباریں ھستی ءِ بنیاد اِنت ‘ ، ءُ ھمے رد ءَ اے ھم گْوشگ بیتگ کہ بلوچ کھول پشت پہ پشت ءَ ھمے ھنکین ءَ نندوک اَنت ، ھمد ءَ کار ءُ روزگار کنان اَنت ، وتی چک اش ھمد ءَ رودینتگ اَنت ءُ وتی دوست اش ھمے زمین ءِ میار کرتگ اَنت۔
پانک ءِ رد ءَ پاکستانی واکداراں اے دمگ ءَ سرمچارانی بیگ ءُ اے دمگ ءِ زمینانی سرکاری بیگ ءِ ٹاپار جتگ ءُ مردماں درکپگ ءِ پرمان داتگ۔ تْرامگیج ءَ گْوشتگ کہ اے وڑے ٹاپار ناں پہ وت سری ئیں درکنگ ءَ گھیں نیمونے ءُ نے کہ واکدارانی سر ءَ مردمانی زمہ واری ءِ ڈبو ءَ دیر کنت ، ءُ اے ھم چارگ لوٹ ایت کہ اے پرمان داں چنت زمان ءُ باریگ ءَ کار کنت بزاں داں چنت روچ ، ماہ ءُ سالاں مردم چہ وتی ھنکین ءَ پہ زور لڈینگ بیگ ءَ اَنت ، اے شیشاریں رنگے ءَ چارگ ءُ جست ءُ گیر لوٹ ایت۔ پانک ءَ بومی راجانی اگبالانی بارہ ءَ راجانی سنت ءِ جارینک ءِ 10 می بند ءِ بن شون داتگ ، کہ بومی ئیں راجاں آیانی وتواکی ، پیسر ءَ سھی کنگ ءُ دلجمی ءُ دلدوستیں جاہ ءَ نندارینگ ، ھما جاہ ءَ کہ درکنگ بیت آئی ءِ مٹ ءُ ھم دروریں جاھے ءَ نندارینگ ءُ اے گپ ءِ دلجمی کہ آ چہ ھما اود ءَ درکنگ بیگ ءَ اَنت پد ءَ وتی واھگ ءُ دل کشی ءَ واتر بوت کن اَنت ، ابید چہ اے ڈک ءُ بئیاں آیاں چہ بنکی ھنکیناں در کنگ مکن اِنت۔ تْرامگیج ءَ شھرمنندی ءُ سیاسی اگبالانی میان راجی پیمان ءِ 6 ءُ 17می بند، چاگردی ءُ ربیدگی اگبالانی میان راجی پیمان ءِ 11 می بند ، ءُ ماں وتی ڈیھ ءَ بے لوگ بیتگیں مردمانی بارہ ءَ راجانی سنت ءِ راھشونیں راھبندانی ھم بن شون داتگ اَنت کہ پہ بومی ئیں مردمانی اگبالانی پھریزگ ءَ کڈن کن اَنت۔
درشان ءَ شیوار کنگ بیتگ کہ 30 ہزار مردماں چہ آیانی ھنکین ءَ در کنگ ءُ گداناں لڈینگ ءُ برگ آیانی زند ءِ راستیانی سرجمیں ڈول ءَ ھچ رد ءَ مان نہ یارگ ءِ برابر اِنت۔ پانک ءَ سھرا کرتگ کہ اے مردماں دیر اِنت ھمے ھنکین ءِ میتگاں ھم چہ بنکی آسراتیاں زبھر بیتگ اَنت ، پانک ءَ جست کرتگ کہ کجام واکدار مانزمان بیت کنت کہ ھمے مردماں گدانانی تہ ءَ دلجمیں ساھگ ، سارتی ءَ گرمی ءِ آسراتی ، درمان ، اوشیشیں آپ ءُ رپت ءُ روپ ءِ آسراتی رس اَنت۔ تْرامگیج ءَ گْوشتگ کہ کلات چہ بلوچستان ءِ سارتریں دمگاں یکے ، ءُ زمستان ءِ بندات ءَ ھزاراں کھولانی گداناں لڈینگ آیانی جاندْراھی ، پھریز ءُ پہ ساہ ءَ سکیں ترس ودی کنت۔
پانک ءَ گْوشتگ کہ ابید چہ اے گپ ءِ گْوشگ ءَ کہ آ کج ءَ رو اَنت ، چون زند گوازین اَنت ، ءُ پہ آیانی پھریز ءَ کجام دلجمیں گامگیج زیرگ بیتگ اَنت ، واکدار مردماں وتی لوگانی یلہ کنگ ءِ پرمان دات نہ کن اَنت۔ تْرامگیج ءَ زور داتگ کہ واکدراں ھچ کس ءَ ابید چہ آیانی اگبال ، مردمی ءُ راھبندی پھریز ءِ دلجمیں منگہ ءُ منّگ ءَ چہ وتی ھنکیناں در کنگ ءَ ناچار کنگی نہ اِنت کہ آیانی پت ءُ پیرکاں ھما اود ءَ زند گوازینتگ ءُ ھما اود ءَ کل اَنت۔
