شال : بلوچ راجی زْرمبشت ( بی این ایم ) ءِ مردمی اگبالانی تک ’ پانک‘ ءَ وتی اگست 2023 ءِ گزارش شنگ کرتگ۔
گزارش ءَ اسلام ءِ پیگمبر ءِ بارہ ءَ ناوشیں گپ شکسایگ ءِ دروگیں بھتام ءَ کشگ بیتگیں ابدلروپ برکت ءِ کوش ، روکپتی بلوچستان ءَ ھانی گل ءُ آئی ءِ مرد ءِ کوش، جھل مگسی ءَ کشاورد امداد جویو ءِ کوش، نورھاتون ءُ آئی ءِ چکانی زور بیگواھی، زوربیگواھیں گلام پاروک زھری ءِ زندانی جاہ ءَ کوش ءُ مردمی اگبالانی کارکن ایمان مزاری ءِ دزگیری ءِ بنگپانی سر ءَ شریں وڑے ءَ چمشانک دیگ بیتگ۔
پانک ءِ نیمگ ءَ شنگ کنگ بیتگیں گزارش ءِ رد ءَ پاکستانی لشکر ءَ اگست 2023 ءَ 64 کس چہ آمیدگس ءِ پرمان ءَ ڈن دزگیری ءَ پد زور بیگواہ کرتگ، اے کچ چہ گْوستگیں ماہ ءِ زوربیگواھیں مردمانی کچ ءَ گیشتر اِنت۔گْوستگیں ماہ ءَ 57 کس زور بیگواہ کنگ بیتگ اَت۔پانک ءَ جولائی 2023 زور بیگواھیانی رد ءَ سال ءِ چہ درساں بدتریں ماہ لیک اتگ اَت ، بلے نی اگست 2023 ءِ دیم ءَ اتکگیں گزارش ءَ اگست 2023 زور بیگواھیانی رد ءَ داں انیگ ءَ سال ءِ بدتریں ماہ اَت۔
گزارش ءَ گْوشگ بیتگ کہ اے ھال ءُ ھبر کہ دیم ءَ آیگ ءَ اَنت چہ ایشاں پدر اِنت کہ جاور روچ پہ روچ ھراب بیان اَنت ءُ پاکستان ءِ لشکری واکدار ءُ مھترھندی (ریاستی) شونداتاں چوشیں شبینے نیست کہ آ زور بیگواھیاں آسر کنگ لوٹ اَنت۔مارا ترس اِنت کہ آیوکیں روچاں مردم گری ءِ بگیری ءَ اے میارانی تہ ءَ گیشی کئیت۔
گزارش ءَ گْوشگ بیتگ کہ اگست 2023 ءَ 24 کس چہ آمیدگس ءِ پرمان ءَ ڈن دزگیر ءُ زوربیگواہ کنگ ءَ پد لٹ دیگ ءُ یلہ دیگ بیتگ اَنت ءُ آیاں چوش ھم گْوشگ نہ بیتگ کہ آ پرچا دزگیر کنگ بیتگ اَنت۔
گزارش ءَ اے ترس پدر کنگ بیتگ کہ اے جاوراں کہ پاکستان ءِ گزرانک سکا نزور اِنت ءُ ڈنی سرمایہ گزار گچینی چین ءِ دلچسپیانی پد ءَ پاکستان پہ بلوچستان ءِ مڈیانی لٹ ءُ پلاں نوکیں بائیوار شوھاز ءَ اِنت۔پہ ایشی ءَ آئی ءَ المی اِنت کہ بلوچستان ءِ سیاست ءَ ھما واک کہ دیمتر ءَ ایشی ءِ بگیری ءَ کرت کن اَنت یا گھگیری کنوکیں واکاں نزور بہ کنت داں دیمتر ءَ ابید اڑاند ءَ بلوچستان ءِ مڈیاں گوں باز ڈیھی شرکت ءُ چین ءِ بائیواری ءَ لٹ ءُ پل بہ کنت۔چین بلوچ راجی زْرمبشت ءِ لپاشگ ءُ سیاسی واکانی گر ءُ دار ءَ باز زور دیگ ءَ اِنت چہ ایشاں آیوکیں روچاں مردمی اگبالانی جاورانی ناگیگ بیگ ءِ ترس اِنت۔
