بیست سال ءَ زْرمبشت ءِ برجاھی مزنیں سوبمندی یے-بی این ایم ءِ راھشونانی گوں باسکاں تْران
پاکستانی واکدارانی سر پر بیگ ءَ نہ اِنت کہ بلوچستان ءِ آجوئی ءِ زْرمبشت ءِ دیم ءَ چوں بہ دار اَنت پمیشکا ھمروچ وتی شونداتاں مٹ کنگ ءَ اَنت۔گمان نہ بیتگ بلے اوگانستان ءَ رجیم ءِ مٹ بیگ ءِ سیت پاکستان ءَ نہ رس اتگ۔بلوچاں وتی دژمنانی گیش کنگ ءِ جاہ ءَ چہ پاکستان ءَ آجو بیگ ءَ تْرام ءُ ھم سنتیں جھد کنگ لوٹ ایت۔
اے گپ بلوچ راجی زْرمبشت ( بی این ایم) ءِ سرکماش ڈاکٹر نسیم ءُ سرکارگشاد دل مراد ءَ گوں ’جھدکارانی پتر‘ ءِ رد ءَ برجم بیتگیں ماھی مراگش ءَ گل ءِ باسکاں گپ جنان ءَ گْوشتگ اَنت۔
دو ادار ءِ اے مراگش ءَ گل ءِ کمک سرکماش ڈاکٹر جلال ءَ گل ءِ ھیلکاری مراگشانی رد ءَ باسکاں گْوشتگ گل ءِ ھمے کارانی تْرامگیج ءَ بنزہ ءُ بنجاھی تک ءَ پہ گل ءِ باسکانی ھیلکاری ءُ دربرگ ءَ شور کرتگ۔گچینی بنگپانی سر ءَ نکان ساچی ءِ کار بنا کنگ بیتگ ءُ بنداتی پنچ کتاب ساڑی اِنت چہ ایشاں سئے کتاب شنگ بیتگ ءُ آ دگہ زیت شنگ کنگ بہ اَنت۔
آئی ءَ گْوشتگ اے مراگشانی برجم دارگ ءِ آئینی ڈبو من ءَ گون اِنت ءُ منی گیشتر زور باسکانی بودشت ءِ تہ ءَ گیشی آرگ ءِ سر ءَ اِنت۔
مراگش ءِ گڈی بھر ءَ جست ءُ پرس ءُ شرگداری ءِ ونڈ ءَ باسکاں گل ءِ کار ءُ گل ءِ دیمروی ءِ سر ءَ وتی پیش نھاد داتگ اَنت ءُ جست کرتگ۔جستانی پسو گل ءِ سرکماش ، سرکارگشاد ، مزن کمک سرکماش ءُ رسانکدری کارگشاد ءَ داتگ اَنت۔
مراگش ءَ باسکاں گْوشگ بیتگ کہ آ پہ گل ءِ نامدار کنگ ءَ گوں ھمے کار ءِ تْرامگیجانی ھمدستی ءَ کار بہ کن اَنت ءُ چاگردی رسانکدر ءَ پارٹی دیدانک ءَ گیش ءَ گیش مردماں سر کنگ ءَ وت ءَ بھرمند بہ کن اَنت۔
« ما تْرام بیتگیں پمیشکا پاکستان ءَ مئے سر ءَ گیشتر زوراکی کرتگ-ڈاکٹر نسیم »
سرکماش ڈاکٹر نسیم ءَ دمگی ءُ راجی جاورانی سر ءَ گپ جنان ءَ گْوشتگ بلوچستان ءُ اوگانستان ءِ سیادی گْوستانکی اَنت۔سداں سال اِنت کہ وھدے اوگانے جیڑھے ءَ گیپتگ آ بلوچستان ءَ اتکگ ءُ وھدے بلوچے جیڑھے ءَ کپتگ آ اوگانستان ءَ باھوٹ بیتگ، مئے اے سیادی ءِ گْوستانکی پژدرے ھست۔ گمان کنگ بیتگ اَت کہ چہ پاکستان ءِ دزمانجنی ءَ اوگانستان ءَ رجیم ءِ مٹ بیگ ءَ آ اود ءَ بلوچ بگیریں سرکارے کئیت بلے اوگانستان ءَ چہ رجیم ءِ مٹ بیگ ءَ پاکستان ءَ سیت نہ رسگ ءَ اِنت ءُ اوگانستان ءُ پاکستان ءِ میان ءَگر ءُ چیل بنا بیتگ۔
دژمن زانگ ءَ نہ اِنت کہ بلوچ ءُ بلوچستان ءِ دیم ءَ چوں بہ دار ایت۔
ڈاکٹر نسیم
آئی ءَ گْوشتگ 2014 ءِ راجمان پتر ءَ بی این ایم ءِ راجمان پتر ءِ باسکاں اے شور کرتگ کہ بی این ایم وتی سجھیں زور ءُ واک ءَ پاکستان ءِ بگیری ءَ پہ بلوچستان ءِ آجوئی ءَ کارمرد کنت ءُ دمگ ءَ دگہ جنگے وتی سر ءَ نہ زیر ایت۔مارا وتی دژمن گیش کنگی نہ اَنت۔پہ دو گام دیم ءَ روگ ءَ زندگ بیگ المی اِنت۔ درانڈیھ بیتگیں بلوچ ناگیگیں جاورانی دیمپانی کنگ ءَ اَنت بلے آیانی باور ءُ ستک ءَ مھکم اَنت۔
