لندن: 27 مارچ 2023 ءَ بلوچ راجی زْرمبشت (بی این ایم) برتانیا تک ءَ بلوچستان ءِ سر ءَ پاکستان ءِ زورگری ءِ روچ ءَ ماں لندن ءَ برتانیا ءِ سروزیر ءِ گس ءِ دیم ءَ زھرشانی کرتگ ءُ پنتاک بھر کرتگ۔
اے دم ءُ درگت ءَ برتانیا ءِ سروزیر ءِ گس ءَ دلگوشی تاکے (پٹیشن) ھمے دیگ بیتگ ، آئی ءِ تہ ءَ بلوچستان ءِ زورگری ءِ گْوستانک ءِ راستی پدر کنگ بیتگ ءُ آیانی سر ءَ زور دیگ بیتگ کہ آ بلوچستان ءِ سر ءَ بیوکیں زوراکیانی بگیری ءَ زیت گامگیج بہ زیر اَنت۔
اے روچ بلوچ راجی زْرمبشت ءِ نیمگ ءَ ھمک سال سیاھیں روچ ءِ بستار ءَ یات کنگ بیت پرچا کہ ھمے روچ ءَ 1948 ءَ پاکستان ءَ بلوچستان زور گیپتگ۔
زھرشانی ءِ میان ءَ بی این ایم ءِ کستریں کمک کارگشاد ھسن دوست ، سندی جھانی کانگریس ءِ کارگشاد ڈاکٹر لکو لوھانہ ، بی این ایم ءِ بنجاھی پتر ءِ باسک نیاز، بی این ایم برتانیا تک ءِ سرکماش منزور، بی این ایم برتانیا تک ءِ گْوستگیں سرکماش ھکیم ، ابداللہ، بی ایچ آر سی ءِ کمبر مالک ءُ مھناز ءَ گوں زھرشانی کنوکاں تْران کرتگ۔
ھمے درگت ءَ بی این ایم ءِ راھشوناں گْوشتگ بی این ایم ءِ بلوچستان ءِ ناراھیں زورگری ءِ سر ءَ سنچ ودی کنگ ءِ یکشلیں کوشست اے یات ءَ گیج اَنت کہ بلوچ راج مزدانک ءُ آجوئی لوٹ ایت۔
زھرشانی ءَ بھر زیروکیں مردماں بلوچسان ءِ سر ءَ پاکستان ءِ ناراھیں زورگری ءُ بلوچستان ءَ پاکستانی لشکر ءِ زوراکیانی بگیری ءَ اوگام جتگ۔
زھرشانی کنوکاں گْوشتگ برتانیا ءِ کمک ءَ پاکستان ءَ بلوچستان زور گیپتگ ءُ چہ ھما روچ ءَ بلوچانی سر ءَ زوراکی کنگ ءَ اِنت۔برتانیا ءُ جھان ءِ دگہ ڈیھانی زمہ واری بیت کہ آ بلوچ راج ءَ چہ اے زوراکیاں پھریزگ ءَ وتی مردمی ڈبو ءَ پیلو بہ کن اَنت ءُ بلوچستان ءِ آجوئی ءِ سبزینگ ءَ بلوچ راج ءِ کمک بہ کن اَنت۔
آیاں گْوشتگ پاکستان ءَ وھدے کہ بلوچستان زورگیپتگ گڑا اے زورگیری ءِ بگیری ءَ بلوچ راج ءَ گھگیری بنا کرتگ۔بلوچاں پہ وتی آجوئی ءَ چوناھیں ھم پارستے کارمرد کرتگ پاکستان ءَ گوں زور ءُ زوراکی پسو داتگ۔پرایمنیں سیاسی باسک زور بیگواہ ءُ کشگ بیتگ اَنت۔ آجوئی ءِ لوٹ ءِ پد ءَ بلوچ راج مچی ڈنڈ دیگ بیگ ءَ اِنت۔بلوچ راج ءِ سیاسی راھشونانی مزنیں تکے پاکستانی لشکر ءَ زور بیگواہ کنگ ءَ پد آزار جاھاں بند کرتگ یا شھید کرتگ اَنت۔
آئی ءَ گْوشتگ بلوچ راج ءَ چہ وتی تْرامیں جھد ءِ پارست ءَ چہ پاکستان ءَ آجو بیگ لوٹ ایت۔ھمے بلوچ راج ءِ مانشت، دمگ ءِ ساکمی ، ایمنی ءُ دیمروی ءِ تیوکٛں راہ اِنت۔ جھان پہ ایمنی ءِ برجاھی ءَ آزات بلوچستان ءِ زرمبشت ءِ پلہ مرزی بہ کنت۔