مئے گھتریں مردمانی دیمونی مئے مانشت ءُ زند ءِ مانزمان اَنت۔پہ زْرمبشت ءَ دیمونی دیوک مدام زندگ مان اَنت۔انچوش کہ گْوش اَنت اگاں سکرات ءَ زھر مہ وارتیں مرتگ اَت۔ ھمے پیم شھمیراں ھم ھژدری ئیں دیمونیانی پارست ءَ ماں گْوستانک ءَ وت ءَ نمیران کرتگ۔
اے گپ چہ بلوچ راجی زْرمبشت ( بی این ایم ) ءِ نیمگ ءَ ماں برتانیا ءَ بیتگیں شھیدانی مراگش ءَ کنگ بیتگ اَنت۔ مراگش ءَ گْوستانک نبیس ڈاکٹر نسیر دشتی، جھانی سندی کانگریس ءِ سرکارکشاد ڈاکٹر لکو لوھانہ ، بی این ایم ءِ کستریں کمک کارگشاد ھسن دوست ، بی این ایم ءِ دری کارانی کمک راھوتکار ءُ سی سی باسک نیاز زھری، بی این ایم یوکے ءِ کماش منظور بلوچ ، بلوچ استمان گل ( بی آر پی ) یوکے ءِ کماش منسور بلوچ، بلوچ راجی زْرمبشت ( بی آر زیڈ ) ءِ راھشون عبداللہ سیاھو ، بی ایچ آر سی ءِ کارگشاد کمبر مالک ، بی این ایم یوکے ءِ کارگشاد کمبر بکشی ، بی این ایم یوکے ءِ کمک کارگشاد جمیل ءُ بی این ایم ءِ دوزواہ ماہ گنج ءَ تْران کرتگ۔
بی این ایم برتانیا ءِ کمک کماش نسیم اباس ءُ جاسم میار مراگش ءِ جارچین بیتگ اَنت۔
اے دم ءُ درگت ءَ لچہ کاراں وتی لچہ ھم ونتگ اَنت ءُ پہ شھمیراں ستک درشانتگ۔ مسلم دیدگ ، ابدل رسول ، آتپ ، ھپیز ابدللہ ءَ وتی لچھانی پارست ءَ بلوچ شھمیر یات کرتگ اَنت۔
مراگش ءِ میان ءَ ’ لال شھمیر مھراب ھان ‘ ءِ بارہ ءَ دستاویزی تامرے پیش دارگ بیتگ ءُ بھر زیروکاں پہ بلوچ شھمیرانی ستک دْرشانی ءَ شھمیرانی اکسانی سر ءَ پل ریتکگ۔
گْوستانک دیوکاں گْوشتگ بلوچ شھمیرانی گْوستانک چہ لال شھمیر مھراب ھان ءِ شھمیری 13 نومبر 1839 ءَ پیش بندات بیت۔ گْوستانک ءَ بلوچ ءِ بدتریں چک چینی انوشیروان ساسانی ءَ کرت ءُ چہ آئی ءَ پد ھم بازیں واکداراں بلوچ پہ کشتار دات۔بلے چیدگی بستار ءَ 13 نومبر سکا پر ازرشتیں روچے اے مارا مئے شھمیرانی تْرانگ ءَ گیج ایت۔ اگاں آیاں دیمونی مہ داتیں گڑا ما راجے ءِ بستار ءَ زندگ بوت نہ کرت۔آیانی دیمونی مارا اوست دے اَنت ، بلکیں بدتریں چیزے کہ گوں راجے ءَ بیت ، آ راج چیردست بیت ، ایشی ءِ مارا سما ءَ پرین اَنت۔اوست دے اَنت کہ ھو آ روچ کیئت کہ چیردستی ءِ چیپاں موری ءِ دنز بج اَنت۔
آئی ءَ گْوشتگ مئے شھمیرانی دیمونیانی برورد ءَ پاکستانی مھترھند ( ریاست ) ، ایٹمی مھترھند ، لرزگ ءَ اِنت، دْرھگ ءَ اِنت۔ءُ باور بہ کن اِنت کہ آ روچ زیت کئیت کہ اے مھترھند لمب ایت، ایشی ءِ آسر المی اِنت۔
گْوشتانک دیوکاں گْوشتگ مئے چیردستیں سرڈگار ءِ سر ءَ آجوئی ءِ بام آس ایت ءُ بانگواہ سھریں رنگے چہ مئے شھیدانی ھوناں ابید دگہ جاھے نئیت۔کہ پہ ایشی ءَ آیاں وتی ساہ نْدر کرتگ اَنت۔
آیاں گْوشتگ اے دیمونی مئے کوپگانی سر ءَ زمہ واری دے اَنت ، ایشانی چیر ءَ ھزاراں شرتریں جنک ءُ بچانی زمہ واری اِنت کہ آیاں وتی سر داتگ اَنت۔ آیانی ھون تاوان نہ بہ اَنت ءُ مروچی ما اے مسام کن ایں کہ پہ آجوئی ، وشھالی ءُ مانشت ءَ ھمینچک دیمونی پکار بہ بیت ، جھد ءَ برجاہ دار ایں ۔