جنیوا : چہ بلوچ راجی زْرمبشت ( بی این ایم ) ءِ نیمگ ءَ راجانی سنت ءِ مردمی اگبالانی پتر ءِ 54 می نیاد ءِ میان ءَ سئے روچی آگاھی باوست آسر بیتگ۔بی این ایم ءِ دری کارانی تک ءَ اے آگاھی باوست ءِ چن ءُ لانچ کرتگ اَت۔وھدے کہ بی این ایم ءِ سرکماش ڈاکٹرنسیم، دری کارانی کارگشاد ھمل حیدر، بنجاھی تک ءِ باسک ھاجی نسیر ، پھیم ، ھاتم ءُ نیاز ءِ پجیگ ءَ مزنیں کچے ءَ دگہ باسک ھم جنیوا ءَ مچ بیتگ اَنت داں اے دم ءُ درگت ءَ بلوچستان ءَ برجاھیں مردمی اگبالانی جاور ءَ سھرا بہ کن اَنت۔
بی این ایم ءِ دری کارانی تک ءِ باسک نیا ءِ گْوشگ اِنت کہ آیوکیں سال ءِ مارچ ءَ بی این ایم بلوچستان ءِ مردمی اگبالانی جاور ءِ سر ءَ جنیوا ءَ چہ ایشی ءَ مستریں باوستے ءِ ھلائینگ ءِ کوشست کنت داں چہ بلوچستان ءِ جاور ءَ جھان سھی کنگ بہ بیت۔
اے باوست ءِ میان ءَ ڈیرہ بگٹی ءَ پاکستانی لشکر ءِ انگیں زوراکی، بلوچ چکچینی، زور بیگواھیں مردم ءُ چہ آمیدگس ءِ پرمان ءَ ڈن کشگ بیتگیں بلوچ راھشونانی پجیگ ءَ آ دگہ مردمانی بارہ ءَ آگاھی دیگ بیتگ۔
سئے روچی باوست ءِ میان ءَ ’ بروکن چیئر‘ ءَ زھرشانی ھم کنگ بیتگ۔ اے زھرشانی ءَ پہ بلوچستان ءُ سند ءِ آجوئی ءَ اوگام جنگ بیتگ۔بی این ایم ءِ زھرشانی ءَ بی این ایم ءِ راھشوناں ابید سندی راجدوست ڈاکٹر لکو لوھانہ ، بلوچ زْرمبشت ءِ پلہ مرز ءُ مردمی اگبالانی سرگرمیں کارکن نور ء مریم کنور ءَ ھم بھر زرتگ ءُ زھرشانی ءِ میان ءَ گپ جتگ۔
اے رد ءَ تْران کنوکاں گْوشتگ گْوستگیں بازیں ھپتگ اِنت کہ ڈیرہ بگٹی ءَ پاکستانی لشکر بلوچ ءِ چکچینی ءَ کنگ ءَ اِنت۔مزنیں دمگے انگر کنگ بیتگ۔ دھاں مردم زور بیگواہ کنگ بیتگ ءُ مردمانی مڈیاں تاوان دیگ بیگ ءَ اِنت۔
’بلوچانی سر ءَ پاکستانی لشکر ءِ زوراکی نوکیں گپے نہ اِنت بلکیں چہ ھما روچاں کہ پاکستان ءَ بلوچستان زور گیپتگ ، بلوچانی درسیں اگبال پچ گرگ بیتگ اَنت ءُ آیانی سر ءَ زوراکی کنگ بیگ ءَ اِنت۔‘
آیاں گْوشتگ پاکستان ءَ بلوچستان ءِ مڈی پکار اَنت بلے آئی ءَ گوں بلوچ راج ءِ دیمروی ءُ سیتاں کار نیست۔ دمگ ءَ زیردستیں راجانی آجوئی پرایمنیں دمگے ءِ مانزمان بیت۔پاکستانی مھترھند ءِ واکداراں بلوچستان بے بلوچاں لوٹ ایت داں آیانی مڈیاں دستیگ بہ کن اَنت۔ بلوچستان ءِ آجوئی ءَ ابید آ اود ءَ مردمی اگبالانی پھریزگ پدنہ بیتگیں گپے۔پمیشکا میان استمان پہ بلوچ چکچینی ءِ دارگ ءَ بلوچ راجی آجوئی ءِ زْرمبشت ءَ کمک بہ کنت۔
تْران کنوکاں گْوشتگ تیوک ءَ بلوچستان نہ اِنت بلکیں سند ءُ پشتونوا ءَ ھم سندی ءُ پشتون راج ءِ سر ءَ مھترھند زوراکی کنگ ءَ اِنت۔دمگ ءَ زیردستیں راجانی آجوئی پرایمنیں دمگ ءِ مانزمان بیت۔ آجوئیں بلوچستان ءُ سندو دیش ءِ جوڑ بیگ ءَ دوئیں راجانی دیمروی ءِ راہ پچ بیت۔ پاکستان ءِ زیردستی ءَ اے راجانی چاگرد دینی ترند روی ءِ آماچ بیگ ءَ اَنت کہ آیانی بنجل پنجاب ءَ اِنت بلے آ وتی روتگاں زیردستیں راجانی چاگرد ءَ تالان کنگ ءَ اَنت داں اد ءَ راجی سنچ ءَ گٹگیر بہ کن اَنت ءُ پاکستان ءِ نام ءِ ’ دو راجی لیکہ ‘ ءَ پزور بہ بیت۔ پاکستان ءِ ھمے نام ءِ ’ دو راجی لیکہ ‘ اَت کہ دمگ ءَ ترند روئیں لیکہ ئِے سکین داتگ ، ھمیشی ءِ بدیں آسر ءِ ما آماچ ایں۔ ایشی ءِ پشت ءَ برگ ءَ ابید ما پھریز بیت نہ کن ایں۔