پانک ءِ گزارش ءَ دلگوش پرینگ بیتگ مکران ءِ دمگ کہ پہ چین پاکستان گزرانکی راھداری ( سی پیک ) ءَ چہ درساں گیش ارزشت دار ایت پاکستانی لشکر ءِ کارروائیانی مستریں نشانگ اَت، اد ءَ 22 کس زور بیگواہ کنگ بیتگ۔
اگست 2023 ، لشکری کارروائیانی رد ءَ ھم پہ بلوچستان ءَ گْرانیں ماھے اَت ، پانک ءِ گزارش ءِ رد ءَ کیچ ءِ ھند تمپ ءِ جتائیں دمگ ھیرآباد، ھوت آباد، بالیچہ ءُ ناسرآباد ءَ پاکستانی لشکر ءَ باز رند ءَ لشکرکشی کرتگ، مردم دزگیر کنگ ءُ لٹ دیگ ءَ پد یلہ دیگ بیتگ اَنت، اے دزگیریں مردمانی نام پانک ءِ ماھی گزارش ءَ ھوار نہ اَنت۔
گلام پاروک ء مھمد وارس ، کہ 27 اکتوبر 2022 ءَ چہ مستونگ ءَ زور بیگواہ کنگ بیتگ اَت ، آئی ءِ کنٹ 31 اگست 2023 ءَ کلی کمبرانی دگ ءَ چہ انگور ءِ باگ ءَ دست کپتگ۔پانک ءِ گزارش ءَ گلام پاروک ءِ زندانی کوش ءِ سر ءَ جتائیں گزارشے ھوار کنگ ءُ گْوشگ بیتگ ماں زندان ءَ مردمانی کوش ءِ اے شوندات ’چکچینی‘ ءَ ابید دگہ نام دیگ نہ بیت پرچا کہ اے شوندات ءَ ھما مردم نشانگ کنگ بیگ ءَ اَنت کہ وتی راجی پجار ءِ مانشت ءَ زور دیگ ءَ اَنت۔چکچینی ءِ اے شوندات ءِ دارگ ءَ میان اسمانی واکاں گوں گیش اتگیں دیدانک ءَ پاکستان ءِ سر ءَ داں ھما وھد ءَ زور برجاہ دارگی اِنت کہ پاکستانی لشکر وتی زور بیگواھی ءُ زندانی کوش ءِ شوندات ءَ دست بردار نہ بہ اَنت۔ المی اِنت کہ اے اے بارہ ءَ سوڑگ بہ بیت کہ اے جیڑہ ءِ سر ءَ مزدانک ءِ جھانی آمیدگس ءَ پاکستانی لشکر ءِ بگیری ءَ مردمگری ءِ میار ءِ سر ءَ کیس بیت کنت ، پرچا کہ ھرچ وڑیں جیڑھے بہ بیت پاکستانی لشکر ءِ بگیری ءَ پاکستانی آمیدگساں مزدانک (انصاف)کنگ ءِ بودشت نیست۔
پانک ءِ گزارش ءِ رد ءَ ، گْوستگیں ماہ ءَ کیچ ءِ بنجاھی شھر تربت ءَ انگریزی زبان ءِ استاد ابدلروپ برکت پیگمبر ءِ بارہ ءَ ناوشیں گپ جنگ ءِ دروگیں بھتام ءَ کشگ بیتگ، نسیرآباد ءَ بالادستیں مردماں کشاورد امداد جویو کشتگ،ماں روکپتی ءِ بلوچستان ءِ شھر پھرہ ءَ درانڈیھیں زندگْوازینوکیں ’سمیر ءُ رکسانہ ( ھانی گل ) ءِ آوار ءُ کوش ءَ پد کنٹانی بن دیگ ءِ ویل بلوچستان ءَ مردمی اگبالانی بگیری ءِ سھرائیں ویل اَنت کہ بلوچ چاگرد ءِ تہ ءَ اے مارشت ءَ گیش کن اَنت کہ اد ءَ کس پھریز نہ اِنت۔ چہ ایشی ءَ ابید مردمی اگبالانی کارکن ءُ بلوچانی زور بیگواھیانی سر ءَ گپ جنوکیں بلوچیں وکیل ایمان مزاری ءِ دزگیری ءُ چہ پاکستانی لشکر ءِ نیمگ ءَ آئی ءَ بیرگری ءِ کارروائیانی نشانگ کنگ ھم پہ بلوچ ءِ اگبالاں چست بیتگیں توارانی گٹ گیر کنگ ءِ کوشست اِنت۔پانک ءَ اے کارپداں گوں ترندی ءَ ایر جتگ اَنت۔