شال : بلوچ راجی زْرمبشت ( بی این ایم ) ءِ جارکش ءَ مستونگ ویل ءِ سر ءَ وتی دلپدردی درشان کنان ءَ گْوشتگ مستونگ ءَ ’پیگمبر ءِ ودی بیتن روچ‘ ءِ روانک ءَ تْراک تچکے ءَ بلوچ راج ءِ سر ءَ ارش اِنت اے رنگیں کاراں چوناھیں ھم نامے دیگ بہ بیت روا نہ اَنت۔مروچی سرجمیں بلوچ راج پرسیگ کنگ بیتگ۔مئے دل چہ رنجاں سرریچ اَنت ءُ ما اے ویل ءَ سانمند بیتگیں کھولانی اندوھاں ھوار ایں۔
جارکش ءَ گْوشتگ بلوچ ءُ پشتون راج پاکستانی مھترھندی (ریاستی ) شونداتانی آماچ اَنت۔چہ ھما روچ ءَ کہ پاکستان جوڑ کنگ بیتگ پہ وتی سیتاں ’دین‘ ءَ جنگ ابزارے ءِ رنگ ءَ کارمرد کنگ ءَ اِنت ، ایشی ءِ برود ءَ مروچی سرجمیں دمگ تاوان ءِ دیمپان اِنت۔ مروچی ھم پاکستان ماں بلوچستان ءَ پہ دینی پیرانی بنیاد ءَ سیاست کنوکاں راہ پچ کنگ ءَ اِنت داں بلوچ راج ھم گوں ھما جاوراں بہ تریٹ ایت کہ پشتون راج آیانی دیمپان اِنت ، چہ ایشی ءَ پاکستان بلوچ آجوئی ءِ زرمبشت ءَ مجاں اندیم کنگ لوٹ ایت۔
آئی ءَ گْوشتگ بلوچ راج مروچی چہ گْوست ءَ گیشتر جتائیں نیمگ ءَ مستریں ترسانی دیمپان اِنت۔ پہ اے جاورانی دیمپانی ءَ بلوچ راج ءَ مردمی بنیاد ءَ میان استمانی کمک ءُ دیناداسی ئیں پلہ مرزی پکار اِنت۔پاکستانی مھترھند پہ میان استمان ءَ بلایے جوڑ بیتگ کہ ایشی ءِ رودینگ دمگ ءُ جھان ءِ سیت ءَ نہ اِنت۔ ناں کہ زوگریں درملکی سرکار ءَ مردم پلہ مرزی کن اَنت کہ پہ اے وڑیں جاورانی دیمپانی ءَ المی اِنت۔
بی این ایم ءِ جارکش ءَ گْوشتگ آجوئیں بلوچستان ءَ ابید دمگ ءَ ناشرکاری ءِ تالانی دارگ نہ بیت۔مستونگ ویل ناں ایوک ءَ پہ بلوچستان ءِ باندات ءَ مزنیں ترسے ءِ نیمگ ءَ دلگوش ءَ پرین ایت بلکیں پہ سرجمیں دمگ ءَ ناوشیں ھالے۔
آئی ءَ گْوشتگ بلوچستان ءِ زمینی ارزشت انچوش اِنت کہ جتائیں راجانی چم اد ءَ سک اَنت ءُ پاکستانی مھترھند بلوچ راجی زْرمبشت ءِ دیمگیری ءَ بے سوب بیگ ءَ پد آئی ءَ گوں نوکیں پندلاں پیڑایگ لوٹ ایت۔انچوش کہ ناشرکاری ءِ بگیری ءِ جنگ سرجمیں جھان ءَ وتی جنگ لیک اتگ ءُ کمک کرتگ ھمے وڑ ءَ بلوچستان ءَ ھم راجی آجوئی ءِ زْرمبشت توانمند کنگ ءُ اے دمگ ءُ جھان ءِ پھریزگ ءِ درے پچ کنگ بیت۔
جارکش ءَ گْوشتگ مروچی پاکستان ءِ زیردستیں راج وتی بدتریں جاوراں گْوزگ ءَ اَنت۔ یک نیمگے مھترھند ءِ داشتگیں درمھترھندی ( غیرریاستی عناصر) گل ءُ رمب اَنت کہ وتی دیدانک ءِ پد ءَ واکداری لوٹ اَنت دومی نیمگ ءَ مھترھندی توان اَنت کہ زیردستیں راجانی بگیری ءَ زور ءِ کارمرد کنگ ءَ ھچ چک ءُ پد نہ بہ اَنت۔ گْوستگیں روچ ءَ ماڑی جلبانی ، سکرنڈ، سند ءَ میتگے ءِ سر ءَ پاکستانی لشکراں بیڑ برتگ ءُ جنینانی پجیگ ءَ دست ءُ گوشیں مردم کشتگ اَنت۔ زیردستیں راجانی چکچینی پاکستانی مھترھند ءِ مدامگیں شونداتانی بھر اِنت۔