شال: بلوچ راجی زْرمبشت۔بی این ایم ءِ جارکش ءَ گْوشتگ مھمودھان اچکزھی ءَ وتی سیاسی مچی ءِ تہ ءَ گوں اے گپ ءَ کہ نام ءِ برٹش بلوچستان ءَ اوگانیہ ءِ نام ءِ سر ءَ سرسبزین ایت ، براتیں راج بلوچ ءُ پشتون ءِ میان ءَ جیڑھی اڑاند ودی کنگ ءِ کوشست کرتگ۔ایشی ءِ سیتاں ایوک ءَ زورگریں واک پنجاپی چست کنت ءُ براتیں راجانی میان ءَ دیری ودی کنت۔
’ بلوچ ءُ پشتون ءِ میان ءِ درسیں جیڑہ انگریزانی ودی کرتگین اَنت۔ایشانی تہ ءَ چہ درساں مستریں جیڑہ ڈیورنڈ لائن ءُ میک موھن لائن اَنت۔ ایشانی کشوک ھم انگریز بیتگ اَنت۔مروچی مھمود ھان اچکزھی پہ پنجاپیانی وشنودی ءَ بلوچ ءُ پشتونانی میانی جیڑھاں گوں براتی ءُ وت ماں وتی تْراناں گیشینگ ءِ جاہ ءَ ’ بھر بہ کن ءُ واکداری بہ کن ‘ ءِ شوندات ءِ رد ءَ گیشینگ ءِ گپ ءَ جنگ ءَ اِنت ، چہ ایشی ءَ گیشتر جیڑہ ءُ دیری ودی بیت۔‘
آئی ءَ گْوشتگ بلوچ ءُ پشتونانی میان ءَ ھچ رنگیں جیڑھی اڑاند نیست۔ دوئیں راج وتی وتی ابرمی سرڈگارانی سر ءَ نشتگ اَنت۔زوراکیں واک پنجاپی ءِ کوشستانی چپ ءَ بلوچ ءُ پشتون راج ءَ یک دومی ءَ منگہ داتگ ءُ ھرچ تک ءَ چہ جیڑھاں پھریز کرتگ۔
جارکش ءَ گْوشتگ بلوچ ءُ پشتون دوئیں پنجاپی ءِ زیردستیں راج اَنت ءُ چہ آجوئی ءَ زبھر اَنت بلے آیانی ابرمی سرڈگار ءُ مرز ءُ سیم گیش اتگ اَنت۔ما دیستگ کہ وھدے کہ پاکستانی گچینکاری نزیک بہ اَنت ، جیڑہ ءُ اڑاند ودی کنگ ءِ کوشست کنگ بیت۔پشتون راھشون پہ ما پرمنگہ اَنت بلے پہ پاکستانی گچینکاریاں دو براتیں راجانی میان ءَ دیری ودی کنگ ءِ کوشستاں کساں سیت نہ رس ایت بلکیں پنجاپی زوراک چہ ایشی ءَ سیت چست کنت۔
آئی ءَ گْوشتگ چہ پنجاپی زوراک ءِ وش کنگ ءِ جاہ ءَ وھد ءِ لوٹ ءُ براتیں راجانی راجی جست چہ ما اے لوٹ ءَ کن اَنت کہ بہ یا ھم دست بہ این ءُ پہ راجی آجوئی ءَ ھواری ءَ جھد کن این ءُ چہ پنجاپی زوراکی ءَ آجو بہ ایں۔ تیوک ءَ آجو بیگ ءَ پد پشتون ءُ بلوچ براتیں راج وتی ابرمی سرڈگارانی سر ءَ وش ھالیں راجی زندے گْوازینت کن اَنت۔