شال : 11 اگست ءَ چہ انگلستان ءِ زورگری ءَ آجو بیگ ءِ روچ ءِ دم ءُ درگت ءَ بی این ایم مراگش برجم دار ایت اے ھمے سوگند ءِ سرسبزی ءِ روچ اِنت کہ ما وتی آجوئی ءَ پد ءَ گر ایں۔
ھمے بارہ ءَ بی این ایم ءِ جارکش ءَ گْوشتگ 11 اگست 1947 ءَ بلوچستان چہ انگریزانی زورگری ءَ سرجم ءَ آجو بیتگ۔اگاں کہ بلوچستان بھ ھندوستان ءِ بھر نہ بیتگ بلکیں جتائیں راجی مھترھندے اَت۔13 نومبر 1839 ءَ انگریز لشکر ءَ بلوچستان ءِ سر ءَ لشکرکشی کرت، بلوچستان ءِ بادشاہ شھید ھان مھراب ھان شھید کرت ،بلوچستان ءِ وتکواکی پل اِت ءُ چہ ایشی ءَ پد پندل ءُ پندلیں مسامانی پارست ءَ بلوچستان ءِ رودرتکی دمگ دستیگ کرت اَنت ءُ نام ءِ ’برٹش بلوچستان ‘ ءِ بن ھشت ایر کنگ ءَ پد ماں دھلی ءَ انگریز سرکار ءِ واکداری ءَ ھوار ترینت۔
آئی ءَ گْوشت بلوچستان ءِ سیاسی ءُ ٹکی سروکاں بھ انگریزانی واکداری نہ من اتگ بلکیں پہ وتی وتواکی ءِ گرگ ءُ ھندوستان ءِ دو بھر بیگ ءِ جاوراں برٹش بلوچستان ءَ ھوار کنگ بیتگیں وتی گْوستانکی زمینانی پچ گرگ ءَ سپارتی ، سیاسی ءُ راھبندی کوشست کرتگ۔11 اگست ءِ روچ ءَ بلوچستان ءِ بنجاھی شھر کلات ءَ بلوچستان ءِ بندیرا (بیرک) چست کنگ ءُ بلوچستان ءِ آجوئی ءِ جار جنگ بوت۔ھمے روچ ءَ بلوچ راجی مھترھند ءِ باندات ءُ راجی دیمروی ءِ شور ءُ سوڑگ دیم ءَ اتک اَنت کہ آیانی تہ ءَ بلوچستان ءَ نوکیں راجمستریں مھترھندے ءِ جوڑ کنگ ءِ واھگ ءُ ھل سھرا اَت۔
جارکش ءَ گْوشتگ چہ انگریزانی چیردستی ءَ آجو بیگ ءَ پد بلوچستان ءَ گچینکاری بوت کہ آئی ءِ تہ ءَ دیمروی دوستیں بلوچ سیاسی گل ’ راجی گل ، کلات مھترھند‘ (کلات اسٹیٹ نیشنل پارٹی) ءَ چہ درساں گیش گچینَک(ووٹ) گیپت۔بلوچستان ءِ جھلی پارلیمان ءُ برزی پارلیمان ءِ دیم ءَ وھدے گوں پاکستان ءَ ھوار بیگ ءِ جیڑہ ایرکنگ بوت گڑا آ اود ءَ ساڑی ئیں بلوچ راج ءِ گیشترں جھگیراں اے پیشنھاد رد کرت ءُ وتی آجوئی ءُ وتکواکی ءِ سر ءَ زور دات۔ چہ ھمساھگیں ڈیھ ءُ میان استمان ءَ بلوچ راج ءَ اوست داشتگ اَت کہ آ بلوچ ءِ آجوئی ءُ وتواھگی ءِ اگبال ءَ منگہ دئے اَنت بلے انگلستان ءَ پاکستان سکین دات ءُ 27 مارچ 1948 ءَ بلوچستان ءِ گرگ ءَ آئی ءَ سپارتی ءُ لشکری تک ءَ کمک کرت ءُ بلوچستان ءِ ھمساھگیں ڈیھاں گوں پت نہ داری ءَ ناابرمیں مھترھند پاکستان ءِ بے تواری ءَ پلہ مرزی کرت۔
آئی ءَ گْوشت بلوچ راج چہ تھی نزوری ءَ گیش دمگ ءَ ساڑی ئیں نوک آبادی واک ءِ پندل ءُ واھگ ءِ پد ءَ زیردست بیتگ۔زورگراں گوں پاکستان رنگیں مھترھندے ءَ بلوچستان گوں زور ءَ ھوارترینت ءُ مردمگری جھلیں گرے ءَ تیلانک دات۔پاکستان پہ وتی ناراھیں زورگری ءِ برجاہ دارگ ءَ بلوچ راج ءِ سر ءَ زوراکی کنگ ءَ اِنت ءُ اد ءَ پاکستانی مھترھند مردمی اگبالاں گوں ترندی ءَ لپاشک ءَ اِنت۔مروچی اگاں بلوچستان آجو بوتیں گڑا بلوچ راج ءِ زندمان گھتر بیتگ اَت ءُ بلوچستان گھبودی مھترھندے اَت۔
جارکش ءَ گْوشتگ 11 اگست ءَ بی این ایم ءِ درسیں تک ءُ ھنکین پہ ھمے روچ ءِ ارزشت ءِ سھرا کنگ ءَ تھر پہ تھریں مراگش برجم کن اَنت ءُ گوں بلوچ راج ءِ ھمراھی ءَ وتی آجوئی ءِ پدترینگ ءِ مسام ءَ سرسبزین اَنت۔