بلوچ راجی زْرمبشت ( بی این ایم ) ءِ راھشون ڈاکٹر دین محمد ءِ زور بیگواھی ءِ شانزدہ سال سرجم بیگ ءِ درگت ءَ چہ بی این ایم شھید راشد ھنکین ( آواران ) ءِ نیمگ ءَ نیادے برجم دارگ بیتگ۔ گوں نیاد ءَ تْران کنان تْرانکار اں گْوشتگ زورگریں مھترھند ھما سرپدی ئیں مردماں آوار جنت کہ بلوچ ءِ وتواجھی ءِ لوٹوک ءُ زورگر ءِ زوراکیانی بگیری ءَ توار چست کن اَنت۔
آیاں گوشتگ کہ پاکستانی مھترھند ءَ پہ بلوچ گُلزمین ءِ ایردست کنگ ءُ مڈیانی لٹ ءُ پلءَ ھزاراں بلوچ ورنا ، ڈاکٹر ، استاد، وکیل ءُ دگہ کارپڑانی مردم دزگیری ءَ پد زور بیگواہ کرتگ اَنت۔ چہ ھمایاں یکے ڈاکٹر دین جان اِنت کہ مردم دوست بیگ ءِ پجیگ ءَ بلوچ ءِ توانمندیں توارے۔ڈاکٹر دین جان 28 جون 2009 ءَ چہ ھورناچ ءَ پاکستانی لشکر ءِ کارمنداں دزگیری ءَ پد زور بیگواہ کرتگ ءُ انی شانزدہ سال اِنت کہ آ پاکستان ءِ تھاریں زندان ءَ بندیگ اِنت۔
آیانی گْوشگ اَت بی این ایم ءِ بنجاھی پتر ءِ گْوستگیں باسک ڈاکٹر دین جان ءُ غفور ءَ ھوار ھزاراں بلوچ دژمن ءِ آزار جاھاں بند اِنت ءُ آزارانی دیمپان اِنت۔ ھزاراں بلوچ جھدکار شھمیر کنگ بوتگ بلے آیانی داتگیں دیدانک ءِ دیم ءَ بروک بی این ایم ءِ باسک ءُ بلوچ راج ءِ اوبادگ اَنت۔
آیاں درائینتگ بی این ایم انچائیں سیاسی گلے نہ اِنت بلکیں سیاسی پڑ ءَ پہ بلوچستان ءِ آجوئی ءَ جنگ ءَ اِنت۔ بی این ایم ءِ مگیمی ھرچ باسک ءِ ڈبو اِنت۔ بی این ایم ءِ نزوری ءِ واھگ داروک بلوچ ءِ دوزاہ بیت نہ کنت پرچا کہ پاکستانی لشکر ھمے کار ءَ کنگ ءَ اِنت۔ پہ ھمیشی ءَ واجہ غلام محمد ، لالا منیر ، ڈاکٹر منان جان، رسول بخش ، ماسٹر علی جان ءُ دگہ راھشون شھمیر کنگ بوتگ اَنت ءُ اقبال، ڈاکٹر دین جان، غفور ، حاصل حسرت ءُ رمضان ءِ پجیگ ءَ باز باسک ءُ دوزاواہ زور بیگواہ اَنت۔پاکستانی لشکر پہ بی این ایم ءِ گار ءُ گمساری ءَ باڑا اِنت بلے بی این ایم مروچی ھم ھمے زوراکیانی دیمپان ءُ شریں وڑے ءَ پہ وتی منزل ءَ جنزان اِنت ءُ الم روچے وتی منزل سر بیگ ءَ سوبین بیت۔
اے دیوان ءِ جارچینی ءِ ڈبہ ھانی ءَ گوں بوتگ ءُ دیوان ءَ بی این ایم شھید راشد ( آواران ) ھنکین ءِ سرکماش مھران ، کمک سرکماش تلار ناز ءُ ھنکین ءِ گْوستگیں چارگزار رفیق ءُ ھنکین ءِ کلیتدار میرکءَ تران کرتگ۔
