گزارش پی ڈی ایپ انگریزی :
شال: بلوچ راجی زْرمبشت ( بی این ایم) ءِ مردمی اگبالانی تک پانک ءَ وتی مئی 2023 ءِ گزارش شنگ کرتگ، آئی ءِ تہ ءَ ماں بلوچستان ءَ زور بیگواھیانی ناگیگیں جاور سھرا کنگ بیتگ۔ گزارش ءَ گْوشگ بیتگ کہ مئی ءَ پاکستانی لشکر ءَ 25 کس زور بیگواہ کرتگ چہ ایشی ءَ ھزاراں بیگواھیں مردمانی کچ نی چد ءُ گیشتر اِنت۔
گزارش ءَ گْوشگ بیتگ کہ بلوچ راج چہ گمان ءَ دریں درد ءُ دورانی دیمپان اِنت، جنین ترسینگ ءُ زور دیگ بیگ ءَ اَنت کہ آ پہ پاکستانی مھترھند ءَ چاریگی بہ کن اَنت۔چاگرد ءَ ترسے ودی کنگ بیتگ کہ چہ ایشی ءَ مردم اے ویلانی سر ءَ گپ نہ جن اَنت ءُ ترک ءُ نک اَنت۔
گزارش ءَ اے ھم گْوشگ بیتگ کہ چہ پاکستانی آزارجاھاں ایوک ءَ 12 کس یلہ کنگ بیتگ۔ زندان ءَ آیاں سسا ءُ بالادی آزار دیگ بیتگ۔اے مردمانی زوربیگواھیانی انگیز ءُ آیانی سر ءَ جتگیں بھتام ھم گْوشگ نہ بیتگ اَنت۔زور بیگواھیانی اے دْرچ ءَ بلوچ راج سسائی ناجوڑیانی آماچ کرتگ۔
درشان ءَ گْوشگ بیتگ کہ پانک ءَ نجمہ ء دلسرد ءِ وتکشی ءِ رد ءَ پٹ ءُ پول کرتگ، پانک ءَ تواربند دست کپتگ چہ ایشی ءَ گواچن بیت کہ پاکستانی لشکر ءِ چیریک ’نوربکش ء ابدلھالک‘ ءَ آ بیھار داتگ ءُ وتکشی ءَ لاچار کرتگ۔
بانک نجمہ ءِ کیس مردمی اگبالانی لپاشگ ءِ بیرانکاریانی سھرائیں درورے۔آ وانندگ ءُ پرکاریں ورنائیں جنینے اَت ، آئی ءَ وتی ھلک ءِ چک بے مزد ءَ وانینتگ اَنت۔ بلے آئی ءَ چہ پاکستانی لشکر ءُ آئی ءِ چیرکانی یکشلیں بیھاراں شزار بیگ ءَ پد وت ءَ کشت۔
پانک چہ میان استمان ءَ لوٹ کنت کہ آ بلوچستان ءَ مردمی تک ءَ بدیں جاورانی گر ءُ دار ءَ زیت مادنیں گامگیج بہ زیر ایت ءُ دزمانجنی بہ کنت۔ پانک میان استمانی گل ءُ مردمی اگبال پانکاں زور دنت کہ آ پاکستان ءِ میارانی سر ءَ آئی ءَ جست بہ کن اَنت ءُ پہ اے زوراکیانی آسرینگ ءَ کار بہ کن اَنت۔
گزارش ءَ گْوشگ بیتگ کہ بلوچستان ءَ پاکستانی لشکر ءِ کارروائیانی تہ ءَ مردمی اگبال لپاشگ بیگ ءَ اَنت، مردم چہ پاکستانی لشکر ءِ موکل ءَ ابید تر ءُ گرد کرت نہ کن اَنت ءُ ھم روچیں لشکرکشیاں مردم دلسیاہ انت۔ھزاراں مردم زور بیگواہ کنگ بیتگ وھدے کہ باز چہ پاکستانی لشکر ءِ زوراکیاں بیران بیتگ۔پاکستانی لشکر ءَ بازیں دمگاں سلاھبندانی رمب ٹاھینتگ اَنت کہ مردم کشیں رمبانی نام ءَ زانگ بہ اَنت ، آ پہ وتی کاراں دز ءُ ٹیکاں گوں وت ھوار کن اَنت ءُ لشکر ءِ گْوشگ ءِ سر ءَ مردماں ترسینگ ، دزی کنگ ءُ داں مردم کشگ ءَ چک ءُ پد نہ بہ اَنت۔
وتی گزارش ءَ پانک ءَ دزبندی کرتگ کہ مردمی اگبالانی چار ءُ گزار کنوکیں پتر پہ بلوچستان ءِ جاورانی پٹ ءُ پول ءُ مردمی اگبالانی سر ءَ گزارش رد ءُ بند دیگ ءَ دیم دیگ بہ بیت۔
پانک ءَ لوٹ کرتگ کہ میان استمانی تْرامگیج (ادارہ) مردمی اگبالانی سکین دیوک، سانمندیں مردمانی پھریزوک ءُ مزدانک ءِ گپ جنوکیں گلانی کمک بہ کن اَنت۔پانک بلوچستان ءِ ناگیگیں جاوراں سھرا کنت ءُ میان استمان ءِ سر ءَ زور دنت کہ آ پہ اے کار ءِ الم کنگ ءَ ھمدستی ءَکار بہ کن اَنت داں مردمی اگبال منگہ دیگ ءُ پھریزگ بہ بہ اَنت ءُ آیانی سر ءَ سرجمی ءَ کاربند بیگ بہ بیت۔
پانک ءَ وتی گزارش ءَ یکسانیں مردمی اگبالانی راھبند ءِ برجاھی ءِ ارزشت ءِ سر ءَ زور داتگ ءُ ھمدستیں کوشست ءُ مھکمیں واھگ ءِ پارست ءَ پربزانتیں مٹی ءِ لوٹ کرتگ۔