[dflip id="3285" ][/dflip]
بلوچستان : وانگجاھانی بن دیگ ءِ ویل
«بی این ایم ءِ پنتاک»
ھمبلیں بلوچاں!
کسانیں باریگے ءَ بلوچستان ءِ جتائیں ھند ءُ دمگ دشت ، بلیدہ ، پسنی ءُ وندر ءَ وانگجاہ بن دیگ بیتگ اَنت۔شما الم ءَ جیڑ اِتگ کہ اے وانگجاہ پرچا بن دیگ بیتگ اَنت؟ ءُ کے ءَ بن داتگ اَنت؟بلوچستان ءِ سرجمیں جاور ءُ پاکستان ءِ نوکابادی شونداتی رد ءَ چارگ بہ بیت گڑا اے جستانی پسو آسانی ءَ رس ایت۔
اد ءَ مزنیں جستے ایش اِنت کہ زورگریں واکے ءِ بستار ءَ پاکستان چہ چی ءَ ترس ایت ۔ایشی ءِ پسو ایش اِنت کہ پاکستان بے شک ءُ گمان ءَ چہ بلوچ ءِ سنچ ءُ آگاھی ءَ دلوارگ اِنت۔اے وانگجاہ آگاھی ءِ تالان کنگ ءَ بنکی کردے پیلو کنگ ءَ اَنت۔ انگت گپ ایش اِنت ماں پاکستان ءِ نوکابادی وانگی تْرام ءَ بلوچ ءَ بازیں کٹونیست بلے بلوچ راجدوستی ھمینچک توانمند اِنت کہ بلوچ ورنا چہ اے پس اتگ ءُ نوکابادی وانگی تْرام ءَ ھم سنچ گر اَنت ،ھمے کار پاکستا ن ءَ چہ درساں گیش تور ایت۔
پاکستان ءَ زندمان ءِ ھمک پڑ ءَ بلوچ راج ءِ پدمنتگ کنگ ءَ وتی نوکابادی شوندات گوں تْرندی ءَ پرینتگ اَنت۔ گچینی وانگ ءِ پڑ ءَ پاکستان ءِ نوکابادی شوندات سھر ا اَنت۔ بلوچ راج ءِ چہ وانگ ءُ سنچ ءَ دیر دارگ ءَ ناں ایوک ءَ بلوچ نودر بر ءُ استاد زور بیگواہ کنگ ءُ شھید کنگ بیتگ اَنت بلکیں بلوچ نودر برگل (بی ایس او) رنگیں پرکاریں گلے ماٹوکنگ بیتگ۔بلوچستان زانشتجاہ شال ءُ تربت زانشجاہ گدانک (گِ دَا ۔ نَک بزا ں کیمپس)لشکری بنجل جوڑ کنگ بیتگ اَنت۔ناں ایوک ءَ سداں دربرجاہ ءُ شھدربرجاہ لشکری بنجل ءُ پانگس جوڑ کنگ بیتگ اَنت بلکیں بازیں دربرجاہ ءُ شھدربرجاہ ویران کنگ بیتگ اَنت۔بلوچ جنکیں نودربرانی چہ وانگ ءَ دیر دارگ ءَ بلوچستان زانشجاہ ءِ وابجاھاں داں کہ جان شودگ جاھاں چیریں کیمرہ جنگ بیتگ داں ھمیشی ءِ سر ءَ گپچلے جوڑ کنگ ءِ پندلے پیم کنگ بہ بیت۔دومی نیمگ ءَ وتی مزھبی رمبانی پارست ءَ پنجگور ءُ دگہ ھنداں بیھار دھیں پنتاک شنگ کنگ ءُ آیاں چہ وانگ ءُ سنچ ءَ دیر دارگ ءِ کوشست مھترھندی (ریاستی) شونداتانی بھر اَنت۔چہ ایشی ءَ ابید پنجاب ءَ وانوکیں بلوچ نودربر جتائیں نیموناں دلسیاہ کنگ بیگ ءَ اَنت داں آ چہ زانت ءُ سنچ ءَ بے بھر ءُ چہ زورگیری ءُ راجی مول ءَ بے سما بہ بہ اَنت۔
