بی این ایم ءِ پنتاک : پاکستان ءِ ناپاداریں جوھری بستار ، پہ دمگ ءِ پاداریں ایمنی ءَ ترسے
’ دمگ ءِ پاداریں ایمنی ءِ مانزمان بلوچستان ءِ آجوئی اِنت، مئے زْرمبشت ءِ پلہ مرزی ایمنی ءُ مردمگری ءِ پلہ مرزی اِنت۔‘
28 مئی 1998 ءِ سھب انچائیں سھبے نہ اَت ، بلوچستان ءِ تیاب ءَ گر داں سلیمان کوہ ءِ ھند ءُ دمگاں مردم گوں بھمناگیں بے تاھیری ءَ واب ءَ پاد اتک اَنت، گیشتریں مردمانی چماں گیپتگ اَت۔پاکستان انچیں مھترھندے کہ رسانکدر ئِے نگٹ کرتگ ءُ داشتگ ءُ بلوچستان کہ انی ھم رسانکدر ءِ کبو (جھلانکی / زر ءِ ھما جاہ کہ سک جھل اِنت) ءَ کپتگ آ روچاں وانگ ءُ زانگ ءِ باندات ءَ گیشتر پدمنتگ اَت، رھوتی پارست نیست اَت۔کس ءَ اے گپ دلگوش نہ کرت کہ چہ راسکوہ ءَ بیتگیں جوھری چکاسانی تابکاری شھماں راسکوہ ءُ آئی ءِ کش ءُ کراں بدیں سان کپتگ۔انی ھم بلوچستان ءُ گچینی ھمے دمگاں شیمک ءُ پوست ءِ نادراھی تالان اِنت، کہ جوھری چکاسانی سان گْوشگ بہ اَنت۔پاکستانی رسانکدر ءَ دروگ بستگ کہ راسکوہ بے آبادیں دمگے ، بلے راسکوہ ءِ چاریں نیمگ ءَ ھلک ءُ میتگ اَنت، چہ ایشی ءَ ابید راسکوہ ءِ کوھاں ساھدار، کور ءُ شیپ ھست اَنت۔چہ جوھری تْراکاں کوہ ءِ مزنیں بھرے اسپیت بوت۔
آ وھدی پاکستان ءَ مسلم لیگ نون ءِ سرکار اَت، مزنیں کچے ءَ گچیندانک (ووٹ) گرگ ءُ سروزیر گچین بیگ ءَ پد نوازشریپ وت ءَ توانمندیں واکدارے زانگ ءَ اَت، اتاء اللہ مینگل ءِ گل بی این پی ءِ ماں بلوچستان ءَ کاسگ چٹیں سرکار اَت ءُ اتاء اللہ ءِ بچ ’ اکترمینگل‘ مزن وزیر اَت ، وھدے کہ نوازشریپ پہ جوھری تْراک ءِ جاہ ءِ چارگ ءَ اَتک آئی ءِ گاڑی ءِ ڈرائیور اکتر مینگل وت اَت۔ بلوچستان ءَ راجی زْرمبشت پنھان اَت پمیشکا پاکستانی لشکر ءِ ماں اسلام آباد ءُ شال ءَ دو مھکمیں ھم سنتاں اے جوھری چکاسانی اگواز (ماحول) ءِ سر ءَ تابکاری سانانی سیاسی اوگامانی پارست ءَ چیر ترینگ ءَ بنکی کرد پیلو کرت۔
