لیور کوزن — بلوچ راجی زْرمبشت ( بی این ایم ) جرمنی تک ءِ کمک سرکماش صفیہ منظور ءَ ماں جرمنی ءِ شھر لیورکوزن ءَ برجم دارگ بیتگیں 19 می زلان جنینانی مراگاہ ءَ بھر زرتگ ءُ بلوچ جنیانی سر ءَ مھترھندی زوراکی ءُ بلوچستان ءَ مردمی اگبالانی لگتمالی سھرا کرتگ اَنت۔مراگاہ ءَ آئی ءَ وتی گپانی تہ ءَ ڈاکٹر ماہ رنگ ، ماہ جبین ، بیبو ءُ گلزادی ءِ دزگیری ءِ نیمگ ءَ دلگوش پرینتگ ءُ درائینتگ کہ پہ جنینانی بے توار کنگ ءَ پاکستان تْرام اتگیں وڑے ءَ مھترھندی زوراکی ءَ کاربندگ ءَ اِنت۔
سال 2025 ءِ سری شش ماھاں چہ بلوچستان ءَ 306 کس زور بیگواہ ، 205 درآمیدگسی کوش ، پانک ءِ گزارش
صفیہ منظور ءَ ماں مراگاہ ءَ گپ جنان ءَ گْوشتگ ایوک ءَ 2025 ءِ سری ششیں ماھاں بی این ایم ءِ مردمی اگبالانی تْرامگیج پانک ءِ رد ءَ 306 کس زور بیگواہ ءُ 205 مردم در آمیدگسی کشگ بیتگ۔ آئی ءَ گْوشتگ 2011 ءَ بہ گر داں انی 5000 ءَ گیش بلوچ شھرمنند زور بیگواہ کنگ بیتگ ، ایشانی تہ ءَ نودربر ، سیاسی کارکن ءُ جنین ھوار اِنت۔
گوں کرد جنینانی زْرمبشت ءَ یکجھتی ءِ درشان ، گوں یورپی گلانی جھگیراں گندک
صفیہ منظور ءَ اے درگت ءَ بلوچ جنینانی جھد ءُ دیمونیانی بارہ ءَ گپ جتگ ءُ گوں کرد جنیانی زْرمبشت ءُ دگہ زوراکیانی آماچیں راجاں یکجھتی درشانتگ۔
بی این ایم ءِ جھگیر ءَ چہ سرجمیں یورپ ءَ اتکگیں گوں جنیانی جھداں بندوکیں باسکاں گند ءُ نند ھم کرتگ ءُ پہ باندات ءَ ھواریں جھد ءِ راہ ءُ رندانی سر ءَ گپ جتگ۔ بازیں کرد ءُ یورپی گلاں گوں بلوچ جنینانی زْرمبشت ءَ کمک ءُ پلہ مرزی ءِ واھگ درشانتگ۔
صفیہ منظور ءَ کڈن کرتگ کہ میان استمانی تک ءَ پہ بلوچ راجی زْرمبشت ءِ پرکار کنگ ءَ جنینانی توار چد ءُ گیش برز کنگ بہ بیت ءُ یورپ ءَ مردمی اگبال ءُ جنینانی میان راجی پتراں بی این ایم ءِ جھگیرانی مدام ھوار بیگ سکا ارزشتمند اِنت۔ آئی ءَ گْوشتگ بلوچ جنینانی سر ءَ بیوکیں زوراکیانی دستاویز ترام اتگیں وڑے ءَ نچینگ بہ بہ اَنت ءُ یورپی گلانی کمک ءَ جھانی تک ءَ مردم بلوچ ءِ بارہ ءَ سھی کنگ لوٹ اَنت ۔
