بلوچ راجی زْرمبشت ءِ مردمی اگبالانی تْرامگیج پانک ءَ جنوری 2024 ءِ ماھی گزارش شنگ کرتگ۔ اے گزارش ءِ رد ءَ برجاھیں سال ءَ ھم بلوچستان ءَ زور بیگواھی ءُ بلوچ راج ءِ بگیری ءَ پاکستانی مھترھند ءِ زوراکیانی دْرچ برجاہ اِنت۔
جنوری 2024 ءَ پاکستانی لشکر ءَ 11 کس چہ آمیدگس ءِ پرمان ءَ ڈن کشتگ وھدے کہ 39 کس دزگیری ءَ پد زور بیگواہ کرتگ۔ 28 کس چہ پاکستان ءِ آزار جاھاں یلہ دیگ بیتگ کہ ابید چہ آمیدگسی کارروائی ءِ پاکستانی لشکر ءِ آزار جاھاں بند بیتگ اَنت۔
گْوستگیں جنوری ءَ چہ شال ءَ 2 ، چہ کیچ ءَ 19 ، چہ آواران ءَ 2 ، چہ ڈیرہ بگٹی ءَ 9 ، چہ نسیرآباد ءَ 1 ، چہ کچی ءَ 2 ، چہ گوادر ءَ 2 ءُ چہ خاران ءَ 2 کس چہ آمیدگس ءِ پرمان ءَ ڈن دزگیر کنگ ءَ پد زور بیگواہ کنگ بیتگ۔
پانک ءِ گزارش ءَ 21 جنوری ءِ شپ ءَ روکپتی بلوچستان ءَ بیتگیں پاکستانی لشکر ءِ ارشاں درانڈیھ بیتگیں بلوچانی کوش ءِ بارہ ءَ گْوشگ بیتگ کہ اے ارشاں کشگ بیتگیں مردمانی تہ ءَ گیشتر چک بیتگ اَنت، مردینے کہ سیاسی کارکنے بیتگ ءُ دو لوگی جنین ھم اے ارشانی تہ ءَ کشگ بیتگ۔
گزارش پاکستانی سرکار ءِ ٹاپار ءَ رد کنت کہ آئی ءِ تہ ءَ گْوشگ بیتگ اَت کہ اے ارشاں بلوچ سرمچارانی بندر نشانگ کنگ بیتگ اَنت۔
گزارش ءِ رد ءَ پاکستانی لشکر ءَ ماں روکپتی بلوچستان ءِ کچگ شم سر ، سراوان ءَ بیتگیں ارشاں بی این ایم ءِ باسک الی دوست پنام ءِ چیئرمین دوستا مھمد گوں وتی جنین ءُ سے چکاں کشگ بیتگ ، ھمے پیم نجمہ گوں وتی کسانسالیں گھار زتک ماھکان ، ماہ زیب ءُ برازتک پرھاد ءِ پجیگ ءَ کشگ بیتگ۔
پانک ءِ گزارش ءَ گْوشگ بیتگ کہ اے جاور مردمی اگبال ءُ آیانی جان پھریزی رد ءَ مزنیں کچے ءَ بے تاھیری ودی کنت۔