بلوچ راجی زْرمبشت (بی این ایم) ءِ سرکماش ڈاکٹرنسیم ءَ گل ءِ راھشون ڈاکٹر دین مھمد ءِ زوربیگواھی ءِ چاردہ سال سرجم بیگ ءِ دم ءُ درگت ءَ وتی درشان ءَ گْوشتگ بلوچستان ءِ مھترھندی زوراکی ءِ دْرچ روچ پہ روچ ترند بیان اِنت۔ڈاکٹر دین مھمد کارزانتیں ڈاکٹر ءُ سیاستدانے۔ آ وھدی آ بی این ایم ءِ بنجاھی پتر ءِ باسک اَت۔آ سیاستدان ءُ راجی جز ءِ پرکاریں مردمے اَت پمیشکا پہ راج ءَ توار چست کنگ ءِ پد ءَ سالانی سال اِنت کہ چیریں زنداناں بند کنگ بیتگ۔
آئی ءَ گْوشتگ پاکستانی چیریں واکاں 28 جون 2009 ءِ نیم شپ ءَ کزدار ءِ ھند ھورناچ ءَ آ وتی کار ءِ سر ءَ چہ نادْراھجاہ ءِ وابجاہ ءَ دزگیر کنگ ءَ پد زور بیگواہ کرتگ۔ زورگریں مھترھند ءِ اے شوندات ءَ بلوچستان ءَ مردمی اگبالانی رد ءَ ناگیگیں جاور ودی کرتگ ءُ چہ چل ھزار ءَ گیش بلوچ آوار جنگ ءَ پد زور بیگواہ کرتگ، ءُ ھمینچو کھول ءِ سرجمیں زندمان تباہ کرتگ۔
ڈاکٹر دین مھمد ءِ کھول ھرچ کہ راھبندی رند ءُ راھے ھست ھما راہ ءَ شتگ بلے چاردہ سال گْوزگ ءَ پد ھم آئی ءِ ھال ءُ ھبر نیست۔ھما روچ ءَ کہ ڈاکٹر دین مھمد آوار جنگ بیتگ اَت آئی ءِ کھول ءَ ھورناچ ءِ پولیس گس ءَ آئی ءِ بیگواھی ءِ گزارش نبشتہ کنائینتگ ءُ پہ آئی ءِ درائی ءَ جھد بنا کرت۔پہ آئی ءِ در کنائینتگ آئی ءِ جنک سمی ءُ مھلب اھوالکاری انجمن ءُ زھرشانیانی تہ ءَ رست ءُ مزن بوت اَنت۔سمی ءَ پہ وتی پت ءِ درا کنگ ءَ چہ شال ءَ بہ گر داں کراچی ءُ چہ کراچی ءَ گر اسلام آباد ءَ دو ھزار ءُ پنچسد کیلومیڑ ءَ پادانی روانک داتگ۔اے چاردھیں سال ءَ آ آمیدگس ، پتر ءُ داں پاکستان ءِ سر وزیر امران ھان ءَ دوچار کپتگ اَنت ءُ چہ دروگیں دلبڈیاں ابید آیاں ھچ نہ رس اتگ۔
مردمی اگبال پانکانی میارباریں بے تواری ءَ بلوچستان ءِ مردمی اگبالانی ناگیگیں جاور گیشتر ناگیگ کرتگ پمیشکا چہ آیاں ھزاراں کھولانی اوست پرشتگ۔ یک رندے پد ءَ مردمی اگبال پانکاں دزبندی اِنت کہ آ بلوچ گلزمین ءِ سر ءَ مردمی اگبالانی ناگیگیں جاورانی سر ءَ اشتاپی ءَ دلگوش بہ کن اَنت ، ڈاکٹر دین مھمد ءُ دگہ ھزاراں بلوچانی درا کنائینگ ءَ مھترھند ءِ سر ءَ زور بہ دئے اَنت ءُ ماں بلوچستان ءَ مردمگری ءِ پھزگ ءَ وتی پرزوریں کرد ءَ پیلو بہ کن اَنت۔