بلوچ راجی زْرمبشت (بی این ایم) ءِ جارکش ءَ شھید اکبر ھان بگٹی ءِ شھیدی ءِ ھبدھمی سالروچ ءِ درگت ءَ شھید ستاشانی ندر کرتگ ءُ گْوشتگ کہ شھید اکبر ھان بگٹی یک ھنچیں مزنشانیں ھستی ءِ نام اِنت کہ مرچی ھر بلوچ آئی ءَ وتی ارواہ ءُ گُمان ءِ تہ ءَ مار ایت۔آئی ءَ پیری ءُ نادراھی ءَ ابید گھگیری ءِ راہ گچین کُرت ءُ بلوچ راجی گْوستانک ءِ تہ ءَ دگہ یک درے گیش کُرت۔
انچوش کہ مھراب ھان ءَ انگریز سرکار ءِ اُرش ءِ بگیری ءَ گھگیری کُرت ءُ گْوستانک یک دگہ دْروشُمے دات،ھمے دود ءِ پاسداری ءَ مھراب ھان ءِ رندگیری ءَ شھید اکبر ھان بگٹی ءَ ھم بلوچ راجی زْرمبشت رُژنائی بکش اِت۔
جارکش ءَ گْوشتگ کہ پہ راجدوستی ءِ بنیاد ءَ جُھد کنوکیں سیاسی سروک ءُ کارکن مدام وتی راجی گْوستانک،دودمان ءُ لیکہ ءِ سر ءَ برجاہ بنت ءُ شھیداکبر ھان بگٹی ھم انچیں مردمے اَت کہ آئی ءَ گوں وتی زمین، زبان ءُ دودمان ءَ مھر اَت۔وھدے آئی دیست کہ زمین، راجی ھستی، زبان،دود ءُ ربیدگ تُرس ءِ تہ ءَ اَنت ءُ پاکستان بلوچ سرڈگار ءِ سر ءَ تچکی ءَ آبادی مَٹ کنگ بیگ ءُ بلوچ چہ وتی سرڈگار ءَ کَشگ بیگ ءِ کارشونی دیم ءَ آرگ بیگ ءَ اِنت ءُ گوں لشکری زور ءَ بلوچ راجی ھستی لپاشگ ءُ جتائیں شوربندیانی سر ءَ کار کنگ بیگ ءَ اِنت گڑا آئی ءَ تْرندیں گامگیجے زُرت ءُ وتی جان ندر کُرت ءُ پاکستان ءُ بلوچ ءِ میان ءَ تچکیں کِشکے کَش اِت۔
آئی ءَ گْوشتگ کہ شھید اکبر ھان یک دور چاریں سیاسی سروک ءُ دمگ ءُ جھان ءِ مَٹ بیتگیں شونداتاں شری ءَ سرپد اَت۔آئی ءَ پاکستانی پارلیمان ءِ راہ ھم کارمرد کُرتگ بلے گُڈّی ءَ ھمے نوبت ءَ سربیتگ کہ پاکستان ءِ وتگڑیں پارلیمان ءَ بلوچ راجی جُست گیش ءُ گیوار نہ بیت ءُ پاکستان آؤکیں روچاں پہ بلوچ ءَ سرڈگار ءَ تنک کنت گڑا آئی ءَ گھگیری ءِ راہ گچین کُرت ءُ داں شھیدی ءَ ھمے راہ ءِ سر ءَ پہ مڑاہ برجاہ بوت۔
جارکش ءَ گْوشتگ کہ اکبرھان بگٹی پہ وتی نپ ءُ سیتاں نہ بلکیں پہ راجی ھستی ءُ آجوئی ءَ وتی جان ندر کُرتگ۔شھیدانی کَس بلوچ راج اِنت ءُ بلوچ شھیدانی لوٹ ءُ واھگاں داں منزل ءَ سرکنگ ءَ ھرچ وڑیں دیمونی ءَ چَک ءُ پد نہ بیت ءُ نہ کہ کسے ءَ اے موکل ءَ دنت کہ آ شھیدانی دیمونیانی نام ءَ بلوچ راجی باندات ءِ گون ءَ گْوازی بہ کنت۔