ڈاکٹر نسیم ءِ پاگواجھی ءَ نیاد ، بی این ایم ءِ کیچ گوادر ھنکین ٹاہ اِت

تربت : بلوچ راجی زْرمبشت ( بی این ایم ) ءِ سرکماش ڈاکٹرنسیم ءِ پاگواجھی ءَ بیتگیں نیادے ءَ بی این ایم کیچ گوادر ءِ باسکانی سر ءَ ’ شھید انور ایڈوکیٹ ھنکین کیچ گوادر ‘ ٹاہ اتگ۔ نیاد ءَ پہ ھنکین ءَ پنچ کسی چارگزاری پترے ھم گچین کرتگ۔

نیاد ءِ گچینی مھمان بی این ایم ءِ گھبودی تک ءِ کارگشاد مھمد اکبال اَت۔

نیاد ءَ بی این ایم ءِ مزن کمک سرکماش ڈاکٹر جلال ءَ باسکانی زمہ واری ءُ ربیدگی ءُ رسانکدری کارگشاد کازی داد مھمد ریھان ءَ راجمان پتر ءَ پد چہ بی این ایم ءِ دیمروئی ءَ باسک سھی کرت اَنت۔ بی این ایم ءِ کلانھیں باسک مھمد انور ءَ پہ چارگزاری پتر ءَ باسکانی نام ءَ ایر کرت اَنت ءُ پہ ھنکین ءَ شھید انور ایڈوکیٹ ءِ نام سوج کرت۔ آئی ءَ نیاد ءَ واجہ انور ایڈوکیٹ ءِ زند ءُ کرد ءِ سر ءَ ھم چمشانک دات۔

آئی ءِ سوج کرتگیں چارگزاری پتر ءِ باسک ءُ ھنکین ءِ نام منگ بوت اَنت۔

گوں نیاد ءَ تْران کنان ءَ بی این ایم ءِ سرکماش ءَ نوکیں ھنکین ءِ جوڑ کنگ ءِ سر ءَ باسکاں مبارک بات دات ءُ ھمے اوست درشان کرت کہ بی این ایم ءِ نوکیں ھنکین پہ گل ءِ دیمروئی ءَ بنکی کردے پیلو کنت۔

آئٛی ءَ گْوشتگ گل ءِ درسیں تْرامگیج گوں یک دومی ءِ ھمگرنچی ءَ پہ گل ءِ مول ءِ سوبمندی ءَ کار بہ کن اَنت ، آ پہ وت ءَ ھم لیکھیں سنگت شوھاز بہ کن اَنت ءُ آیاں بی این ایم ءِ باسک جوڑ بہ کن اَنت۔ مارا پہ وتی کوشستانی سیتمند کنگ ءَ وتی شوندات ءُ راھبندانی سر ءَ جیڑگ لوٹ ایت۔ المی نہ اِنت کہ اے سپر ءَ مئے جند منزل ءَ سر بہ بیت یا مدام ھمے زمہ واری مارا گون بہ بہ اَنت پمیشکا ادارہ جوڑ کنگ ءُ گل مگیم کنگی اِنت۔ مارا وتی ونڈ ءِ کار گوں ایمانداری ءَ کنگی اَنت داں چہ ما آیوکیں باسکاں کار کنگ ءَ آسانی بہ بیت۔

آئی ءَ گْوشتگ مارا چارگ لوٹ ایت کہ گْوستگیں دہ سالاں مئے کار اوشت ءِ آماچ بیتگ اَنت یا مئے کارانی تہ ءَ دیمروئی اتکگ اگاں دیمروئی نے اتکگ گڑا الم ءَ اے مئے نزوری اِنت۔ بلے آئی ءَ بی این ایم جتائیں تْرامگیجانی کارکرد ءِ سر ءَ ایمنی درشانتگ۔

آئی ءَ گْوشتگ چہ بی این ایم ءِ سیشن ءَ پد آئین ءَ نوکیں تْرامگیج جوڑ کنگ بیتگ۔ ما گمان کرتگ اَت کہ بیت کنت ما اے درساں یکیں وھد ءَ پرکار کرت مہ کن ایں اگاں وتی باریگ ءَ ما ایوک ءَ یک تْرامگیجے ھم پرکار کنگ ءَ سوبمند بیتیں گڑا بزاں اے پہ ما مزنیں سوبمندی یے بلے ما چہ یک ءَ گیش نوکیں تْرامگیجانی پرکار کنگ ءَ سوبمند بیتگ ایں کہ یک شریں دیمروئی یے۔ اے تْرامگیجاں گوں ھم دستی ءَ دیمروئی دیگ ءُ مگیمی ءِ نیمگ ءَ برگ درسیں باسکانی زمہ واری اِنت۔

