بی این ایم کیچ گوادر ھنکین ءِ بلوچ شھمیرانی یات ءَ نیاد : بلوچ زْرمبشت گوں زوراکیاں ایرموش نہ بیت

گوادر: بلوچ شھمیرانی روچ ءِ دم ءُ درگت ءَ بی این ایم کیچ گوادر ھنکین ءِ نیمگ ءَ برجم دارگ بیتگیں نیادے ءَ بلوچ شھمیر ستاشانی پیش کنگ بیتگ اَنت۔ مراگش ءِ بندات چہ دو دمان ءِ بے تواری ءَ بیتگ۔

اے مراگش ءِ گچینی مھمان بلوچ راجی زْرمبشت ( بی این ایم ) ءِ کستریں سرکماش ڈاکٹرجلال اَت، آئی ءَ سیزدہ نومبر ءِگْوستانکی پژدر ءَ گپ جنان ءَ گْوشتگ گھگیری ءَ توانمند کنوک راجداریں گل اَنت ھمیشانی برپشت ءَ جنگ ءِ پڑ ءَ مڑوکاں سکین ءُ ھاٹیگ رس ایت۔ سیاسی گل ءِ زمہ واری اِنت کہ آ پہ زْرمبشت ءَ مردماں ساڑی بہ کنت ءُ ھمراھی ءَ بہ زیر ایت۔ انچوش کہ شھید گلام مھمد ، شھید لالامنیر ، شھید ڈاکٹرمنان ، استاد واھد کمبر ءُ ڈاکٹر اللہ نزر ءِ دیدانک ءِ بنیاد اِنت کہ آجوئی ءِ جنگ دیم ءَ روان اِنت۔

آئی ءَ گْوشتگ چہ وتی جوڑ بیگ ءَ پد بی این ایم گوں یکیں دْرچ ءَ جھد ءَ اِنت بی این ایم ءِ باسکانی تہ ءَ کمی آیگ ءَ نہ اِنت مئے تہ ءَ نزوری ھست اَنت بلے جھد اوشت ءِ آماچ نہ بیتگ۔

بی این ایم ءِ بنجاھی پتر ءِ پیسرگیں باسک ءُ نیاد ءِ پاگواجہ مھمد یوسپ ءَ ھمے رد ءَ تْران کنان ءَ گْوشتگ ایوک ءَ سیزدہ نومبر ھژدہ سد ءُ سی ءُ نو نہ اِنت کہ بلوچاں وتی گلزمین ءِ دیمپانی کرتگ بلکیں چہ ایشی ءَ پیش ھر وھد ءَ کہ زوراکاں پہ بلوچستان ءَ بیڑ آؤرتگ بلوچاں وتی سرڈگار ءِ دیمپانی کرتگ ءُ ساہ اش نْدر کرتگ اَنت۔ بلوچاں انی ھم شھیدانی راہ گون اِنت ءُ پہ وتی گلزمین ءِ پھریزگ ءَ جنگ ءَ اَنت۔

بی این ایم ءِ کلانھیں باسک مھمد انور ءَ گْوشتگ ھما سر دیمونی دے اَنت کہ وتی دیدانک ءِ سر ءَ گوں دلجمی ءُ داں گڈسر ءَ بندوک بہ اَنت۔اے راستی یے کہ آشوب وتی چکاں وارت ءُ نی توانمند بیت اے گپ بلوچ شھمیراں زانتگ ءُ وت ءَ پہ جھد ءِ مگیمی ءَ نْدر کرتگ مروچی ھمایانی دیمونیانی دین اِنت کہ جھد بزیں درچکے ءِ ہیم ءَ بلوچ ءَ ساھگ دیگ ءَ اِنت۔

بی این ایم ءِ بنجاھی پتر ءِ پیسرگیں باسک رژن ءَ ھمے مراگش ءِ تہ ءَ گْوشتگ ما وتی شھمیراں تیوک ءَ ھمے یکیں روچ ءَ یات نہ کن ایں بلکیں آ مدام مئے ھمراہ اَنت۔ ما گوں نازینکاں وتی شھمیراں نازین این ءُ ادیرھان ءَ اش بر ایں۔ مئے مات گریوگ ءِ جاہ ءَ وتی شھمیریں بچ ءُ جنکاں نازین اَنت۔ اے زْرمبشت گوں زوراکی ءَ ایرموش نہ بیت کہ ایشی ءِ بنیاد مگیم اَنت۔

کیچ گوادر ھنکین ءِ چارگزار بابا جی آر ءَ درائینتگ 184 سال گْوزگ ءَ پد ھم ما چہ شھمیر مھراب ھان ءِ جنگ ءُ شھمیری ءَ نہ شموشتگ ایں۔ھمے دْرچ ءِ برجاہ دارگ ءَ سن دوھزار ءَ نوکیں زمانگ ءِ لوٹانی پد ءَ جنگ بنا کنگ بیتگ اے جنگ ءَ شھید اکبرھان بگٹی ، شھید بالاچ مری ءُ شھیدگلام مھمد رنگیں سرمچنڈاں وتی تنگوئیں جان پہ بلوچ ڈیھ ءَ نْدر کرتگ اَنت، ھمے لیکہ انیگیں سرمچاراں گون اِنت ءُ گلزمین ءِ ھرچ پھنات ءَ وتی ھوناں ریچان اَنت۔

بی این ایم ءِ باسک شئے بھار ءَ ھم تْران کرتگ ، آئی ءَ گْوشتگ ءُ بلوچ ءِ ھزاراں پسگ پہ بلوچ ڈیھ ءِ پھزگ ءَ زور بیگواہ کنگ بیتگ ءُ ھزاراں گوں بے دردی ءَ کشگ بیتگ۔ مئے زھگ ءُ جنین زوراک ءِ زوراکیانی دیمپان اَنت۔بلوچستان ءِ ھر چاریں کنڈاں زوراکی ءِ آس جمبور انت، مارا درسیں بلوچاں یکمشت بوگی انت اگاں یک مشت مہ بہ ایں گڑا اے زلم ءِ آس مارا گیشتر پیلوشان کنت، مارا اے زلم ءِ بگیری ءَ جنگ کنگی انت ءُ شھیدانی رندگیر بوگی اِنت۔

بلوچ شھمیراں یات کنان زینل ءَ گْوشتگ ما اے اگبال ءَ ھچبر دگہ راجے ءَ دات نہ کن ایں کہ آ مئے سر ءَ راج بہ کنت۔ مئے مردماں پہ وتی زمین ءَ وت ءَ نْدر کرتگ کہ بلوچستان ءِ بنکی واھند ما ایں، ۔ مارا جنیناں ھم یکمشت بوگی انت، راجی ڈبہ زیرگ ءُ گوں وتی برات ءُ بچاں ھم کوپگ بوگی اِنت۔

اے مراگش ءِ جارچین بی این ایم کیچ گوادر ھنکین ءِ کمک چارگزار جیھند بلوچ اَت۔