بلوچ راجی زْرمبشت ( بی این ایم ) ءَ نامی ئیں بلوچ راھشون شھمیر بانک کریمہ ءِ چارمی سالروچ ءِ دم ءُ درگت ءَ مراگشے برجم داشتگ۔ اے مراگش ءَ بی این ایم ءِ سرکماش ڈاکٹر نسیم ءِ پجیگ ءَ دگراں تْران کرتگ۔ آیاں بانک یات کرتگ ءُ آئی ءِ دائمانیں میرات ستا داتگ۔
’ بانک کریمہ رنگیں کارستانی ھورکیں جاہ سدکاں پر نہ بہ اَنت۔ ڈاکٹر نسیم‘
ڈاکٹر نسیم ءَ کریمہ ءِ کرد سھرا کنان ءَ گْوشتگ بانک کریمہ ناں ایوک ءَ بلوچ راج بلکیں پہ دگہ چیردستیں راجاں ھم گھگیری ءِ چیدگ اِنت۔آ پہ چاگرد ءِ بے تواریں ٹکاں بلوچ راج ءِ توار اَت۔مروچی ما پہ بانک ءِ کرد ءُ کارست ءِ سر ءَ گپ جنگ ءَ یکجاہ ایں۔دانک ’ بانک ‘ چوناھیا پہ درسیں جنین آدماں کارمرد بیت بلے مروچی اگاں کسے بانک بہ گْوش ایت گڑا درس سرپد بہ اَنت کہ کریمہ بلوچ ءِ نام گرگ بیگ ءَ اِنت۔آئی ءَ وتی کردار ءِ برپشت ءَ اے پنام رس اتگ۔ آ ’’ وتن ءِ لمہ ‘‘ ءُ ’’ بلوچستان ءِ رژن ‘‘ گْوشگ بیت بلے آ چہ ایشی ءَ گیشتر کرز ایت چوش کہ میر مھمد الی تالپور نبیس ایت ، کریمہ بلوچ راج ءِ ارواہ ءُ سنچ اِنت۔
آئی ءَ ماں چاگرد ءَ بانک کریمہ ءِٰ سان ءِ سر ءَ دیمتر ءَ گْوشتگ پہ آشوب ءَ پشت ماں پشت اوبادگانی دیمونی پکار بیت۔بلے بانک کریمہ وتی راھشونی ءِ باریگ ءَ ، وتی کردار ءُ راہ ءُ رندانی سر ءَ روگ ءِ برپشت ءَ تیوک ءَ چاردہ سال ءِ تہ ءَ آشوب آرگ ءَ سوبمند بوت، مروچی بلوچستان ءِ ھمک کنڈ ءَ آشوب ءِ پدگوانک اش کنگ بیت۔چہ دیمونی ءِ شھسسا ءَ کس انکار کرت نہ کنت۔ بلے ما اے راستی ءَ من ایں کہ بانک کریمہ ، نواب ھیربکش مری ءُ بالاچ مری رنگیں کارستاں پد ھورک بیتگیں جاہ سدکاں پر نہ بہ اَنت۔پرچا کہ آ وتی کردار ءَ چہ دگراں جْوان تریں وڑے ءَ سرپد بہ اَنت۔بانک کریمہ ءَ وتی میرات وت جوڑ کرتگ۔بلوچ جنینانی وتواکی آئی ءِ دومی لوٹ اَت ، آئی ءِ مستر ءُ بنکی جھد پہ بلوچستان ءِ آجوئی ءَ اَت۔مروچی ما وھدے بلوچ جنکے ءَ پہ بلوچ راجی آجوئی ءِ زْرمبشت ءَ کار کنگ ءَ گند ایں گڑا ما ھما دمان ءَ بانک ءِ تْرانگ ءَ کپ ایں۔ راستی ایش اِنت اے ماں جز ءِ پڑ ءَ آئی ءِ جھد ءِ تالانی اِنت۔آ مروچیگیں زْرمبشت ءِ پیشوک اِنت۔اد ءَ ما گمان کرت کن ایں کہ اگاں آ مروچی زندگ بوتیں گڑا چونیں جاورے بیتگ اَت۔
’ کریمہ بلوچ راج ءِ راھشون ءِ بستار ءَ یات کنگ بیت۔ کمال ‘
بی این ایم ءِ مستریں کمک سرکارگشاد ، کمال ءَ بانک کریمہ ءِ سیاسی جھد ءِ سر ءَ گپ جتگ، آئی ءَ گْوشتگ اگاں ما راستی ءَ گپ بہ کن ایں گڑا چیردست بیگ ءِ پد ءَ بلوچ سیاست سکا گْران اِنت۔کریمہ ءِ کرد تیوک ءَ اے نہ بیتگ کہ آئی ءَ جنین دلبڈی ءُ سکین داتگ اَنت بلکیں آئی ءَ سرجمیں راج ءُ چاگرد سانمند کرتگ۔ بلوچ چاگرد ءَ مردین ءُ جنینانی میان ءَ پیر پہ مدامی کم بیتگ۔ کریمہ ءَ بلوچ راج مدام راھشونے ءِ بستار ءَ یات کنت ، چہ ایشی ءَ کمتر بھ ناں۔
