پنجگور : بلوچ راجی زْرمبشت ( بی این ایم ) ءِ گھبودی تک ءَ وتی گزارشے ءَ اے گپ پاشک کرتگ کہ پنجگور دمگ ءِ ھنکین گچک ءِ شانزدہ وانگجاہ سرجمی ءَ بند ءُ یک وانگجاھے پاکستانی لشکر ءَ دستیگ کنگ ءَ پد لشکری بنجل جوڑ کرتگ۔
بلوچ راجی زْرمبشت ( بی این ایم ) ءَ اے گزارش ءِ پارست ءَ چہ میان استمان ءَ دزبندی کرتگ کہ آ بلوچستان ءِ ناگیگیں جاورانی نیمگ ءَ دلگوش بہ کنت ءُ بلوچستان ءِ مردماں چہ بنکی آسراتیاں زبھر کنگ ءِ سر ءَ پاکستانی واکداراں جست بہ کنت ءُ چہ وتی اے کرد ءَ بلوچاں چہ پاکستان ءِ زوراکی ءَ پھریزگ ءَ گون بہ بیت۔
بی این ایم ءِ گھبودی تک بلوچستان ءِ مردمانی گزرانک ءُ چاگردی جیڑھاں چار ایت ءُ ایشانی سر ءَ گزارش ٹاھینگ ءَ پد وتی زور ءُ دزرس ءَ جیڑھانی گر ءُ دار ءِ کوشست کنت۔بلوچستان ءَ وانگ ءُ زانگ ءِ ناگیگیں جاور ءِ سر ءَ اے بی این ایم ءِ گھبودی تک ءِ پٹ ءُ پولی گزارشانی دْرچ اِنت۔ اے ھمے دْرچ ءِ چارمی گزارش اِنت چہ ایشی ءَ پیش بی این ایم ءِ گھبودی تک ءَ آواران ءِ ھنکین مشکے ، آواران ءُ جاھو ، کزدار ءِ ھنکین ھورناچ ءُ نال ءِ بندیں وانگجاھانی سر ءَ گزارش شنگ کرتگ اَت۔ گْوستگیں گزارشانی رد ءَ مشکے ءُ آواران ءَ 76 وانگجاہ ، جاھو ءَ 25 ، ھورناچ ءُ نال ءَ 19 وانگجاہ بند اِنت۔ چہ ایشی ءَ اے ھندانی چک چہ بنداتی وانگ ءَ زبھر اَنت۔
بی این ایم ءِ رد ءُ بند داتگیں گزارش ءِ رد ءَ بلوچستان ءِ تیوک ءَ ھمے نام گیپتگیں ھپتیں ھنکیناں 137 وانگجاہ بند اِنت چہ ایشاں گیشتر بنداتی پدانک ( پرائمری ) ءِ وانگجاہ اَنت چہ ایشی ءَ مزنیں ھلک ءُ ھندے ءِ چک چہ بنداتی وانگ ءَ زبھر اَنت۔
انیگیں گزارش ءِ رد ءَ پنجگور دمگ ءِ ھنکین گچک ءِ پانزدہ بنداتی پدانک ءِ وانگجاہ ، یک میانی پدانک ءُ یک مزنیں پدانک ءِ وانگجاھے سرجمی ءَ بند اَنت ءُ آ اود ءَ ھچ رنگیں وانگ ءُ زانگی سرگرمی بیگ ءَ نہ اِنت۔
گزارش ءِ رد ءَ ، پرائمری اسکول چِب گچک محھمد بازار، پرائمری اسکول جونتاک گچک دوست مھمد بازار ، پرائمری اسکول لوھڑی مولا بکش بازار ، پرائمری اسکول کرک ء ڈل ملا پیز مھمد بازار ، پرائمری اسکول کاشان آپ ، پرائمری اسکول کھن ، پرائمری اسکول رحمت اللہ بازار کلری ، پرائمری اسکول چیئرمین اسلم بازار ، مڈل اسکول مھمد جان بازار سیاہ دمب ، پرائمری اسکول بازید بازار دراکوپ ، پرائمری اسکول ابدل سمد بازار دملی تحصیل ، پرائمری اسکول ھاجی سنجر بازار سرگوز ، پرائمری اسکول سوپی امیر بکش بازار سِلاری ، پرائمری سکول ڈاکٹر رسول بکش بازار سر گوز ، پرائمری اسکول میر ابراھیم بازار پرپکی ، پرائمری اسکول جمادار جورک بازار آسکان چب بند اَنت ءُ ھائی اسکول کھن پاکستانی لشکر ءَ دستیگ کنگ ءَ پد لشکری بنجل جوڑ کرتگ۔