دوھزار ءھشت ءَ «آغاز حقوق بلوچستان پیکج » ءِ نام ءَ کشگ ءُ چگل دیگ ءِ شوندات بندات کنگ بوت۔ھمے شوندات ءِ پد ءَ سدھاں بلوچ نودربر زور بیگواھی ءَ پد شھید کنگ بوت۔مروچی ھم سداں بلوچ نودر بر پاکستانی مھترھند ءِ زنداناں بندیگ اِنت کہ آیانی تہ ءَ نودربر راھشون زاھد ، ذاکر مجید ءُ شبیر ھوار اَنت۔چہ ایشاں ابید شپی (شفیع) ، کمبر چاکر، الیاس نذر ءُ کامریڈ کیوم رنگیں نودربر راھشون شھید کنگ بیتگ اَنت۔ نودربراں ابید استاد سبا دشتیاری،استاد نذیرمری، استاد الی جان ، سر زاھد آسکانی ءُ رسول جان رنگیں بودیگیں استاد شھید کنگ بیتگ اَنت۔جنین آدمیں استاد زرینہ مری ھژدہ سال پیش زور بیگواہ کنگ بیتگ ، روچ ء مروچی آئی ءِ ھچ گْواہ نیست۔
باسمائیں بلوچ راج!
اے گپ چوش دست ءِ دل ءَ اِنت بلوچستان ءَ برجاھیں آجوئی ءِ زْرمبشت ءِ دیم ءِ دارگ ءَ سرجمیں بلوچستان لشکری بنجل ءُ پانگس جوڑ کنگ بیتگ۔گام گام ءَ لشکری ءُ نیم لشکری توانانی بنجل ءُ پانگس اَنت۔ھمیشانی پجیگ ءَ پاکستانی لشکر ءِ مردم کشیں رمب ءِ کارمند دینا داسی گرد اَنت۔چہ اے درسیں کردگاراں زانگ بیت کہ بلوچستان ءَ وانگجاھاں کئے بن دیگ ءَ اِنت ءُ کجام توان اِنت کہ آ بلوچستان ءِ ورنا ءُ چکاں چہ زانت ءُ سنچ ءَ زبھر کنگ ءِ کوشست کنگ ءَ اِنت۔
پرمنگھیں بلوچ راج!
مروچی بلوچستان گزرانک ءُ وانگ ءِ تک ءَ پدمنتگ اِنت۔اے پدمنتگی ءِ بن پاکستان ءِ لٹ ءُ پل ءُ نوکابادی تْرام اِنت کہ مارا ھرچ وڑ ءَ پدمنتگ دارگ لوڑ ایت داں ما آئی ءِ زورگیری ءَ بہ من این ءُ بلوچ پہ مدامی چیردستی ءِ مین ءَ بہ بک ایت۔چہ اے مین ءَ درکپگ ءَ بلوچ راج ءِ باسمائیں ورنایاں گھگیری ءِ راہ زرتگ ءُ دیمونی دیگ ءَ اَنت۔پجیگ ءَ وانگ ھر وھد ءَ پہ ھرچ را ج ءَ جنگ ابزارے (دزلٹ /ہتھیار/سلاہ) ءِ بستار دار ایت۔اگاں راجے چہ زانت،وانگ ءُ سنچ ءَ زبھر کنگ بہ بیت آ راج گْوستانک ءِ نھاریں گْورماں کپ ایت ءُ بیگواہ بیت۔باکستان نہ لوٹ ایت کہ بلوچ ورنا بہ وان اَنت، باسما بہ بہ اَنت۔بلے درسیں جیڑہ ءُ نوکابادی وانگ ءِ وڑ ءُ پیماں ابید ھم مروچی مارا وانگ ءِ سر ءَ دلگوش گْور کنگی اِنت داں ما وتی راجی آجوئی زْرمبشت ءِ مھریں بنپدے جت بہ کن ایں۔