زندانی ئیں راھشون عبدالغفور ءِ مات ءِ بیرانی ءَ گل رنج اِنت، اے زور بیگواھیں ھزاراں مردمانی مات ءُ پتانی درد ءِ داستان اِنت۔ جارکش بی این ایم

بلوچ راجی زْرمبشت ( بی این ایم ) ءِ زندانی ئیں راھشون عبدالغفور ءِ مات گوں وتی چک ءِ شول کشیں جتائی ءِ رنجاں ( چار شمبے ، 5 مارچ ، 2025 ) ءَ بیران بیتگ۔بی این ایم ءِ پیسرگیں بنجاھی پتر ءِ باسک عبدالغفور 26 دسمبر 2009 ءَ پاکستانی لشکر ءَ دزگیر کرتگ اَت ، ءُ دنیگت زور بیگواہ اِنت۔

بی این ایم ءِ جارکش ءَ وتی درشان ءَ گْوشتگ گل زندانی ئیں راھشون ءِ مات ءِ بیرانی ءَ دلپدردی درشان ایت ءُ گوں کھول ءَ پرسیگ اِنت۔عبدالغفور ءِ مات ءِ بیرانی بلوچستان ءَ ھزاراں زور بیگواھیں مردمانی مات ءُ پتانی ھواریں رنج ءِ داستان اِنت ، کہ وتی بیگواھیں بچانی ودار ءَ چہ اے امروز ءَ لڈ اتگ اَنت۔

جارکش ءَ گْوشتگ عبدالغفور دومی بر ءَ دسمبر 2009 ءَ زور بیگواہ کنگ بیتگ ، ءُ انگت زندان ءَ اِنت۔چہ ایشی ءَ پیش ھم آ زور بیگواھی ءِ نشانگ کنگ بیتگ اَت ، بلے چہ بند ءُ آزاراں یلہ بیگ ءَ پد ھم آ چہ زْرمبشت ءَ پد کنزگ ءَ ساڑی نہ بوت۔گوں بی این ایم ءَ ھمگرنچی ءُ راجی آجوئی ءِ زْرمبشت ءِ ھمراھی ءِ پد ءَ آ گْْوستگیں 16 سال اِنت کہ زندان ءَ کنگ بیتگ ، آئی ءِ زند ءُ جاندْراھی ءِ بارہ ءَ ھچ سرپدی نیست۔

جارکش ءَ گْوشتگ بی این ایم بلوچ راج ءِ سر ءَ برجاھیں مھترھندی زوراکی ءَ گواچنیں دستاویزانی پارست ءَ میان راجی تْرامگیجانی دیم ءَ ایر کنان کنت عبدالغفور، ڈاکٹردین محمد ، رمضان ءُ حاصل حسرت بی این ایم ءِ ھما زندانی ئیں باسک اَنت کہ چہ دھکاں ھزاراں زور بیگواھیں مردمانی تہ ءَ گون اَنت۔پاکستان زور بیگواھی ءَ جنگ ابزارے ءِ وڑ ءَ بلوچ راج ءِ بگیری ءَ کارمند کنگ ءَ اِنت ، داں آ چہ آجوئی ءِ کوشستاں دارگ بہ بیت۔