شمسر ویل ءِ سالروچ ءَ بی این ایم پنجگور ھنکین ءِ مراگش : اے ویل بلوچ زْرمبشت ءِ انچیں درے کہ بھ شموشگ نہ بیت

پنجگور : چہ بلوچ راجی زْرمبشت ( بی این ایم ) پنجگور ھنکین ءِ نیمگ ءَ شمسر ویل ءِ یکمی سالروچ ءَ یاتگاری مراگشے برجم دارگ بیتگ، آئی ءِ تہ ءَ گل ءِ باسک ءُ دوزواھاں بھر زرتگ۔

اے دم ءُ درگت ءَ تْرانکاراں شمسر ویل یات کرتگ ءُ درائینتگ پاکستانی لشکر بلوچ راج ءِ سر ءَ زوراکیانی بیر گوارگ ءَ اِنت۔ ھم روچ مردم زور بیگواہ کنگ ءُ کشگ بیگ ءَ اَنت۔18 جنوری 2024 ءَ پاکستانی لشکر ءِ ارش ءَ ماں شمسر ءَ الی دوست ء مھمود کہ ما آئی ءَ چیئرمین دوستا ءِ نام ءَ زان ایں گوں سرجمیں کھول ءَ شھید بیتگ۔آئی ءِ سئے ماھی چک چراگ، پنچ سالی بابر ، ھپت سالی جنک ھانی ءُ چیئرمین دوستا ءِ لوگ بانک شازیہ پاکستانی لشکر ءِ ارش ءَ شھید بیتگ اَنت۔ھمے ارش ءَ بلوچ جھدکارانی دگہ کھولے ءِ چارکس نجمہ ، ماھکان ، ماہ زیب ءُ پرھاد ھم شھید بیتگ اَنت۔اے ویل بلوچ زْرمبشت ءِ تہ ءَ پاکستانی زوراکی ءُ بلوچ ءِ دیمونیانی شموشگ نہ بیوکیں درے ءِ بستار ءَ نبشتہ بیتگ کہ ما ایشی ءَ بھ نہ شموش ایں۔

بی این ایم ءِ بنجاھی اگدہ داراں گوں بھر زیروکاں تْران کنان ءَ گْوشتگ اے گْوستانک ءِ سری ویل اِنت کہ دشمن ءَ ارش کرتگ ءُ بلوچ راجدوستیں جھدکارے گوں آئی ءِ سرجمیں کھول ءَ کشتگ۔بلوچ پہ وتی آجوئی ءَ وتی کھولاں نْدر کنگ ءَ اَنت بلے چہ وتی جھد ءَ دستکش بیگ ءَ ساڑی نہ اَنت۔

آیاں گْوشتگ چیئرمین دوستا سرجمیں راجی جھدکارے اَت۔ پہ راجی زْرمبشت ءَ درسیں پھناتاں مدام پرکاریں کارستے ، کہ آئی ءَ گوں مڑاہ زند گوازینتگ ءُ گوں مڑاہ ءَ شھمیر بیتگ۔انچیں راجے جھدکارے اَت کہ بی این ایم ءِ باسک اَت بلے آئی ءَ دگہ گلانی باسکانی ھم مدام کمک کرتگ ءُ آیانی میان ءَ پیر ءُ ڈالچاری نہ کرتگ۔

آیاں گْوشتگ راجی شھمیرانی دیمونی پہ ما ھاٹیگ ءُ سکین اَنت۔ما بلوچ راج ءِ درسیں شھمیرانی دیمونیاں مدام یات کن ایں۔مارا اے مسام کنگی ایں کہ ما شھمیرانی سسا ءُ کردانی رندگیری ءَ وتی جھد ءَ برجاہ دار ایں۔دیمونی زْرمبشت ءَ مگیم ءُ آجوئی ءِ منزل نزیک تر کن اَنت۔

آیاں گْوشتگ بلوچ زْرمبشت دْرچے ءِ برورد اِنت۔ اگاں آگا ابدل کریم ءَ پاکستانی زورگری ءِ بگیری ءَ گھگیری بندات مہ کرتیں ، اے سنچ ءُ سما رودم دیگ مہ بوتیں گڑا مروچی مئے گْور ءَ لیکھی میرات ءُ گھگیری ءِ مارشت ھم نزور بیتگ اَت اَنت۔شھمیرانی دیمونی ءُ یکشلیں جھد ءِ برورد ءَ مروچی مئے زْرمبشت اد ءَ سر اِنت۔ بی این ایم بلوچستان ءِ آجوئی ءَ لوٹ ایت ءُ اے گپ گل ءِ راھبند ءُ مسام ءِ انچیں بھرے کہ کس مٹ کرت ئِے نہ کنت۔

اے مراگش ءَ گل ءِ بنجاھی اگدہ دار ءُ بنجاھی پتر ءِ باسکاں گپ جتگ ، مراگش ءِ پاگواجہ بی این ایم پنجگور ھنکین ءِ چار گزار اَت۔ مراگش ءَ لچہ گْوشی ھم بیتگ ءُ آشوبی گشندھاں پہ شھمیرانی ستا ءَ آشوبی سوت ھم گْوشتگ۔