مردمی اگبالانی جھانی روچ ءِ دم ءُ درگت ءَ بیتگیں نیادے ءَ تْران کنان پانک ءِ راھوتکار ءُ بی این ایم ءِ بنجاھی باسک حاتم ءَ گْوشتگ ، چہ بلوچ ءَ زندگ بوگ ءُ سیاست کنگ ءِ اگبال پچ گرگ بیتگ اَنت ءُ بلوچ ءِ زمین ءُ مڈی ’ مال ء غنیمت ‘ ءِ پیم ءَ بھر بانگ کنگ بیگ ءَ اَنت۔
بلوچ راجی زْرمبشت ( بی این ایم ) ءِ نیمگ ءَ برجم دارگ بیتگیں اے نیاد ءَ بی این ایم ءِ شھمیر راشد ھنکین ، آواران ءِ باسکاں بھر زرتگ ۔ نیاد ءِ گچینی مھمان حاتم اَت۔ نیاد ءِ ھنکین ءِ کماش استاد مھران ، زْرمبش براھوئی ءِ شونکار ذیشان منان ءَ تْران کرتگ۔
حاتم ءَ دہ دسمبر ءِ پژدر ءِ بارہ ءَ گپ جنان ءَ گْوشتگ ھپتاد ءُ ھپت سال ءَ پیش دہ دسمبر مردمی اگبالانی جھانی روچ منگ بیتگ۔ مردمی اگبال ءُ مردمی اگبال ءِ جھانی روچ ءِ پژدر ءَ اے گپ منگ بیتگ کہ درسیں مردم آجو ودی بیتگ اَنت ءُ درسانی اگبال ءُ منگہ برابر اَنت۔ بلے چہ ما درسیں اگبال پچ گرگ بیتگ اَنت۔
آئی ءَ گْوشتگ کہ مارا سیاست کنگ ءِ موکل نیست دژمن مئے سر ءَ ھرچ وڑیں زوراکی کنگ ءَ اِنت۔پاکستانی مھترھند ءَ وتی درسیں پندلاں مئے سر ءَ کارمرز کرتگ اَنت چوش کہ ملا، نشہ بھا کنوکاں بہ گر داں شفیق مینگل ، سمیر سبزل ءُ راشد پٹان ءِ وڑیں مردم کشاں کارگرگ ءُ بلوچ جھد ءَ ھرچ پڑ ءَ نشانگ کنگ ءِ جھد ءَ اِنت۔ بلے اے درس وڑے نا وڑے ءَ بے سوب بوتگ اَنت۔ پرچا کہ مئے سنگت پہ مردمی آجوئی ءُ برابری ءَ جھد کنگ ءَ اَنت۔
آئی ءَ گوشتگ کہ دژمن مئے بگیری ءَ جتائیں پروپیگنڈہ کنگ ءَ اِنت بلے من ءَ ستک اِنت کہ رضا ءُ کمبر ءِ وڑیں سنگت جھد ءَ ھوار بوتگ اَنت ۔غلام محمد ءِ وڑیں سنگت بوتگ اَنت پاکستان اے جھد ءَ پروش دات نہ کنت۔ مئے جھد الم روچے وتی منزل ءَ سر بیت۔ما پمیشکا مڑگ ءَ ایں کہ ما وتی اگبالاں پچ گپت بہ کن ایں ۔مئے جھد زوراکی ءِ پشت ءَ چست بوتگ پاکستان مئے زھگاں برگ ءَ انت، جنگ ءَ انت ، مئے گساں ماندارگ ءَ اِنت ءُ بلوچاں مچ ڈنڈ دیگ ءَ اِنت۔
ھنکین ءِ کماش استاد مھران ءَ گْوشتگ کہ جھان ءِ ھما ڈیھ کہ مردمی اگبالانی سر ءَ گپ جن اَنت ھما چہ درساں گیش مردمی اگبالاں لپاشگ ءَ اَنت۔ جھانی توان بلوچ ءَ مردم نہ لیک اَنت ، پرچا کہ نزور کسی چماں نہ اِت۔ ما گْوستانک ءَ بہ چاریں ما گند ایں کہ یک نیمگے ءَ پہ مردمگری ءُ زانت ءَ جھد بوتگ ءُ دومی نیمگ ءَ مردمگری ءِ بگیری ءَ جھانی واکانی شوندات بیتگ اَنت۔ گْورے مردنانی ھون ریچگ بیتگ ءُ دومی نیمگ ءَ پہ ایمنی ءُ مزدانک ءَ گپ بیتگ۔
آئی ءَ گْوشتگ کہ بلوچستان ءَ انو ھمے وڑ بوگ ءَ اِنت۔ بلوچ پہ وتی راجی آجوئی ءُ وتواجھی،ایمنی ءُ مزدانک ءَ جھد ءَ اِنت۔
بلے دوھمی نیمگ ءَ پاکستان ءَ گوں ھوار جھانی توان چین ءُ امریکہ گوں مزن مزنیں شرکتاں پہ بلوچ ءِ چکچینی ءَ پاکستان ءَ ھرچ وڑیں کمک دیگ ءَ اَنت۔ بلوچ ءِ جیڑہ ءِ بارہ ءَ زانگ پد ھم امریکہ چارمی روچ ءَ پاکستان ءَ پہ ریکوڈک ءِ کارانی سوبمندی ءَ زر ءُ پیکج دیگ ءِ جار ءَ جنت۔ چہ ایشی ءَ زانگ بیت کہ امریکا ءُ چین مردمگری بگیری ءُ بلوچ ءِ چکچینی ءَ پاکستان ءِ مالی کمک کنگ ءَ اَنت۔
ذیشان منان ءَ تْران کنان ءَ گْوشتگ کہ وھدے انگریزاں دگہ راج چیردست ءُ آیانی ڈیھ دسیتگ کرتگ اَنت گڑا آ چہ وت ءَ کمتر لیک اتگ ءُ پیش داشتگ اَنت۔ مروچی زوراک گوں ما انچوش کنگ ءَ اَنت۔ گوں ما بیوکیں زوراکیاں جھانی واک ءُ مردمی اگبالانی پانک سرپد اَنت۔ بیت کنت آ زوراکیں مھترھند ءِ سر ءَ زور ھم بہ دے اَنت بلے اے زورگریں مھترھند ھما کار ءَ کنت کہ گوں ایشی ءِ سیتاں بندوک اِنت۔
تْرانکاراں گْوشتگ ، بلوچستان ءَ مردمی اگبالانی جیڑہ گوں بلوچستان ءِ سیاسی جاوراں بندوک اَنت ، داں بلوچستان آجو بہ بیت چوشیں واکے نیست کہ آ پاکستان ءَ چہ اے زوراکیاں بہ دار ایت۔ بلے مئے چہ مردمی اگبالانی گل ءُ جھان ءِ دگہ راجاں ھمے لوٹ اِنت کہ آ پاکستان ءَ ھمے چماں بہ چار اَنت کہ آ زوراک اِنت ءُ مردمی اگبالاں لپاشگ ءَ اِنت۔