’ جھان پہ جنیناں مزدانک ءِ جھد ءَ اِت ، بانک ءَ بلوچ جنین راھشون جوڑ کرت اَنت۔ ازگر ‘
بی این ایم ءِ کلانھیں باسک ازگر ءَ گْوشتگ بانک ءِ کرد آشوب ءِ تہ ءَ آشوب اِنت۔ ھما وھد ءَ کہ جھان پہ جنیناں مزدانک ءِ جھد ءَ اَت بانک کریمہ ءَ بلوچ جنین راھشون جوڑ کرت اَنت۔ مروچی سرجمیں راج پہ ایشی ءَ پھر بند ایت کہ بلوچ جنین آیانی راھشونی کنگ ءَ اَنت۔اے کریمہ اَت کہ آئی ءَ پہ اے ٹوھیں میرات ءَ راہ راست کرت۔
’ آ مارا زوراکی ءِ دیم ءَ سر ءَ جھل نہ کنگ ءِ سوج ءَ دنت۔ نور ء مریم‘
مردمی اگبالانی پانکجن ، نور ء مریم ءَ گوں کریمہ ءَ وتی نزیکی یات کرتگ اَنت ءُ گْوشتگ کریمہ رنگیں دوست ءُ کارستانی سر ءَ گپ جنگ پہ ما مزنیں پھرے۔بلے آئی ءِ بارہ ءَ گپ جنگ آسان نہ اِنت پرچا کہ مئے مارشت مئے ھمراھی نہ کن اَنت۔ کریمہ ءِ سر ءَ باز گْوشگ ءُ نبیسگ بیت کنت۔گْوستانک آئی ءَ مدام انچیں کارستے ءِ بستار ءَ یات کنت کہ پہ وتی زمین، مردم ءُ زوراکیانی بگیری ءَ چست بیتگ اَت۔جنکے ءِ بستار ءَ آ کوچگانی تہ ءَ لوگ پہ لوگ شتگ ءُ آگاھی ئِے داتگ ، کہ سکا سانمند کنوکیں کارے اَت۔آئی ءِ جھد بلوچ گْوستانک ءُ یاداشت ءِ بھر جوڑ بیتگ۔ما آئی ءَ بلوچ جنینانی آجوئی ءِ مستریں پلہ مرز گْوشت کن ایں۔کریمہ ءِ زند ءِ تہ ءَ بازیں درونت ھست کہ آ پد ماں پدی مردمانی اوبادگاں سانمند ءُ چیردستیں راجانی راھشونی کن اَنت۔آئی ءِ زند گوں بچکندگیں دیم ءَ مارا سوج دنت ، آئی ءِ بچکند ھم مارا زوراکی ءِ دیم ءَ سر ءَ جھل نہ کنگ ءِ سوج ءَ دنت۔
’ آئی ءَ جنین چہ لوگاں در کرت ءُ راجی سیاست ءِ بھر جوڑ کرت اَنت ۔ در بی بی ‘
سیاسی کارانی تہ ءَ بانک ءِ سان ءِ سر ءَ گپ جنان در بی بی ءَ گْوشتگ بانک کریمہ ءِ سیاسی سرگرمیاں مارا درستاں سانمند کرتگ۔آئی ءَ مارا چہ لوگاں در کرت ءُ راجی سیاست ءِ بھر جوڑ کرت۔آئی ءَ مارا گوں وتی مردماں دوچار کپگ ءِ سکین دات۔ آئی ءَ مدام گوں درساں راھوت برجاہ داشت ءُ آ بلوچ ءُ بلوچستان ءِ پاکیں مھر ءِ لیکہ دات اَنت۔آئی ءَ مدام گْوشتگ کہ اگاں شمارا مردم پکار اَنت گڑا آیانی گْور ءَ بہ رو اِت۔آ مدام وتی بیل ءُ ھمراھانی کھولانی گندک ءَ شتگ اَت۔
مراگش ءِ جارچین پانک ءِ راھوتکار حاتم اَت ءُ بی این ایم ءِ رسانک ءُ آئی ٹی تک ءِ آئی ٹی ءُ اکس ءُ تامری کارانی سروک آبد جان کادر ءَ تکنیکی کمک داتگ۔