اے دم ءُ درگت ءَ بی این ایم ءِ کلانھیں باسک مھمد انور ءَ شھید انور ایڈوکیٹ ءِ زند ءِ سر ءَ کسانیں چمشانکے دات۔

شھید انور ایڈوکیٹ ءِ اکس ءُ کسانیں پجارے:

آئی ءَ گْوشت واجہ انور ایڈوکیٹ ءِ بیھی ھلک ءُ ھند ماشکیل اَت۔ چہ نودربری ءَ آ گوں سیاست ءَ ھمگرنچ بوت۔ ھشتاد ءِ دھک ءَ اوگانستان ءُ چہ آ اود ءَ سویت سنت ءَ شت۔ ھمود ءَ آئی ءَ بی اے ایل ایل بی (ڈیھ ءِ راھبند) ءِ مدرک گیپت ءُ گوں بی ایس او ( سھب ) ءَ ھمگرنچ بوت۔ وھدے سویت سنت پْرشت ، اوگانستان ءَ مجاھدانی سرکار برجم بوت ءُ بلوچ چہ اوگانستان ءَ درکپگ ءَ لاچار بوت اَنت گڑا انور ایڈوکیٹ ھم گوں دگہ بلوچاں ڈیھ ءَ واتر بوت۔

مھمدانور ءِ رد ءَ ، بلوچستان ءَ واتر بیگ ءَ پد ھم آئی ءَ گوں وتی سیاسی ھمبلاں سیادی برجاہ داشت اَنت۔ گوں واجہ گلام مھمد ءَ لیکہ ءُ سسائی ھم آھنگی ءِ پد ءَ آئی ءِ گوں شھید واجہ گلام مھمد ءَ سکیں نزیکی یے ودی بوت۔ پمیشکا وھدے واجہ گلام مھمد ءَ ڈاکٹر مالک ءُ ڈاکٹرھئی ءِ نیشنل پارٹی ءِ ھمراہ بیگ ءِ جاہ ءَ بلوچستان نیشنل موومنٹ ءِ برجاہ دارگ ءِ شور کرت گڑا واجہ انورایڈوکیٹ ھم بی این ایم ءَ ھوار بوت۔ 2004 ءِ سیشن ءَ واجہ انور ایڈوکیٹ کمک سرکارگشاد گچین بوت۔

’’ 2006 ءَ پاکستانی لشکر ءَ شھیداکبر ھان بگٹی شھید کرتگ ءُ ھمیشی ءِ پد ءَ سرجمیں بلوچستان ءَ زھرشانی ءِ دْرچے بندات بوت ۔ ھمے وھد ءَ واجہ دالبندین ءَ زھرشانیانی تہ ءَ چہ درساں دیم ءَ اَت۔ بی این ایم ءِ کمک سرکارگشاد اَت پمیشکا پاکستانی سرکار ءَ انور ایڈوکیٹ ءِ سر ءَ دروگیں بھتام جت ءُ دزگیری ءِ پرمان دات۔ آئی ءَ لھتے وھداں اے دروگیں بھتامانی دیمپانی کرت بلے پہ آئی ءَ وھدے زمین تنگ کنگ بوت گڑا چیر بوت ءُ پہ زْرمبشت ءَ وتی کار برجاہ داشت اَنت۔‘‘

مھمد انور ءِ رد ءَ ، 2010 ءَ وھدے آ وتی لوگ ءَ روگ ءَ اَت راہ ءَ دل ءَ گیپت ءُ بیران بوت۔راہ گْوزی مردمے ءَ آ نادْراھجاہ ءَ برت۔ چوش کہ باز وھد ءَ چیر بیتگ اَت پمیشکا پجارگ بیگ ءَ نہ اَت۔آئی ءِ کنٹ پجارگ نہ بیتگیں مردمے ءِ رنگ ءَ نادْراھجاہ ءَ ایر کنگ بوت ، رند ءَ سنگنتے ءَ پجا آؤرت ءُ آئی ءِ ھند ماشکیل ءَ برگ ءُ گلزمین ءِ میار کنگ بوت۔

چوناھیا آ دل ءَ گیپتگ اَت بلے بلوچ راجی زْرمبشت ( بی این ایم ) ءَ آئی ءِ شول کشیں جھد ءُ آجوئی ءِ راہ ءَ بیران بیگ ءِ پد ءَ آ ’شھید ‘ لیک اِت۔

’’پہ آئی ءِ کرد ءُ کارانی منار ءَ چہ بی این ایم ءِ نیمگ ءَ کیچ گوادر ھنکین شھید انور ایڈوکٹ ءِ نام دیگ بیتگ کہ مارا مدام آئی ءِ دیمونی ءُ لیکھی ھمبستگی ءِ یاتاں گیج ایت۔‘‘