بلوچ راجی زْرمبشت (بی این ایم) ءِ سرکماش ڈاکٹر نسیم ءَ گْوشتگ کہ بلوچستان چہ پاکستان ءِ زورگری ءُ زوراکیانی پنچگ ءَ در کپگ ءُ آجوئی ءِ نیمگ ءَ راھی اِنت۔آئی ءَ اے گپ گوں انڈیا نریٹب ءِ اھوالکار راول کمار ءَ ماں یک اسپیس نیادے ءَ درشانتگ اَنت۔
ڈاکٹر نسیم ءَ گْوشتگ پاکستان ءَ ’سھر ءُ ھون ءِ شوندات‘ زرتگ ، بزاں آ بلوچانی ھون ءَ ریچگ ءُ بلوچستان ءِ مڈیاں پلگ ءَ اِنت۔
آئی ءَ گْوشتگ بلوچ چہ وتی مڈیاں ونڈ نہ لوٹگ ءَ اِنت بلکیں وتی زمین ءَ لوٹگ ءَ اِنت کہ آ اود ءَ آ وتکواک ءُ آجوئیں راجے ءِ بستار ءَ زند گوازینت بہ کنت کہ گْوستانکی راستی ءُ میان استمانی راھبندانی بنیاد ءَ آئی ءِ مول ءُ اگبال اِنت۔
آئی ءَ گْوشتگ بلوچ زْرمبشت درائیں تک ءُ پھناتاں تْرام اِنت ، ایشی ءِ تہ ءَ سیاسی گھگیری ءُ درانڈیھ ءَ نشتگیں سیاسی باسکانی پرارزشتیں کردے ھست۔آئی ءَ گْوشتگ باز بلوچاں بلوچستان یلہ داتگ ءُ جتائیں ڈیھاں شتگ اَنت ، آ ھمود ءَ بلوچ زْرمبشت ءِ بھر اَنت۔
آئی ءَ گوں دلجمیں گالوارے ءَ درائینتگ بلوچستان آجوئی ءِ نیمگ ءَ جزگ ءَ اِنت ، بلے کہ آ اے گْوشت نہ کنت کہ چنت روچ ، ماہ ءُ سالاں پد بلوچ منزل ءَ سر بیت۔
آئی ءَ گْوشتگ اے مردمانی زْرمبشت اِنت ، ایشی ءَ مردمانی مزنیں تکے پلہ مرزی کنگ ءَ اِنت۔آئی ءَ گْوشتگ بلوچ راج چیردستی ءُ زوراکی ءَ چد ءُ گیش اوپار کرت نہ کنت۔
’بلوچ راھشون ءِ پاکستان ءُ چین ءِ بگیری ءَ چہ میان ءَ استمان ءَ دزمانجنی ءِ لوٹ‘
بلوچ راجی زْرمبشت ( بی این ایم) ءِ سرکماش ڈاکٹر نسیم ءَ میان استمان ءُ دمگی واکانی سر ءَ زور داتگ کہ آ دزمانجنی بہ کن اَنت ءُ پاکستان ءُ چین ءَ چہ بلوچستان ءِ لٹ ءُ پل ءُ مردمانی سر ءَ زرواکی ءَ بہ دار اَنت۔ آئی ءَ گْوتگ بلوچستان ءِ آجوئی پہ بلوچاں وشیں زندمان ءُ ایمنی کار ایت ءُ سرجمیں دمگ ءِ سر ءَ پرانکی ئیں سان ایر کنت۔
آئی ءَ گْوشتگ چین پاکستان گزارانکی راھداری (سی پیک) مزنیں بند ءُ ساچی شورے کہ چین ءِ سنکیانگ ءِ دمگ ءَ گوں بلوچستان ءِ بندن گوادر ءَ ھمگرنچ کنت۔ اے شور ماں بلوچستان ءَ لٹ ءُ پل، لڈ ءُ بار ءُ جیڑھانی پارست اِنت۔آئی ءَ گْوشتگ بلوچ راج چین پاکستان ھم سنتی ءِ بگیری ءَ پہ وتی آجوئی ءُ مڑاہ ءَ مڑگ ءَ اِنت ، اے جاور آئی ءَ چہ آجوئی ءَ پیسرگیں بنگلہ دیش ءِ جاوراں ھم سنگ لیک اتگ۔آئی ءَ گْوشتگ بلوچستان آجوئی ءِ نیمگ ءَ جزگ ءَ اِنت ءُ چہ ایشی ءَ سرجمیں دمگ ءَ سیت رس ایت۔
’ آجوئی ءِ زْرمبشت ءِ بارہ ءَ جست ءُ بی این ایم ءِ سرکماش ءِ پسو‘
بلوچ راجی زرمبشت (بی این ایم) ءِ سرکماش ڈاکٹر نسیم ءَ اے گپ ءُ تْران ءِ تہ ءَ بلوچ آجوئیِ زْرمبشت ءِ بارہ ءَ جستانی پسو ھم داتگ اَنت۔ آئی ءَ آجوئی لوٹوکیں گلانی بلوچستان ءَ پرکار بیگ ءِ راھبند، بلوچ ءُ پشتون زْرمبشتانی میان ءَ سیادی ءُ جیڑھانی تہ ءَ مڈیانی کرد ءِ بنگپ ءَ جستانی پسو داتگ اَنت۔
آئی ءَ گْوشتگ پاکستان ءِ ’ کشگ ءُ چگل دیگ‘ ءِ شوندات ءِ پد ءَ بی این ایم ءُ دگہ گلانی ماں بلوچستان ءَ باسک چیر اَنت۔آئی ءَ گْوشتگ پہ آجوئی ءِ زْرمبشت ءَ مردمانی پرکار کنگ ءَ ’ سیل سسٹم ‘ ٹاھینگ بیتگ۔
آئی ءَ گْوشتگ بلوچ زْرمبشت پہ مادن ءُ مڈیاں نہ اِنت بلکیں بلوچستان ءِ آجوئی ءِ زْرمبشت اِنت۔
آئی ءَ گْوشتگ بلوچ راج وت ءَ چہ پاکستان ءِ زوراکی ءُ لٹ ءُ پل ءَ پھریزگ لوٹ ایت۔ بلوچ زْرمبشت چہ پاکستان ءَ پیش ءُ ماں بلوچسان ءَ مادن درکپگ ءَ پیش ھم ھست بیتگ۔