بلوچ راجی زْرمبشت ( بی این ایم ) ءِ مردمی اگبالانی گل پانک ءَ وتی جون 2024 ءِ مردمی اگبالانی چار ءُ ٹپاسی گزارش شنگ کرتگ کہ آئی ءِ تہ ءَ بلوچستان ءَ زور بیگواھی ءُ در آمیدگسی کوشاں ابید وت کشی ءِ میل ءِ گیش بیگ ءِ سر ءَ ھم بے تاھیری درشان کنگ بیتگ۔
پانک ءِ گزارش ءِ رد ءَ پاکستانی لشکر ءَ چہ بلوچستان ءِ 12 جتا جتائیں ھنکین ءُ چہ سرگودھا پنجاب ءَ 54 مردم دزگیرکنگ ءَ پد زور بیگواہ کرتگ۔ نوید لال نامیں ورنایے پاکستانی لشکر ءِ چیرکاں چہ ھوشاپ ءَ آوار جنگ ءَ پد کشتگ ، آئی ءِ تیرسپتگیں کنٹ چہ پنجگور ءَ دست کپتگ۔ 13 جون 2024 ءَ پاکستانی لشکر ءِ چیردستیں مردم کشیں رمب ءَ ماں پنجگور ءَ ابدل باست ءِ لوگ ءَ ارش کرتگ، آ کشتگ ءُ آئی ءِ لوگبانک زکیہ ٹپی کرتگ۔
پانک ءَ چہ پاکستانی لشکر ءِ دست ءَ آوارجنی ءِ وڑ ءَ دزگیری ءَ پد زور بیگواہ کنگ بیتگیں 54ئیں مردمانی سرجمیں نام ءُ نشان شنگ کرتگ اَنت۔ گزارش ءِ رد ءَ چہ کیچ ءَ 17، چہ آواران ءَ 5، چہ خضدار ءَ 3، چہ ڈیرہ بگٹی ءَ 9، چہ بارکان ءَ 2، چہ سرگودا پنجاب ءَ 2، چہ سیبی ءَ 1، چہ ڈیرہ گازی ھان ءَ 2، چہ چاگے ءَ 1، چہ گوادر ءَ 4، چہ ھاران ءَ 2، چہ مستونگ ءَ 6 کس پاکستانی لشکر ءَ درآمیدگسی دزگیری ءَ پد زور بیگواہ کرتگ۔
پانک ءِ نام گپتگیں گزارش ءِ تہ ءَ ملائی بازار تربت ءِ نندوکیں بیست سالی ئیں اکیل اھمد ءِ وت کشی ءِ ویل ءِ سر ءَ دلگوش دیان گْوشگ بیتگ کہ پاکستانی لشکر ءِ کارروائیانی برپشت ءَ مردمانی رواناں داں جھلانکی ءَ کشانکی ئیں سان زرتگ۔ پانک ءِ گزارش ءِ تہ ءَ روان شناسے ءِ گپ ھم ھوارکنگ بیتگ اَنت کہ آئی ءِ رد ءَ بلوچستان ءَ پاکستانی لشکر ءِ زوراکیانی آسر ءَ مردم جتا جتائیں روانی نادراھیانی آماچ اَنت۔
پانک ءِ گزارش ءِ رد ءَ پاکستانی لشکر ءَ دو برءَ اکیل اھمد زور بیگواہ کرتگ اَت چہ ایشی ءَ آ ناجوڑ ءُ زھنی تک ءَ نادْراہ بیتگ پمیشکا آئی ءَ وت کُشی کرتگ۔ بلوچستان ءَ چہ ایشی ءَ ابید ھم بازیں مردماں چہ پاکستانی لشکر ءِ زوراکی ، آزار دئی ءُ زور بیگواھی ءِ پد ءَ وتکشی کرتگ۔
گزارش ءِ تہ ءَ زوربیگواھیں مردمانی کھولانی زھرشانی ءِ بارہ ءَ ھم گْوشگ بیتگ، سرجمیں بلوچستان ءَ بازیں کھول پہ وتی کسانی درائی ءَ یکشل ءَ زھرشانی کنگ ءَ اَنت۔ بلے پد ءَ ھم زور بیگواھیانی دْرچ برجاہ اِنت ءُ مھترھندی لشکر زور بیگواھانی کھولاں ترس ءُ بیم دیگ ءَ اَنت۔