بلوچستان ءَ برجاھیں لشکرکشی آسر کنگ بہ بیت ، بی این ایم ءِ ماں جرمنی ءَ زھرشانی

کولن ، جرمنی ۔ چہ آزار ءَ سانمند بیتگیں مردمانی پلہ مرزی ، نشہ ءِ کارمردی ءُ سودا ءِ بگیری ءِ میان استمانی روچ ءَ بلوچ راج زْرمبشت ( بی این ایم ) جرمنی تک ءِ نیمگ ءَ ماں کولن ءَ زھرشانی بیتگ۔ زھرشانی کنوکاں ماں بلوچستان ءَ مردمی اگبالانی بگیری ءِ نیمگ ءَ دلگوش گْور کنائینتگ ءُ مزدانک لوٹ اتگ۔

زھرشانی کنوکاں جرنبشت، کاگد ءُ اکس گون بیتگ۔ اکسانی تہ ءَ زور بیگواھیں مردمانی اکس ھم ھوار بیتگ اَنت ءُ جرتاک ءُ کاگدانی سر ءَ نبشتگیں نکاناں پاکستانی زوراکی ایر جنگ بیتگ اَنت۔

بی این ایم جرمنی ءِ سرکماش شرھسن ، کمک سرکماش سپیہ ، باسک آسپ ، کاسم ھسین، اھمد ، ایمان ، بالاچ ءُ مردمی اگبالانی کارکن ھداھیر ءَ گوں مردماں تْران کنان بلوچستان ءِ بدیں جاور ءُ میان استمانی تک ءَ گامگیج ءُ پہ سانمندیں مردماں زیت مزدانک ءِ لوٹ ءِ سر ءَ زور داتگ۔

آیاں چہ پاکستانی مھترھند ءِ نیمگ ءَ بلوچستان ءَ برجاھیں لشکرکشیانی آسر کنگ ءِ لوٹ کرتگ کہ چہ ایشاں زور بیگواھی ، در آمیدگسی کوش ءُ تْرام اتگیں رنگے ءَ آزار دئی بیگ ءَ اِنت۔آیاں مردمی اگبالانی گلاں گْوشتگ کہ آ بلوچ راج ءِ اگبالانی پلہ مرزی ءَ سرپدی ودی بہ کن اَنت ءُ پہ ھمے تک ءَ کارروائی کنگ ءَ وتی وس ءُ واک ءِ کارمردی ءَ برجاہ بہ دار اَنت۔

ورنائیں باسکاں بلوچستان ءَ ورنایانی سر ءَ آزار ءُ نشہ ءِ بے کچیں کارمردے ءِ سان سھرا کرتگ اَنت۔آیاں اے ناروائی ءِ آسر کنگ ءِ زیتیں لوٹ ءِ سر ءَ زور دیان ورنایاں چہ نشہ ءِ سوداگری ءُ کارمردی ءَ دیر دارگ ءَ آیاں روزگار دیگ ءِ ارزشت پدر کرتگ۔

بلوچ راجی زْرمبشت ءَ چہ اے زھرشانی ءِ پارست ءَ بلوچستان ءَ برجاھیں مردمی اگبالانی گر ءُ دار ءَ زیتیں میان استمانی دزمانجنی ءِ لوٹ دمپار اتگ۔گل پاکستانی مھترھند ءِ دست ءَ زور بیگواھی ، در آمیدگسی کوش ءُ بلوچ راج ءِ بگیری ءَ زوراکیانی آزاتیں پٹ ءُ پول ءِ لوٹ کنت۔