بلے ، 28 مئی 1998ء ءَ پد جھان مٹ بیتگ اَت۔پاکستان ءَ ایٹمی واک جوڑ کنوکیں سر سْرپی کارست زولپکار الی بٹو ءَ بہ گر داں نوازشریپ ءُ جوھری سائنسدان ابدل کدیر ءَ درا ، پاکستانی لشکر ءِ دست ءَ کم منگہ بوت اَنت۔ اکتر مینگل کہ آ وھدی بلوچستان ءِ مزن وزیر اَت، آئی ءِ واک پچ گرگ بوت اَنت ءُ آ کم منگہ کنگ بوت۔بلے بدبھتی اِنت، داں مروچی اکترمینگل ءَ چہ راج ءَ وتی ھمے کرد ءُ کارانی پھلی نہ لوٹ اتگ ءُ ناں کہ پاکستانی سیاسی سروکاں جوھری چکاسانی بدیں سانانی نیمگ ءَ دلگوش گْور کرت۔ اے چکاس ءِ سیاسی سان ھم دمگ ءُ میان استمانی تک ءَ سھرا اَنت۔پاکستانی لشکر، سرکار ءُ نامی ئیں جوھری سائنسدان ’ابدل کدیر ھان ‘ ءِ سرجمیں جھان ءَ جوھری سلاھانی تالان کنگ ءَ دست مان اِنت۔دھکاں پاکستان ءَ وتی جوھری سلاہ جوڑ کنگ ءِ بودشت پہ گزرانکی سیت ءَ ابزارے ءِ رنگ ءَ کارمرد کرت۔درسیں مسلمانیں ڈیھاں اے دلجمی دیگ بوت کہ پاکستان ءِ جوھری بمب سرجمیں مسلمانیں ڈیھانی دیمپان اِنت۔
جھان ءَ نی انچیں ڈیھے ءِ گْور ءَ ’ایٹم بمب‘ ھست کہ آ اود ءَ مزھبی تواناں چاگرد ءِ جھلانکی ءَ وتی روتگ رسینتگ اَنت ءُ پاکستان ءِ لشکر ءِ تہ ءَ ھم مزھبی ترندروی ءِ مزنیں کچے ءَ سان ھست اَنت۔آ اود ءَ ناں ایوک ءَ جمیئت المائے اسلام ءُ جمات اسلامی رنگیں بنیاد پسندیں مزھبی گل توانمند اَنت بلکیں تھریک ء تالبان پاکستان ، دولت ء اسلامیہ (دائش) ، تھریک ء جھاد پاکستان رنگیں مزھبی گل ھم پرکار اَنت ءُ گوں جنگ ءُ کوش پاکستانی مھترھند ءِ واک ءَ وتی دست ءَ آرگ لوٹ اَنت۔
ھمے ماہ ءَ ، پاکستان تھریک ء انساپ ءِ سروک امران ھان ءِ دزگیری ءِ رد ءَ پاکستان ءَ بیوکیں زھرشانیاں پد ھما جاور ودی بیتگ کہ چہ ایشی ءَ پاکستان رنگیں ھلکیں (غیرمستحکم) ڈیھے ءِ گْور ءَ ایٹم بمب بیگ ءِ گْوستگیں سالاں دم توسیں جستاں پد ءَ سر چست کرتگ۔پاکستان چہ بازیں تک ءُ پھناتاں اے بود ءَ زبھر اِنت کہ مزنیں کچے ءَ بیرانی ودی کنوکیں اے سلاہ ءِ کارمرد آئی ءِ وس ءُ واک ءَ بہ بیت۔پاکستانی مھترھند ءِ سرجمیں واک یک توانے ءَ گون اِنت ءُ آ توان پاکستان ءِ لشکر اِنت، کہ جھان ءِ چہ درساں گیش نا پیشہ ورد ءُ گوچلیں لشکر اِنت۔پاکستانی لشکر ءَ وانگجاہ دستیگ کرتگ اَنت ءُ مردمانی سنچ تباہ کرتگ۔پاکستانی چاگرد پہ زانت زانشتی تک ءَ پدمنتگ کنگ بیت داں پاکستانی لشکر گوں وتی گوچلیں مردمانی رمب ءَ مھترھند ءِ سر ءَ پرواک بہ بیت۔
