ما وتی آجوئی ببا داتگ بلے وتی مڑاہ ناں۔ 11 اگست آزادی ءِ جشن گرگ روچ نہ اِنت بلکیں اے گپ ءِ یات کنگ ءِ روچ اِنت کہ ما آجو بیتگ این ءُ مارا آجو بیگی ایں۔ اے گپ گْوشتانک دیوکاں بلوچ راجی زْرمبشت ( بی این ایم ) کیچ گوادر ھنکین ءِ گل ءِ تھی نیاداں تْران کنان ءَ گْوشتگ اَنت۔
11 اگست سوگند سرسبزی روچ ءِ درگت ءَ چہ بی این ایم کیچ گوادر ھنکین ءِ نیمگ ءَ دو جتائیں مراگش برجم دارگ بیتگ۔اے مراگشاں بی این ایم ءِ رسانک ءُ ربیدگی کارگشاد قاضی داد محمد ریحان ، بنجاھی کلیتدار ناصر ، ھنکین ءِ کماش بابا جی آر ءُ ھنکین ءِ کارگشاد بھار ءَ تْران کرتگ۔
آیاں اے درگت ءَ چد ءُ دیم گْوشتگ ’ آزادی چی یے ؟ ‘ اے جست ءِ پسو مئے بندگی ءُ مروچیگیں جاورانی تہ ءَ پنھان اِنت۔ چیردستی ءِ برورد ءَ مروچی بلوچ وتی جند ءِ سرڈگار ءَ دز ءُ میاربارانی وڑ ءَ زند گوازینگ ءَ ناچار اِنت۔ ما وتی لوگ ءِ دپ ءَ اوشتگ ءَ ترس ایں کہ چوش مہ بیت دری زورگریں لشکر ءِ کارمند مارا دزگیر بہ کن اَنت۔ داں اد ءَ کہ ما وتی لوگانی تہ ءَ ھم پھریز نہ ایں چہ ھمود ءَ ما چست کنگ ءُ زور بیگواہ کنگ بیگ ءَ ایں __پہ ما آجوئی چہ پاکستان ءِ چیردستی ءَ درکپگ ءِ نام اِنت۔
آیاں گْوشتگ 11 اگست ءِ روچ شھمیر واجہ غلام محمد ءِ گْوشگ ءَ ھمک سال سوگند سرسبزی روچ ءِ بستار ءَ دارگ بیت۔ اے روچ ءَ ما گوں آجوئی ءِ زْرمبشت ءَ وتی سوگند ءَ نوک کن ایں پرچا کہ ما وتی آجوئی ببا داتگ بلے وتی مڑاہ ، راجی مارشت ناں ءُ ناں کہ ما چہ وتی آجوئی ءَ دستکش بیتگ ایں۔بلے لھتے کس اے روچ ءَ جشن کنت چہ ایشی ءَ ھمے گمان بیت کہ ما آجو ایں۔اے روچ ءِ گْوستانکی ءُ سیاسی بستار ءِ رد ءَ ما زْرمبشت ءِ راھشون شھمیر غلام محمد بلوچ ءِ رندگیری ءَ اے روچ ءَ سوگندسرسبزی روچ ءِ رد ءَ بہ دار ایں ، جشن مہ کن ایں۔
تْرانکاراں گْوشتگ بندگی ءِ لپ ( داغ ) ءِ کور کنگ ءَ اے بلوچ ءِ آجوئی ءِ جنگ ءِ پنچمی دْرچ اِنت کہ ایشی ءِ تہ ءَ گلزمین ءِ پسگ وتی جاناں نْدر کنگ ءَ اَنت۔ مارا آجوئی ءِ جھد ءِ پڑ ءَ ھمک سکی گوں شادانی ءَ سگگی اَنت۔پاکستان بے بند ءُ باریں دشمنے کہ مئے سر ءَ ھرچ وڑیں زوراکی کنگ ءَ اِنت۔مئے مردینانی پجیگ ءَ نی مئے جنین ھم زور بیگواہ کنگ بیگ ءَ اَنت۔ بلوچ ءَ وتی جھد یکشل ءَ برجاہ داشتگ پمیشکا مروچی سرجمیں راج آجوئی ءِ جھد ءِ پشت اِنت۔
