شال : بلوچ راجی زْرمبشت ( بی این ایم ) ءِ مردمی اگبالانی تک ، پانک ءَ اکتوبر 2023 ءِ میان ءَ بلوچستان ءَ مردمی اگبالانی لگتمالی ءِ سر ءَ وتی ماھی گزارش شنگ کرتگ۔اے گزراش ءِ تہ ءَ جتائیں ویلانی سر ءَ گپ جنگ بیتگ کہ ماں بلوچستان ءَ مردمی اگبالانی لگتمالیاں سھرا کن اَنت۔
گزارش ءِ رد ءَ گْوستگیں ماہ ءَ بازیں مردمے زور بیگواہ کنگ بیتگ کہ چہ آیاں 34 کس ءِ زور بیگواھی پانک ءِ اکتوبر 2023 ءِ گزارش ءِ بھر اِنت۔ پانک ءِ گزارش ءَ پاکستان لشکر ھمے 34ئیں مردمانی پجیگ ءَ دگہ ھزارانی بلوچانی ناراھی ءُ چہ آمیدگس ءِ پرمان ءَ ڈن زور بیگواھی ءِ سر ءَ میاربار لیکگ بیتگ۔پانک ءِ رد ءَ اے کارپد واکدارانی کردگار ءِ بارہ ءَ بے تاھیری ودی کنت۔
پانک ءِ رد ءَ ، گْوستگیں ماہ ءَ چہ آمیدگس ءِ پرمان ءَ ڈن کوش ءِ بیمناکیں ویلانی تہ ءَ پاکستانی لشکر ءَ کلپیں میڑے ءَ چہ پیش ءَ دزگیر ءُ زور بیگواھیں دو کس کشتگ۔اے کوشانی زمہ واری پولیس ءِ ناشرکاری گر ءُ دار ءِ تک ( سی ٹی ڈی) ءَ من اتگ۔
گزارش ءَ گْوشگ بیتگ بیھار ءُ ڈاھانی تہ ءَ ھم سرجمیں ماہ ءَ مردمانی اگبالانی پانکجن ءُ سانمند بیتگیں کھولانی نیمگ ءَ زھرشانی کنگ بیتگ۔ نودربر سروک شبیر اھمد ءِ کھول ءَ کراچی ءَ زھرشانی کرتگ ءُ آئی ءِ پہ دْراھی واتر کنائینگ ءِ لوٹ کرتگ۔ ھمے پیم مردمی اگبالانی پانکجن راشد ھسین ءِ زور بیگواھی ءِ جیڑہ ءَ سساتْرانی مراگشے ایر کنگ بیتگ۔
پانک ءِ چمشانکی گزارش ءَ مردمی اگبالانی لھتے ڈالیں ویلانی بارہ ءَ ھم گپ جنگ بیتگ، کہ آیانی تہ ءَ جون 2000 ءَ زور بیگواہ بیوکیں الی ازگر بنگلزھی ءُ 31 اکتوبر 2023 ءَ زور بیگواھیں ابدل ھمید زھری ءِ یلہ بیگ ھوار اِنت۔ اے دوئیں ویلاں کھولاں گوں جتائیں آسراں پہ مزدانک ءَ وتی کوشست برجاہ داشتگ۔
پانک ءِ گزارش ءَ چہ ھب ءَ 10 سالی ئیں سپر الی ءِ زور بیگواھی ءِ پجیگ ءَ پنجاب زانشتجاہ ءِ نودربر پرید ءِ آوار جنی ءِ وڑ ءَ دزگیری ءِ سر ءَ ھم بے تاھیری درشانتگ۔ پانک ءِ رد ءَ پرید ءِ دزگیری ءَ پد آئی ءِ بگیری ءَ زانشتجاہ ءَ نشہ بھا کنگ ءِ دروگیں ایپ آئی آر نبیسگ بیتگ۔
پانک ءِ گزارش ، اکتوبر 2023 ءِ میان ءَ ماں بلوچستان ءَ مرمی اگبالانی رد ءَ شھرمننداں دیمپانیں بیھار ءُ ڈاھیانی سر ءَ جھلانکی ءَ چمشانک دنت۔ اے میان استمانی گلانی سر ءَ زور دنت کہ آ پہ اے جیڑھانی گیشینگ ءُ اے دمگ ءَ مردمی اگبالانی پھریزگ ءُ ایشانی پھریزگ ءِ سکین ءِ الم کنائینگ ءَ اشتاپی ءَ گامگیج بہ زیر اَنت۔