پاکستان انچیں ڈیھے کہ آ اود ءَ بھ راجمستری مھکم نہ بیتگ۔پاکستانی لشکر ءَ گوں گوچلیں مردمانی رمبے ءِ پارست ءَ مھترھند ءِ درسیں تْرامگیج دستیگ کرتگ اَنت۔پاکستانی لشکر ءِ ’تبلیگیانی‘ پجیگ ءَ درسیں سیاسی گلانی تہ ءَ مردم ھست اَنت۔ پیش ءَ پاکستان تھریک ء انساپ (پی ٹی آئی) ءِ سرکار ءِ سر ءَ اے تچکیں بھتام بیتگ کہ آ پاکستانی لشکر ءِ راستیں دست ءِ کرد ءَ پیلو کنگ ءَ اِنت بلے مروچی پی ڈی ایم ( پاکستان ڈیمو کریٹک پرنٹ : مسلم لیگ نون، پیپلز پارٹی ، جمیئت المائے اسلام ، بلوچستان نیشنل پارٹی ءُ دگہ گلانی سنت) ءِ سرکار کہ پی ٹی آئی سرکار ءِ بگیری ءِ زْرمبشت ءِ پد ءَ واکدار جوڑ بیتگ ، گْوست ءَ پاکستانی لشکر ءِ سر ءَ ایرادگروک اَت۔مولانا پزل الرھمان ءُ نوازشریپ ءَ پاکستانی لشکر ءِ سر ءَ ایراد گیپتگ اَت کہ آ سیاسی جیڑھانی تہ ءَ دزمانجنی کنگ ءَ اِنت بلے پاکستانی لشکر ءِ لوٹ ءُ منگ ءَ پد انچوش کہ اے رمب ءَ واکداری ءِ تہ ءَ بائیورای رس اِت ، اے پاکستانی لشکر ءِ پلہ مرزی ءَ چہ پیسرگیں واکداراں گیشتر مردمی اگبالاں لپاشگ ءَ اِنت۔شریں وڑے ءَ گندگ بیت کہ پاکستانی لشکر شترنج ءِ دوئیں کنچ ءَ وت لیب ءَ اِنت ءُ سجھیں مھرگ آئی ءِ وتی دست ءَ اَنت۔
پی ٹی آئی کہ پاکستانی لشکر ءَ پہ وتی سرجمیں پلہ مرزی ءَ جوڑ کرتگ اَت، پاکستانی لشکر کہ آئی ءِ تہ ءَ جتائیں سیاسی لیکہ داروکیں انجمن پرکار اَنت آ اود ءَ اے گل مزنیں کچے ءَ بھر ءُ بانگ ءِ پارست اِنت۔پاکستانی لشکر، آمیدگس ءُ سول اسٹبلشمنٹ ءِ مزنیں بھرے امران ھان ءِ پلہ مرزی کنت۔پنجاب کہ آئی ءَ پاکستان ءِ مزن واک دست ءَ اِنت اے جاوراں وت ماں وتی جنگ ءِ نیمگ ءَ تیلانک داتگ۔امران ھان ءِ دزگیری ءِ پدگوانک ءَ پی ٹی آئی ءِ باسکاں ھمے رنگ ءَ کہ پاکستانی لشکر ءِ ماڑی ءُ مڈیانی سر ءَ ارش کرتگ ءُ ھمے پیم کہ سرکار ءُ لشکری واکداراں مردمی اگبال ءُ راھبند لپاش اتگ اَنت۔اے کارپد میان استمانی تک ءَ بے تاھیری ءِ انگیز بہ بہ اَنت۔