آئی ءَ درائینتگ ما تْرام بیتگیں پمیشکا پاکستان ءَ مئے سر ءَ گیشتر زوراکی کرتگ۔دژمن زانگ ءَ نہ اِنت کہ بلوچ ءُ بلوچستان ءِ دیم ءَ چوں بہ دار ایت۔
آئی ءَ باسک بلوچ آجوئی لوٹوکیں گلانی میان ءَ ھم سنتی ءِ کوشستانی بارہ ءَ سھی کرتگ اَنت ءُ گْوشتگ پیش ءَ ھم بلوچ آجوئی دوستیں واکانی میان ءَ ھم سنتی ءُ ھمکاری ءِ کوشست بیتگ بلے نی گل ءِ تک ءَ پترے جوڑ کنگ بیتگ ءُ اے کوشست رد ءُ بندے دیگ بیتگ داں چہ ایشی ءَ بروردے بہ رس ایت۔ھرچ گلے کہ گوں مئے دیدانک ءَ گوں ما ھمکاری لوٹ ایت ما آئی ءَ وش اتک کن ایں۔اے بارہ ءَ گوں گلاں گپ بیگ ءَ اِنت ءُ گپ دیم ءَ روگ ءَ اِنت۔
« زْرمبشت ءِ یکشل ءَ برجاھی گلی تْرامگیجانی منت اِنت-دل مراد »
بی این ایم ءِ سرکارگشاد دل مراد ءَ گْوشتگ اوگانستان بلوچانی شریں ھمساھگے اَت۔ چہ بٹو ءِ زمانگ ءَ پاکستان اوگانستان ءَ دزمانجنی کنگ ءَ اِنت۔ اے دزمانجنی ءَ چل سال ءَ گیشتر گْوستگ ءُ چہ ایشی ءَ اوگانستان تباہ بیتگ۔ ھما روچ ءَ کہ پاکستان جوڑ کنگ بیتگ چہ ھما روچ ءَ پاکستان ءِ واکداراں اے سما اَت کہ بلوچ ءُ پشتون پاکستان ءِ زورگیری ءَ نہ من اَنت۔پشتونانی دارگ ءَ آ اود ءَ مزھبی گل کارمرد کنگ بیتگ ءُ بلوچستان ءِ سر ءَ تچکے ءَ پاکستانی لشکر واکدار کنگ بیتگ۔اے پاکستان ءِ واھگ اَت کہ اوگانستان ءَ وتی پنچمی استان جوڑ بہ کنت۔انیگیں روچاں اوگانستان ءَ رجیم ءِ مٹ بیگ ءَ پد آیانی واھگ اَت کہ پہ بلوچاں زمین نز آرگ بہ بیت۔بلے انیگیں اوگان سرکار ءِ ھم راجدوستیں رنگے ھست آیاں چہ پاکستان ءِ سیتاں اوگانانی سیت دوستر اَنت۔
پاکستان ءِ واکدار اے آسر ءَ سر اَنت کہ نی پاکستان گوں اے شوانداتاں دیم ءَ شت نہ کنت۔
دل مراد
آئی ءَ گْوشتگ اے رندی بلوچ زْرمبشت ءَ یکشل ءَ بیست سال سرجم کرتگ کہ ایشی ءِ آسرینگ ءَ پاکستان ءَ زوراکی ءِ ھمک آپ گواز کرتگ۔بی ایس او ءِ سر ءَ گوں جار ءُ بی این ایم ءِ سر ءَ ابید جار ءَ پابندی جنگ بیتگ ۔ھزارانی کچ ءَ بلوچ زور بیگواہ اِنت ءُ ھزاراں کشگ بیتگ بلے راجی تْرامگیجانی منت ءَ اے زْرمبشت برجاہ اِنت۔نی اے زْرمبشت مردمے ءِ نہ اِنت بلکیں تْرامگیجی بنیاد ءَ تْرام اتگ۔مردم مر اَنت ، دم بر اَنت، سودا بازی کرت کن اَنت،چہ وتی دیدانک ءَ پدکنز اَنت بلے تْرامگیج وتی دْرچ ءَ برجاہ دار اَنت۔انیگیں آجوئی ءِ زْرمبشت گلی تْرامگیجانی منت ءَ برجاہ اِنت۔
آئی ءَ گْوشتگ ما اے دراجھیں باریگ ءَ وتی راہ ءُ رند مٹائینتگ اَنت بلے وتی شوندات ءِ تہ ءَ ھچ رنگیں مٹی نے آؤرتگ بلے مئے جھد ءَ پاکستان لاچار کرتگ کہ وتی شونداتاں مٹ بہ کنت۔پاکستان ءِ واکدار اے آسر ءَ سر اَنت کہ نی پاکستان گوں اے شوانداتاں دیم ءَ شت نہ کنت۔پاکستان ءِ واکدار ءُ لشکری سروگاناں پیش ءَ زوربیگواھی نہ من اتگ اَنت بلے نی آ من اَنت پاکستان ءِ زورگیری ءِ برجاہ دارگ ءُ ماں بلوچستان ءَ مردم زور بیگواہ کنگ بیتگ اَنت۔