گوں بلوچ راجی زْرمبشت ( بی این ایم ) ءَ بندوکیں مردمی اگبالانی گل پانک ءَ جولائی 2025 ءِ وتی گزارش شنگ کرتگ ۔ گزارش ءِ تہ ءَ بلوچستان ءَ زور بیگواھی ، در آمیدگسی کوش ، آزار دئی ءُ شھرمنندانی سر ءَ ارش ءِ ویل گواچنی نبشتگ اَنت۔ گزارش ءِ رد ءَ پاکستانی لشکر ءُ گوں آئی ءَ بندوکیں تْرامگیجاں جولائی ءَ کم ءَ کم 96 کس زور بیگواہ ءُ 19 درآمیدگسی کشتگ۔
شمارانی رد ءَ ، جولائی ءَ کیچ ھنکین چہ درساں گیش سانمند بیتگ چہ آ اود ءَ 19 کس زور بیگواہ بیتگ۔ چہ ایشی ءَ پد چہ شال ءَ 17 ءُ گوادر ءَ 9 کس ءِ زور بیگواھی ءِ حال رس اتگ۔ ھمے پیم آواران ءَ 8 ، واشک ءَ 7 ، کراچی ءُ پنجگور ءَ چہ ھر یک جاھے ءَ 5 ، نوشکے ءُ ڈیرہ غازی خان ءَ 3 ، 3 ، ڈیرہ بگٹی ، مستونگ ءُ لسبیلہ ءَ2 ، 2 کس زور بیگواہ کنگ بیتگ۔ چہ ایشاں ابید چہ خضدار ، کلات ، چاغی ءُ اسلام آباد ءَ یک یک کسے زور بیگواہ بیتگ۔
گزارش ءَ تربت ءِ نندوکیں ھشت سالی ئیں زھگ شعیب خالد ءِ دزگیری ءِ بارہ ءَ ھم گْوشگ بیتگ۔ آئی ءَ مردمی اگبالانی کارکن گلزار دوست ءِ گْوشتانکے ماں چاگردی رسانکدر ءَ شنگ کرتگ ءُ ھمے میار ءَ دزگیر کنگ بیتگ۔
گزارش ءَ 10 جولائی ءَ فرنٹیئر کور ( ایف سی ) ءِ راکٹ ارشانی بارہ ءَ ھم نبشتگ۔ ایف سی ءَ ماں گورکوپ کیچ ءَ گوازی پڑے ءَ گوں راکٹاں ارش کرتگ چہ اے ارش ءَ ھپت شھرمنند ٹپی بیتگ ، چہ ایشاں علی غلام ءَ ٹپ نہ سگ اتگ اَنت ءُ بیران بیتگ ، شھاب دوستدل کوما ءَ اِنت ءُ دگہ کہ سکا ٹپی اَنت درمان کنگ بیگ ءَ اَنت۔مردماں گْوشتگ کہ ایف سی ءَ پہ زور شھرمنند نشانگ کرتگ اَنت ، آیاں لوٹ کرتگ ، ایف سی ءِ اے کردگار ءِ آزات ءُ شیشاریں وڑے ءَ پٹ ءُ پول بہ بیت۔
پانک ءِ گزارش ءِ رد ءَ در آمیدگسی کوش دنیگت مزنیں جیڑھے۔ جولائی ءَ کم ءَ کم 19 کس کشگ بیتگ ، کشگ بیتگ مردمانی تہ ءَ گون اَنت : کریم جان (مشکے، کنڈاری)، ھمل(تمپ، گومازی)، غلام جان (آواران، پھو)، عظمت رند (ڈیرہ مراد جمالی)، مجاہد (خاران)، شاہ در مینگل (چاغی، نوکنڈی)، حمید (آواران، کوٹو جھاؤ)، نذیر احمد (جھاؤ، آواران)، نور خان (جھاؤ، آواران)، کمبر اسلم (کشاورد مزدور، خضدار)، مزار (مشکے، کنڈاری)، ڈاکٹر عبدالمجید مینگل، عطاالرحمان مینگل ءُ ممتاز مینگل (وڈھ، خضدار)، علی غلام (کیچ، گورکوپ راکٹ ارش) ءُ شاہ جھان (پنجگور، چتکان)۔چہ ایشاں ابید چہ کلات ءِ ھند کھوک ءَ سئے کسانی ژانگولیں کنٹ ھم دست کپتگ ، آیانی دیم ءَ تیزاپ پریچگ بیتگ پمیشکا پجاہ آرگ نہ بیتگ اَنت۔