مھترھندے ءَ راھبند ءُ مردمی اگبال منگہ دیگ مہ بہ اَنت آ اود ءَ چہ مردمانی آشوب ءَ چوناھیں ھم وھدے ءَ ناایمنی ءُ بے تاھیری ودی بوت کنت۔مردم امران ھان ءِ پلہ مرزی ءِ نیمون ءَ وتی زھر ءِ درانگازی کن اَنت یا تھریک ء لبیک پاکستان (ٹی ایل پی) رنگیں مزھبی گلانی پرشت ءُ پروشیں زھرشانیانی تہ ءَ وتی ناوشی ءَ پدر کن اَنت، ایشی ءِ بن مھترھند ءِ گوں مردماں ناراھیں کردگار اِنت۔اگاں مردمی تک ءَ اے ناوشی ءِ درشان ءِ درسیں راہ ءُ در بند کنگ بیت اَنت یا گوں زور ءَ مردم چہ زھرشانیاں دارگ بہ بہ اَنت،مزھبی سلاھبندیں گل مردماں اوست ءِ دگہ درے ءِ بستار ءَ وتی نیمگ ءَ چک اَنت۔بزاں چہ اے جاوراں درکپگ ءِ تیوکیں راہ جھل ءِ پیشنھاد اِنت ، اگاں ناں دمگ ءَ ودی بیوکیں جاور سرجمیں جھان ءَ تباھی ءِ کنڈ ءَ بارت۔
مروچی بلوچستان ءَ اے جوھری چکاسانی 25 سال سرجم بیتگ، پاکستان ءَ اے سالاں بلوچستان ءَ مھترھندی زوراکی گیش ءُ ناراھیں کار تالان تر کرتگ اَنت۔اے زوراکیانی پد ءَ ھزاراں مردم زور بیگواہ ءُ کشگ بیتگ ءُ ھزاراں مردم پہ زور درانڈیھ بیگ ءَ لاچار اِنت۔ایران ءُ اوگانستان ءَ بلوچ درانڈیھانی مزنیں کچے کسمپرسی ءُ ناپھزیں زند گْوازینگ ءَ اِنت۔ آ اود ءَ آیاں جاندْراھی ، وانگ ءُ روزگار رنگیں بنکی آسراتی وتی جاہ ءَ جان ءِ ترس ھم گْور اِنت۔
بلوچ راجی زْرمبشت ( بی این ایم) میان استمانی واکاں دلگوش گْور کنگ لوٹ ایت کہ آ پاکستان ءَ ھلکیں ایٹمی توان ءُ بلوچستان ءِ پجیگ ءَ دگہ راجانی سرزمین ءِ زورگر بہ من اَنت ءُ چہ اے بدیں جاوراں درکپگ ءَ بلوچ ءَ ھرچ وڑ ءَ کمک بہ کن اَنت۔میان استمانی واک چہ پاکستان ءِ جوھری سلاھاں بلیک میل بیگ ءِ جاہ ءَ گوں سنگینی ءَ اے ترس ءَ سرپد بہ بیت کہ ایشی ءَ پاکستان پہ جھان ءِ بیھار ءُ پاتراپ ءَکارمرد کنت۔پاکستان ءَ بیوکیں انگیں ویل ءَ چیردستیں راج ءُ پنجاب ءِ میان ءَ دیری گیشتر کرتگ اَنت۔نی چیردستیں راج سنگینی ءَ گوں ’اسلام آباد‘ ءَ وتی ’واکدار‘ ءُ ’چیردستی‘ سیادیانی سر ءَ جیڑگ ءَ اَنت۔پاکستان ءِ جوھری بمب ایرکنگ ءِ جاھانی سر ءَ میان استمانی تْرامگیجانی واکداری،پاکستان ءِ آسر بیگ ءُ راجی مھترھندانی جوڑ بیگ چہ پاکستان ءِ ’اھریمنی بمب‘ (شیتانی بم) ءِ لوپ ءَ در کپگ ءَ المی ئیں گامگیج اَنت۔ما اے گپ ءَ پد ءَ جن ایں کہ ابید چہ آجوئیں بلوچستان ءَ دمگ ءَ پاداریں ایمنی برجاہ بوت نہ کنت، مئے زْرمبشت ءِ پلہ مرزی ایمنی ءُ مردمگری ءِ پلہ مرزی اِنت۔