ماہ جبین ءِ زور بیگواھی ، بی وائی سی راھشونانی دزگیری ءُ بلوچستان ءَ مردمی اگبالانی یکشلیں بگیریانی سر ءَ بلوچ راجی زْرمبشت ( بی این ایم ) ءِ عید ءَ روچ ءَ ماں جرمنی ءِ شھر ھینوور ءِ ایرنسٹ آگسٹ چار راہ ءَ زھرشانی کرتگ۔
اے درگت ءَ گْوشتانک دیوکاں بلوچستان ءِ ناگیگیں جاورانی نیمگ ءَ دلگوش پرینتگ ءُ گْوشتگ جھان ءِ دگہ کنڈاں مروچی عید ءِ روچ ءَ شادکامی بیگ ءَ اِنت بلے چیردستیں بلوچستان ءَ عید ءِ روچ ءَ ھم مردم زھرشانی کنگ ءَ اَنت۔
آیاں میان راجی بے تواری ءِ سر ءَ ایراد گپتگ ءُ گْوشتگ بلوچ ءِ چکچینی ءُ مردمی اگبالانی لگتمالی ءِ سر ءَ بے تواری میارزیریں ڈالچاری یے۔راجانی سنت ءُ مردمی اگبالانی تْرامگیج پاکستان ءَ مردمی اگبالانی رد ءَ جست بہ کن اَنت ءُ مردمی اگبالانی لگتمالی ءِ بنیاد ءَ آئی ءِ سر ءَ پابندی جنگ بہ بیت۔
تْرانکاراں درائینتگ پاکستانی مھترھند ءَ چہ دھکاں بلوچ راج ءِ توار ءُ آجوئی پل اتگ ، بلوچ یکجھتی پتر نشانگ کرتگ ءُ پرایمنیں کارکن آوار جنگ ءُ ترسینگ بیگ ءَ اَنت۔ ڈاکٹر ماہ رنگ کہ پرایمنیں گھگیری ءِ چیدگ اِنت ، دمپارا ترسینگ ءُ دزگیر کنگ بیتگ۔
آیاں بی وائی سی ءِ راھشون ڈاکٹر ماہ رنگ ، صبغت اللہ ، بیبو ، بیبگر ءُ گل زادی ءِ بے بنیں دزگیری پرایمنیں جھد ءِ بگیری ءَ مھترھندی زوراکی لیک اتگ ءُ اے دزگیریاں ایر جنان ءَ گْوشتگ دزگیریں بی وائی سی راھشونانی میار ، تیوک ءَ ایش اِنت کہ آ مزدانک لوٹ اَنت۔ اے تیوک ءَ لھتے مردمانی بگیری ءَ کارروائی نہ اِنت بلکیں سرجمیں بلوچ راجی پجار ءِ بگیری ءَ جنگ اِنت — بلوچستان ءَ زور بیگواھی ، کوش ، مڈیانی لٹ ءُ پل ءُ بلوچ ربیدگی میراتانی گمسار کنگ ءِ مھترھندی کار ءُ کرد برجاہ اَنت۔اے تیوک ءَ زوراکی نہ اِنت بلکیں مدان مدان ءَ چکچینی اِنت۔
اے درگت ءَ جرمنی تک ءِ کماش شرحسن ، پیسرگیں کماش اصغر ، نوروز ظفر ، سلمی ، ندیم سلیم ، شیراز ءُ شھرک ءَ گپ جتگ۔
