تربت : سیزدہ نومبر سن ھژدہ سد ءُ سی ءُ نو گْوستانک ءِ ھما ویل اِنت کہ اے روچ ءَ زوراکیں انگریزاں بلوچ سرڈگار ءِ سر ءَ بیڑ آؤرتگ۔ چہ ایشی ءَ پیسر بلوچستان آجو ءُ بلوچ وتواک بیتگ اَنت۔
اے گپ گوں مچی ءَ تْران کنان ءَ بلوچ راجی زْرمبشت ( بی این ایم ) ءِ شھید سلیمان چارگزاری تک تربت ءِ نیادے ءَ گْوشگ بیتگ اَنت۔ اے نیاد بلوچ شھمیرانی روچ ءِ دم ءُ درگت ءَ برجم دارگ بیتگ اَت۔
نیاد ءَ بی این ایم تربت ءِ جتائیں بنزھانی باسکاں ھم بھر زرتگ اَت۔ بی این ایم ءِ باسکاں پہ شھمیراں دْرورت نْدر کرتگ ءُ آیانی کرد پہ بلوچ راجی زْرمبشت ءَ سکا پرارزشت لیک اتگ۔
نیاد ءَ سیزدہ نومبر ءِ گْوستانکی پژدر ءُ انگریزانی بلوچ سرڈگار ءِ سر ءَ زوراکیانی سان ءُ پدگوانک ءِ بارہ ءَ تْران کنگ بیتگ۔ تْران کنوکاں گْوشتگ زورگریں انگریزاں بلوچ سرڈگار دستیگ کنگ نہ لوٹ اتگ اَت ۔ آیانی سیت اے نہ بیتگ کہ بلوچ گلزمین ءَ وتی دست ءَ بہ کن اَنت بلکیں آیانی پھریز ءُ دیمپانی سیت گوں مئے سرڈگار ءَ بندوک بیتگ اَنت۔ پمیشکا آیاں چہ ھان بلوچ ءَ لوٹ کرتگ اَت کہ آ انگریزاں بولان ءِ ڈک ءَ گْوزگ ءَ بہ ھل ایت داں انگریز چہ آ اد ءَ ایمنی بہ گْوز اَنت ءُ اوگانستان ءِ سر ءَ ارش بہ کن اَنت۔ بلے گھگیری ءِ چیدگ ھان بلوچ ءَ نہ من اِت کہ بلوچ سرڈگار آیانی ھمساھگ ءِ ڈیھ ءِ بگیری ءَ کارمرد بہ بیت۔ پہ وتی راجی وتکواکی ءُ مڑاہ ءَ ھان بلوچ گوں انگریزاں دیم پہ دیم بوت ءُ گوں ھمراھاں جنگ ءِ تہ ءَ شھمیر بوت۔
آیاں گْوشتگ بلوچ ءَ ھرچ باریگ ءَ زورگرانی دیم ءَ گھگیری کرتگ ءُ دنیگت آیانی سیتانی دیم ءَ میلانک اِنت۔ انگریز ءِ زمانگ ءَ بہ گر داں پاکستان وڑیں زورساچیں ڈیھ ءِ زورگری ءِ زمانگ ءَ بلوچ پہ وتی مانشت ءُ وتواجھی ءَ گھگیری کنگ ءَاِنت۔ پہ پرمنگہ ءُ مڑاھداریں راجی زندمان ءُ آجوئی ءَ شھمیر بیتگیں بلوچانی مزنیں لڑے ھست۔ اے روچ ایوک بلوچ شھمیرانی یات کنگ ءُ گیرآر ءِ روچ نہ اِنت بلکیں آیانی لیکہ ، مول ءُ سسا ءِ دیم ءَ برگ ءَ مسام کنگ ءِ ھم روچ اِنت۔ اے روچ ھمک بلوچ پسگ ءَ پہ راجی شان ءُ مڑاہ ءَ گھگیری کنگ ءِ سکین دنت۔ اے روچ پہ آجوئی ءَ گھگیری ءِ سر ءَ ستک ءَ مگیم کنت۔مروچی بلوچ راجی جز ءِ دْرچ شھمیریں بلوچانی ھون ءِ ھار ءُ پرمڑاھیں سرانی دیمونی برورد ءَ برجاہ اِنت۔ انچوش کہ نمیرانیں واجہ مبارک کازی ءِ گْوشتن اِنت :’ اے ھون ءِ ھار تمامیں پلیت ءُ چلاں بارت۔‘