28 مئی 1998 ءَ پاکستان ءَ ماں بلوچستان ءَ ایٹمی تْراک کرتگ ، اے تْراکانی بگیری ءَ چہ بلوچ راجی زْرمبشت ( بی این ایم ) ءِ نیمگ ءَ جرمنی ءِ شھر گوئٹنگن ءَ روانک ئِے کشگ بیتگ ءُ دمکی کسمانکے ءِ پارست ءَ ایٹمی چکاسانی آسر ءُ تاوان سھرا کنگ بیتگ اَنت ، اے کسمانک ءِ سرگپ اَت ’ ھما روچ کہ کوھاں گریتگ ‘۔
گْوشتانک دیوکاں گْوشتگ پاکستان ءِ ایٹمی چکاس پہ دیمپانی ءَ نہ اَنت بلکیں اے چیردستیں راجے ءِ بگیری ءَ گامگیجے اَت۔چہ ایشی ءَ چاگے ءِ مردم تابکاری ، نادْراھی ءُ در پہ دری ءِ آماچ بیتگ اَنت۔ اے روچ ءَ ابید چہ بلوچستان ءِ مردمانی موکل ءَ چاگے ءِ کھچر ایٹمی ھاکوٹ ( گند جاہ ) اش جوڑ کرت۔
آیاں گْوشت اے چکاسانی پد ءَ داں مروچی چاگے ءِ مردم زھری ئیں گوات ءَ ساہ کشگ ءُ زھری ئیں آپ ورگ ءَ اَنت۔ چاگے ءِ دمگ شیمک ءُ جین ءَ تاوان دیوکیں نادْراھیانی بنجل اِنت۔پاکستان گْوش ایت کہ چاگے ویرانیں دمگے، بلے راستی ایش اِنت کہ آ اود ءَ 2 لک ءُ 69 ھزار مردم جاھمنند اِنت— آیانی لوگ ، ڈگار ءُ واب اَنت۔اے ایٹمی تْراکاں نہ ایوک ءَ کوہ بلکیں زندگی ھم ھیرت ءُ آرت کرت اَنت۔
گْوشتانک دیوکاں درائینگ 28 مئی سیاھیں روچے۔ اے ھما روچ اَت کہ پاکستان ءَ بلوچانی زندگی بے ارزشت لیک اِت ءُ مئے ھستی ءِ تہ ءَ بمب کل کرت — ھمے وھد ءَ کہ مئے راج گوں بے تواری ءَ پلپٹگ ءَ اَت آیاں شادکامی کرت۔
جرمنی ءَ بی این ایم ءِ زھرشانی ءَ گْوشگ بیتگ کہ پاکستان ءَ اے ایٹمی تْراک انچیں دمگے ءَ کرتگ اَنت کہ چہ پیش ءَ نیزگاری ءُ زوراکی ءِ آماچ اِنت۔ ناں پھریزی گامگیج زیرگ بیتگ ، ناں چہ چکاساں پیش دمگ ءِ مردم اش در کرتگ انت ءُ ناں بژن درشانگ بیتگ۔ مروچی چاگے ءِ مردم اے تابکاری میرات ءِ دیمپان اَنت۔
آیاں چہ میان راج ءَ لوٹ اتگ کہ آ ایٹمی چکاسانی وھد ءَ بیتگیں میار گْونگیں نادلگوشی ءُ چہ ایشی ءَ پد تابکاری ءُ اگوازی گسڑی (ماحولیاتی آلودگی)ءِ سر ءَ پٹ ءُ پول ءُ پاکستان ءِ ایٹمی سلحانی بگیری ءَ گامگیج بہ زیر ایت۔
اے مراگش ء بی این ایم جرمنی تک ءِ کماش شرحسن ، کمک کماش صفیہ ، کمک کارگشاد شلی ، بی این ایم ءِ باسک آصف ، فیصل خالد ، اکبر ءُ شلی ذاکر ءَ گپ جتگ۔
