شال:بلوچ راجی زْرمبشت ءِ مردمی اگبالانی تک ’ پانک‘ ءِ ماھی گزارش ءِ رد ءَ نومبر ءَ پاکستانی لشکر ءَ 36 مردم زور بیگواہ ءُ 23 جتائیں لشکری کارروائیاں کشتگ۔
گزارش ءِ رد ءَ نومبر گْوستگیں ماہ ءَ پاکستانی لشکر، ایپ سی ءُ نام ءِ سی ٹی ڈی ءَ بلوچستان ءُ سند (جیکب آباد) ءَ بلوچ وانڈوانی پجیگ ءَ 36 مردم زور بیگواھی ءِ نشانگ کرتگ۔ھمے ماہ یا چہ ایشی ءَ پیسرگیں ماہ ءَ 14 کس زھنی ءُ بالادی آزار دیگ ءَ پد یلہ کنگ بیتگ۔
گْوستگیں ماہ ءِ گڈی ھپتگ ءَ کوھلو ءِ ھند ءَ ڈرون بالیگ ءُ تیرگواریں بالگردانی پارست ءَ لشکر کشی کنگ بیتگ ، اے میان ءَ 8 جھدکار شھید بیتگ ءُ وھدے کہ ھمے ماہ ءَ کولواہ ءَ بیتگیں ڈرون بالیگ ءُ بالگردانی ارشاں دگہ 11 آجوئی دوستیں گلانی باسک شھید بیتگ وھدے کہ میتگانی شھرمنند ھم جانی ءُ مالی تاوان دیگ بیتگ اَنت۔
گزارش ءِ رد ءَ آواران ھنکین ءِ ھند جھاؤ ءِ میتگ کوھڑو ءَ اندرانڈیھ وانڈو بیتگیں مردمانی واتری ءَ پد پاکستانی لشکر ھیلی پیڈ ءُ لشکری بنجلانی جوڑ کنگ ءَ مردماں بیگار گرگ ءَ اِنت۔ھمیشی ءِ تامر پانک ءَ سر بیتگ ءُ چاگردی رسانکدر ءَ شنگ کنگ بیتگ۔
گزارش ءَ گْوشگ بیتگ کہ بلوچ راج ءِ مزنیں بھرے چہ لشکرکشی ءَ شزار بیگ ءَ پد ایران ءُ اوگانستان ءَ لڈگ ءَ لاچار بیتگ کہ آنگو آ بدتریں جاوراں زند گْوازینگ ءَ اَنت۔
پانک ءِ رد ءَ پاکستانی لشکر وتی مولانی گرگ ءَ بلوچستان ءَ مردماں وتی اسپر جوڑ کنگ ءَ اِنت۔نومبر ءَ چاکر مجید زور داتگ کہ آ پہ پاکستانی لشکر ءَ چاریگی بہ کنت پمیشکا آ دلسیاہ ءُ شزار بیتگ ءُ وت کشی ئِے کرتگ چہ ایشی ءَ پیش ھم چہ پاکستانی لشکر ءِ زوراکیاں مردماں وت کشی کرتگ۔
پانک ءَ چہ مردمی اگبالانی ادارہ ءُ دودمانداریں ڈیھاں بلوچستان ءَ مردمی اگبالانی سنگینیں بگیریانی گر ءُ دار ءُ چہ جنگ ءَ سانمند بیتگیں مردمانی مردمی بنیاد ءَ کمک کنگ ءِ دزبندی کرتگ۔