لندن: بلوچ راجی زْرمبشت ( بی این ایم ) ءِ بنجاھی پتر ءِ گْوستگیں باسک ڈاکٹر دین مھمد ءِ زورگریں پاکستانی لشکر ءِ دست ءَ زوربیگواھی ءِ چاردہ سال سرجم بیگ ءَ پد 28 جون ءَ بلوچ راجی زْرمبشت یوکے تک ءِ نیمگ ءَ برتانیا ءِ بنجاھی شھر لندن ءَ آگاھی باوستے ھلائینگ ءُ پنتاک بھر کنگ بیت۔اے میان ءَ بینر ھم جنگ بیتگ کہ آیانی سر ءَ ڈاکٹردین مھمد ءِ شول کشیں زور بیگواھی ءِ پجیگ ءَ بلوچستان ءَ پاکستانی لشکر ءِ دست ءَ مردمی اگبالانی لگتمالی ءِ بارہ ءَ سرپدی ءُ اوگام نبشتگ اَت۔
بی این ایم یوکے تک ءِ نیمگ ءَ برجاہ دارگ بیتگیں آگاھی باوست ءَ بی این ایم یوکے تک ءِ باسک ءُ اگدھدارانی پجیگ ءَ جنین ءُ چکاں ھم بھر زرتگ، آگاھی باوست ءِ میان ءَ برتانیا ءِ سروزیر ءِ گس ٹین ڈاؤننگ اسٹریٹ ، اولڈ ٹریفلگر اسکوائر ءُ برتانیا ءِ پارلیمان ءِ دیم ءَ ھم پنتاک شنگ کنگ بیتگ۔
اے میان ءَ بی این ایم ءِ باسکاں برتانیا ءِ شھریاں ڈاکٹردین مھمد ءِ زورگریں پاکستان ءِ دست ءَ شول کشیں بیگواھی ءُ مردمی اگبالانی پانک جنیں میان استمانی تْرامگیجانی میارباریں بے تواری ءِ سر ءَ آگاھی داتگ، آگاھی باوست ءِ میان ءَ ڈاکٹر دین مھمد ءِ شول کشیں زور بیگواھی ءِ پد ءَ آئی ءِ کھول ءِ سر ءَ بیتگیں سانانی بارہ ءَ مردم سھی کرتگ اَنت۔
ھمے باوست ءَ ’ ماں بے تواری ءَ بیگواھی‘ ءِ بنگپ ءَ بھر کنگ بیتگیں پنتاک ءَ ڈاکٹر دین مھمد ءِ سیاسی ھمبستگی ، سیاسی جھد ءُ زور گریں پاکستان ءِ دست ءَ شول کشیں زور بیگواھی ءِ بارہ ءَ سرپدی نبشتگ اَت ءُ شول کشیں 14 سال ءِ زوربیگواھی ءِ میان ءَ ڈاکٹر دین مھمد ءِ کھول گچینی دوئیں جنک سمی دین ءُ مھلب دین ءِ بے کچیں جھد ءُ لوٹ ھم سھرا کنگ بیتگ اَنت۔
اے باوست ءِ دْرچ ءَ 27 جون ءَ ھم بلوچ راجی زْرمبشت ( بی این ایم) ءِ نیمگ ءَ بولکے ءَ برتانیا ءِ سروزیر ءِ گس ٹن ڈاؤننگ اسٹریٹ ءَ پٹیشنے دیگ بیتگ کہ آئی ءِ تہ ءَ چہ 14 سال ءَ بیگواھیں ڈاکٹر دین مھمد ءَ مزدانک دیگ ءِ لوٹ کنگ بیتگ۔پٹیشن ءَ برتانیا ءِ سروزیر ءِ سر ءَ زور دیگ بیتگ اَت کہ آ بلوچستان ءِ زور بیگواھی ءِ جیڑھاں پاکستانی سرکار ءِ دیم ءَ ایر بہ کنت۔
پٹیشن ءَ بلوچ راجی زْرمبشت ءَ ماں بلوچستان ءَ زور بیگواھیانی پریشان کنوکیں ویلانی گچینی ڈاکٹر دین مھمد ءِ شول کشیں زور بیگواھی ءِ سر ءَ زور داتگ ءُ ڈاکٹر دین مھمد ءِ فرنٹیئر کور ءِ کارمندانی دست ءَ 28 جون 2009 ءَ بلوچستان ءِ ھنکین کزدار ءِ ھند ھورناچ ءِ نادْراھجاہ ءَ کار ءِ میان ءَ زور بیگواھی ءِ بارہ ءَ سرپدی دیگ بیتگ اَت۔
بلوچ راجی زْرمبشت ءُ آئی ءِباسک پہ مزدانک ءَ وتی جنگ ءَ مھکمی اوشتوک اَنت ایشی ءِ مول ماں بلوچستان ءَ یکشل ءَ زوربیگواھیانی جیڑہ ءِ نیمگ ءَ میان استمان ءِ دلگوش ءِ پرینگ ءُ پاکستانی واکداراں جست کنگ ءِ لوٹ ءِ دیم ءَ برگ اِنت۔