بلوچ راجی زْرمبشت ( بی این ایم ) ءِ گوں مردمی اگبالانی تک ءَ بندوکیں تْرامگیج پانک ءَ مارچ 2025 ءِ میان ءَ بلوچستان ءَ مردمی اگبالانی بگیریانی تہ ءَ بے تاھیری ودی کنوکیں گیشی ءِ بارہ ءَ گزارش داتگ۔ مارچ ءَ 181 کس زور بیگواہ ءُ 12 درآمیدگسی کشگ بیتگ۔
پانک ءِ ماھی گزارش ءِ رد ءَ پاکستانی لشکر ءُ گوں آئی ءَ ھمگرنچیں مردم کشیں رمباں مزنیں کچے ءَ مردم آوار جنگ ءَ پد زور بیگواہ کرتگ اَنت ، آیانی گیشتریں نشانگ نودربر ءُ چاگردی کارکن اَت اَنت۔ پانک ءَ گْوشتگ 87 کس آوار جنگ ءِ رنگ ءَ دزگیری ءَ پد یلہ کنگ بیتگ ۔ بلے اے مردم سکا لٹ دیگ ءُ ٹپ ءُ ٹور کنگ ءَ پد یلہ کنگ بیتگ اَنت۔گزارش ءَ گْوشگ بیتگ اے دزگیری گیشتر ناراھی ءُ ابید چہ آمیدگس ءِ پرمان ءَ بیتگ اَنت۔
چد ءُ گیشتر پانک ءَ گْوشتگ شال ءُ کلات ءَ چہ درساں گیش 37 کس زور بیگواہ کنگ بیتگ۔ چہ دگہ سانمندیں دمگاں ڈیرہ بگٹی (18)، گوادر (15)، نوشکے (13)، ڈیرہ غازی خان (10)، کیچ (9)، بارکان (8)، آواران (7)، کراچی (6)، سیبی (2) لسبیلہ (5)، مستونگ (4)، پنجگور (3)، ءُ نصیرآباد (2) ھوار اَنت۔ ابید چہ ایشاں پانک ءَ اسلام آباد، کچی، جعفرآباد، جیکب آباد، اور چہ خضدار ءَ یک یک مردمے ءِ زور بیگواھی ءِ ھال داتگ۔
پانک ءَ دلگوش پرینتگ کہ درامیدگسی کشگ بیتگیں بازیں مردم چہ پیش ءَ زور بیگواہ بیتگ اَنت۔چہ ایشاں نظام ھم ھوار اِنت کہ 11 مارچ ءَ چہ گلی بلیدہ ءَ آوار جنگ بیتگ اَت ءُ دومی روچ ءَ آئی ءِ کنٹ دست کپتگ۔آئی ءِ برات شاہ نواز ھم رند ءَ کیچ ءَ تیر جنگ ءُ کشگ بیتگ۔دگہ کشگ بیتگیں مردمے شاہ جہان کرد اَت کہ زور بیگواھیں بلوچ نودربر گل ( بی ایس او ) ءِ راھشون زاھد ءِ برات اَت ؛ آ ماں نال ، خضدار ءَ کشگ بیتگ۔
دگہ دلپدرد کنوکیں ویلے 21 مارچ ءَ پرایمنیں زھرشانی ءِ میان ءَ بیتگ ، زھرشانی پہ زور بیگواھیں مردمان اَت ، زھرشانی کنوک لوٹگ ءَ اَت اَنت کہ زور بیگواھیں مردم یلہ کنگ بہ بہ اَنت۔ پانک ءَ گزارش داتگ 12 سالی ئیں نعمت ، حبیب ءُ امداد زھرشانی ءِ تہ ءَ تیر جنگ ءُ کشگ بیتگ اَنت۔ پانک ءَ نعمت ءِ شھمیری ’’ مھترھندی زوراکی ءِ چیدگ ‘‘ لیک اتگ۔
23 مارچ ءَ احسان کہ بی وائی سی ءِ کارکن ءُ دکاندارے اَت ، خضدار ءَ کشتگ بیتگ۔پانک ءَ اے کوش ’ پہ زانت ءُ سما نشانگیں کوش ‘‘ لیک اتگ۔لھتے روچ ءَ پد 26 مارچ ءَ توصیف ، ظہیر ءُ ارشاد ءِ ٹپ ءُ ٹوریں کنٹ چہ مشکے ءَ دست کپتگ اَنت — ھر سئے ئیں چہ پیسر ءَ آوار اَت اَنت۔ پانک ءَ چد ءُ دیمتر ءَ گْوشتگ سیف ءُ انس ھم چہ بازیں ماھاں زور بیگواہ اَت اَنت ، آیانی ھم کںٹ مارچ ءِ گڈی روچاں دست کپت اَنت۔
گزارش ءَ نامی ئیں سیاسی کارکنانی ناراھیں دزگیری ءِ بارہ ءَ ھم گپ جنگ بیتگ ، کہ چہ آیاں ڈاکٹر ماہ رنگ ، بیبو ، بیبگر ءُ شاہ جی صبغت اللہ ھوار اَنت۔ آ ایم پی او راھبند ءِ رد ءَ دزگیری کنگ ءَ پد شال ءِ ھدا زندان ءَ بند کنگ بیتگ اَنت۔
پانک ءَ کاسی گورستان ءَ 13 زانگ نہ بیتگیں مردمانی چیروکانی کل کنگ ءِ سر ءَ ھم بے تاھیری درشانتگ ، آیانی بارہ ءَ گمان ھمیش اِنت کہ آ زور بیگواھیں مردمانی کنٹ بیت کن اَنت۔ گل ءَ کل کنگ بیتگیں اے مردمانی زیت فورنزک پولکاری ءِ ھم لوٹ کرتگ۔
پانک ءَ برجاھیں مھترھندی زوراکی ، میان راجی مردمی اگبالانی تچکیں بگیری لیک اتگ ءُ چہ راجانی سنت ءُ جھانی مردمی اگبالانی گلاں زیت دزمانجنی ءُ چہ پاکستانی مھترھند ءَ جست کنگ ءِ لوٹ کرتگ۔
