بلوچ راجی زْرمبشت ( بی این ایم ) ءَ ماں برتانیا ءِ پنچ شھراں تْرام اتگیں رنگے ءَ آگاھی دیوکیں کارزار برجم داشتگ ، ایشانی مول بلوچستان ءَ برجاھیں آجوئی ءِ زْرمبشت ، مردمی اگبالانی مزنیں کچے ءَ بگیری ءُ میان استمانی تک ءَ مھترھندی زوراکیانی سھرا کنگ اَت۔اے کارزار ءِ پارست ءَ برتانیا ءِ جاھمنند ءُ میان راج بلوچستان ءَ زور بیگواھی ، سیاسی کارکنانی آزار دیگ ءُ دگہ زوراکیاں بارہ ءَ سھی کنگ بیتگ اَنت۔
اے کارزار 17 اپریل ءَ چہ لندن ءِ نامداریں ٹرافلگر اسکوائر ءَ بندات بوت ، چہ ایشی ءَ پد 19 اپریل ءَ آکسفورڈ سٹی سینٹر ، 21 اپریل ءَ کنگز پریڈ کیمبرج ، 25 اپریل ءَ بچانن اسٹریٹ گلاسگو ءُ گڈی ءَ 27 اپریل ءَ ماں مانچسٹر ءَ گوں مردماں راھوت ءُ بلوچستان ءِ بارہ ءُ گپ ءُ تْران بیتگ۔ بی این ایم ءِ باسکاں اے جاھاں چہ 5000 ءَ گیش پنتاک بھر کرت ءُ راھگوزی مردم بلوچستان ءِ انیگیں جاورانی بارہ ءَ سھی کرت اَنت۔
پہ آگاھی دیگ ءَ بیتگیں کارزار ءِ میان ءَ گچینی بلوچ یکجھتی پتر ( بی وائی سی ) ءِ راھشونانی بگیری ءَ انیگیں مھترھندی بیڑانی سر ءَ گپ جنگ بیتگ۔ بی وائی سی ءِ راھشون ناراھی دزگیر کنگ ءُ بالاد ءُ سسائی آزار دیگ بیتگ اَنت ءُ آیانی سر ءَ دروگیں کیس جنگ بیتگ۔اے کارزار ءِ بنکی بنگپ ھمیش اَت اَنت ، ایشانی پارست ءَ بی این ایم ءَ میان راجی تک ءِ دلگوش پرینگ ءِ کوشست کرت۔
گل ءِ رد ءَ اے آگاھی تالان کنوکیں کارزار ناں ایوک ءَ بلوچستان ءِ مردمانی جیڑھانی نیمگ ءَ دلگوش گْور کنگ اَت بلکیں اے مادنیں کوشستے اَت داں جھانی تک ءَ اے جیڑہ سھرا کنگ بہ بہ اَنت ءُ میان راجی تْرامگیج بلوچستان ءِ جاورانی سر ءَ دلگوش بہ دے اَنت۔
