زھری ءَ پاکستانی لشکر ءِ زوراکی
پاکستانی لشکر ءَ ماھے بیت کہ چہ زمین ءُ آسمان ءَ پہ خضدار ءِ ھند ’ زھری ‘ ءَ بیڑ آرگ ءَ اِنت۔
ستمبر 2025 ءِ میانی روچاں پاکستانی لشکر ءَ پہ بلوچ راجی زْرمبشت ءِ پروش ءَ اے ھلک ءُ میتگاں لشکرکشی بنا کرت۔زھری ءَ دیر اِنت کہ بلوچ راجی آجوئی زْرمبشت ءُ راجدوستیں سیاست ءِ بنجل اِنت۔ اے سری رند نہ اِنت اے دمگ زوراکیانی دیمپان اِنت— چہ ایشی ءَ پیش ھم پاکستانی لشکر ءُ آئی ءِ کاسگ چٹاں اد ءَ کشت ءُ کوش کرتگ ، مردم زور بیگواہ کرتگ اَنت ، سدانی کچ ءَ آوار جنگ ءَ پد در آمیدگسی کشتگ ءُ بے کس ءُ مردماں یکگور کرتگ اَنت۔
اے میار چہ کس ءَ چیر نہ اَنت۔پاکستانی واکدار ، پاکستانی رسانک ءُ وت پاکستانی لشکر ءِ جھگیراں اے زوراکی ءُ کشت ءُ کوش من اتگ اَنت۔ انی ھم چہ ایشی ءَ گیشتر کشتگ اش بلے پاکستانی لشکر ءَ ھمے اکتوبر 2025 ءَ ماں زھری ءَ کم کم ءَ چاردہ مردمانی کوش من اتگ۔
اے زوراکی ءُ کشت ءُ کوش ءِ روا دیگ ءَ پاکستانی لشکر ’ فتنہ الھندستان ‘ ءُ ’ فتنہ الخوارج ‘ رنگیں دینی ءُ سیاسی پنام کارمرد کنت — داں پنجاپیاں گمراہ بہ کنت ءُ آیانی دلانی تہ ءَ کینگ ءُ بیرگری ءِ مارشت ودی بہ کنت ۔ پاکستانی لشکر لوٹ ایت کہ بلوچ راج ءِ بگیری ءَ پاکستانی لشکر ءِ چکچینی ءِ کارپداں پنجاپی پلہ مرزی بہ کن اَنت ، پمیشکا چوشیں دانک ءُ گپ شکسائیت۔ اے زورگریں لشکر ءِ ’ روشت ءُ کارداب ‘ اِنت کہ چیردستیں راجانی سیاسی ءُ مردمی اگبالاں لپاشگ ءَ پد آیاں گوں ڈنی دژمناں ھمگرنچ کنگ ءِ کوشست کنت۔
انیگیں روچاں شھرمنندانی کوش ۔ زھری
17 ستمبر 2025 :
تراسانی ءِ نزیک ءَ پاکستان ءِ ڈرون ارشاں ثناء اللہ ءِ لوگ بانک چل سالی ئیں آمنہ ، علی اکبر ءِ لوگ بانک لال بی بی ءُ سی سالی ئیں محمد حسن ء محمد یعقوب بیران بوت اَنت ، چہ ایشاں ابید باز ٹپی بوت۔ پاکستانی لشکر ءَ وت ھم اے ارش من اتگ۔
5 اکتوبر 2025:
زھری ءِ دمگ مولاچاڑی ءَ پاکستانی لشکر ءَ گوں تیرگواریں بالگرداں میتگ ءِ سر ءَ ارش کرت ، چہ ادارے ءَ گیش تیرگواری کرت ، اے ارش ءَ ’ چار چک ، جنین ءُ مردینے ‘ بیران بوت اَنت۔
بلوچ راجی زْرمبشت ( بی این ا یم ) ءِ چہ میان راج ءَ دزبندی
بلوچ راجی زْرمبشت ( بی این ایم ) راجانی سنت ، مردمی اگبالانی گل ءُ چہ راجمستری منوکیں ڈیھاں دزبندی کنت کہ آ ماں بلوچستان ءَ جنگی میار ءُ مردمی اگبالانی مزنیں بگیریانی سر ءَ دلگوش گْور بہ کن اَنت۔
پاکستان ناشرکاریں مھترھندے کہ بلوچ ءُ دگہ چیردستیں راجانی گواجناں پل ایت۔آ بلوچستان ءِ پر ارزشتیں زمین ءُ مڈیاں میان راجی تک ءَ پہ وتی سیاسی ءُ گزرانکی سیتاں بھا کنت— پمیشکا روکپتی توان پاکستانی جرنیل ءُ سیاستدانانی میارانی سر ءَ ترک ءُ نک اَنت ۔ مردمگری ءِ باندات ءَ اے ڈالچاری نی باید آسر بہ بیت۔
بلوچستان ءِ آجوئی — ایمنی ءِ مانزمان
بلوچستان ءِ آجوئی ناں ایوک ءَ پہ بلوچ راج ءِ مانشت ءُ مڑاہ ءَ المی اِنت بلکیں پہ دمگ ءُ جھانی ایمنی ءُ داشت ءَ ھم المی اِنت۔
بلوچ راجی زْرمبشت ( بی این ایم )
