چہ بلوچ راجی زْرمبشت ( بی این ایم) جرمنی (آلمان) تک ءِ نیمگ ءَ بیئلپیلڈ ءُ جرمنی ءِ بنجاھی شھر برلن ءَ ماں بلوچستان ءَ جنینانی سر ءَ مھترھندی زوراکی ءُ ماھل ءِ دزگیری ءِ بگیری ءَ زھرشانی کنگ بیتگ۔
اے زھرشانیاں جنین ، چک ءُ جرمنی ءَ نندوکیں پرکاریں کارکناں بھر زرتگ۔اے دم ءُ درگت ءَ زھرشانی کنوکاں پاکستانی لشکر ءِ دست ءَ سیاسی باسک ءُ ماھل ءِ زور بیگواھی ءِ بگیری ءَ اوگام جتگ۔
بی این ایم جرمنی تک ءِ سرکماش ازگر الی ءَ گوں بھر زیروکاں گپ جنان ءَ گْوشتگ گْوستگیں دو دھک اِنت کہ پاکستانی لشکر ءُ چیریں واک ماں بلوچستان ءَ مردمی اگبالانی لپاشگ ءَ گون اَنت۔ھزارانی سیاسی ءُ چاگردی باسک داں کہ انچائیں شھرمنند ھم ابید چہ آیانی واھگ ءُ گوں زور ءَ بیگواہ کنگ بیتگ اَنت ءُ ھزاراں مردم پاکستانی لشکراں کشتگ۔
آئی ءَ گْوشتگ یورپی سنت ءِ ڈیھ پاکستان ءِ بارہ ءَ وتی شونداتانی سر ءَ چار ءُ بہ چار بہ کن اَنت۔پاکستان ماں بلوچستان ءَ مردمی اگبالاں لپاشگ ءَ اِنت۔جنین ءُ چکاں ، آمیدگس ءَ نہ یارگ ءُ روچانی روچ آزارجاھاں بند کنگ ءَ اِنت۔رشیدہ زھری 13 روچ آزارجاھاں بند کنگ بیتگ۔سی ٹی ڈی ءَ ماھل 17 پروری ءَ زور بیگواہ کنگ ءَ پد دروگیں بھتام جتگ ءُ دزگیری من اتگ ءُ چہ ھما روچ ءَ زانگ نہ بیت کہ آ کج ءَ اِنت ءُ گوں آئی ءَ چی کنگ بیگ ءَ اِنت۔
آئی ءَ گْوشتگ پاکستان بلوچ سیاسی واکانی توار ءِ نگٹ کنگ ءَ بلوچ جنیناں نشانگ کنگ ءَ اِنت۔بلے پاکستان گوں اے کارپداں وتی چیریں پندلاں بھ سوبمند نہ بیت۔ بلکیں اے گامگیج وتی راجی مولانی رسگ ءَ بلوچ راج ءِ ھاٹیگ ءُ واھگ ءَ گیشتر توانمند کن اَنت۔
بلوچ راجی زْرمبشت ( بی این ایم) جرمنی تک ءِ کمک کارگشاد شرھسن ءَ گْوشتگ پاکستان بلوچستان ءَ مردمی اگبالانی بدیں رنگے ءَ لگتمالی کنگ ءَ اِنت۔پاکستانی لشکر ناشرکاریں لشکرے، ایشی ءَ 1971 ءَ ماں بنگلہ دیش ءَ مردمی اگبال لپاشتگ اَنت ءُ نی ھمے رنگ ءَ پاکستانی لشکر بلوچستان ءَ جنیناں جنسی ءُ بالادی آزار ءِ نشانگ کنگ ءَ اِنت۔
بلوچ راجی زْرمبشت ( بی این ایم) ءِ باسک ایمان ءَ گْوشتگ بلوچستان ءِ جیڑہ 1948 ءَ ھما وھد ءَ بندات بیتگ وھدے پاکستانی لشکر ءَ دمگ ءِ سر ءَ گوں زور ءَ وتی واکداری منڈ اتگ۔ چہ ھما روچ ءَ بلوچ پہ وتی آجوئی ءَ جھد ءَ اِنت ءُ پاکستانی لشکر آیاں گوں زور ءُ آزار دارگ ءِ کوشست کنگ ءَ اِنت۔جاور ھما وھد ءَ ھراب تر بیتگ اَنت وھدے پاکستانی سرکار ءَ بلوچانی سر ءَ ناھژدری ئیں زور کارمرد کرت ءُ مردمانی زور بیگواھی، چہ آمیدگس ءِ پرمان ءَ ڈن کوش ءُ آزار دیگ بنا کرت۔
آئی ءَ گْوشت بلوچستان ءَ مردمی اگبالانی لپاشگ بیمناکیں کچ ءَ سر اِنت۔پاکستانی لشکر ءُ چیریں واکاں ھزاراں بلوچ کشتگ ءُ آوار جتگ،آ ماں آزارجاھاں آزار داتگ ءُ آیانی کھول ترسینتگ اَنت۔
چاگردی رسانکدر ءِ پرکاریں باسک ھداھیرالاھی ءَ گْوشتگ بلوچ جنین ءُ مئے برات پہ بلوچ راجی آجوئی ءِ زْرمبشت ءِ آسر کنگ ءَ زندانانی تہ ءَ کنگ بیتگ اَنت۔بلے زورگریں مھترھند داں دیر ءَ بلوچستان ءِ سر ءَ وتی زورگری ءَ برجاہ داشت نہ کنت۔
آئی ءَ گْوشتگ دیر اِنت برجاھیں مردمی اگبالانی لپاشگ ءِ سر ءَ راجانی سنت بلوچستان ءَ دزمانجنی بہ کنت ءُ یورپی سنت پاکستان ءُ آئی ءِ لشکر ءِ کمکاں بند بہ کنت۔