چہ بلوچ راجی زْرمبشت ( بی این ایم ) ءِ نیمگ ءَ ایمسٹرڈیم نیدرلینڈز ءَ ڈیم اسکوائر ءِ جاہ ءَ زور بیگواھیانی جھانی روچ ءَ زھرشانی کنگ بیتگ ءُ بی این ایم ءِ باسکاں روانک کرتگ۔زھرشانی ءَ بی این ایم ءِ باسکاں مزنیں کچے ءَ بھر زرتگ۔ زھرشانی کنوکاں بلوچستان ءَ زور بیگواھیانی آماچیں مردمانی اکس ءُ نبشتگیں کاگد گون بیتگ کہ آیانی سر ءَ مردمی اگبالانی لپاشگ ءِ بگیری ءَ اوگام نبشتگ اَت۔
زھرشانی ءَ ابدل واھد، مھیم ابدل رھیم ، شاری ولید ، آلیا بکشی ، اسلام مراد ، باست زھیر ، ابدل وھید ، زھرا ءُ ڈاکٹر لتیپ ءَ گْوشتگ کہ اے وھد ءَ بلوچستان ءَ پاکستانی لشکر ءُ چیریں واکاں ھزاراں مردم زور بیگواہ کرتگ چہ ایشاں سیاسی باسک ، نودربر ، ڈاکٹر ، وکیل ءُ دگہ مردماں گون اَنت۔ ھزاراں کسانی ژانگولیں کنٹ دست کپتگ۔
آیاں گْوشتگ بلوچستان ءَ پاکستانی لشکر زور بیگواھیانی پژدر ءَ نہ گْوش اَنت ءُ گیشتریں مردم بھ واتر نہ بیت یا آیانی ٹپ ءُ ٹوریں کنٹ دست کپ اَنت۔ ھمے رد ءَ پاکستانی لشکر ءِ زوراکیانی دْراجیں دْرچے برجاہ اِنت کہ مردمی اگبالانی مزنیں جیڑھے۔ اے دمگ ءِ ھلک ءُ میتگانی مردم مھترھندی زوراکی ، گزرانکی لٹ ءُ پل ءُ ناآمیدی ءِ ڈیسان اَنت۔
’’ بلوچستان ءَ لشکری زوراکی ، در آمیدی کوش ءُ گوں آ دگہ شھریاں در مردمی پیش آیگ ھم روچیگیں کار اَنت۔ جتائیں گلاں باز بر ءَ اے ویلانی پٹ ءُ پول ءُ ڈودارانی بگیری ءَ کارروائی ءِ لوٹ ھم کرتگ ، بلے داں انی ھچ دلجمیں گامگیج زیرگ نہ بیتگ۔‘‘
گڈی ءَ آئی ءَ گْوشتگ کہ میان استمان ءُ مردمی اگبالانی گل بلوچستان ءَ زوربیگواھی ءُ پاکستان ءِ زوراکیانی بگیری ءَ توار چست بہ کن اَنت ءُ آئی ءِ سر ءَ پابندی جنگ بہ بیت۔