چہ بلوچ راجی زْرمبشت ( بی این ایم ) ءِ نیمگ ءَ ماں نیدرلینڈز ءِ جتائیں شھراں بلوچستان ءَ برجاھیں مردمی اگبالانی لگتمالی ، زور بیگواھی ءُ مھترھندی زوراکیانی بگیری ءَ زھرشانی ءُ عکسانی نمائش کنگ بیتگ۔اے کارزار ءِ بنکی مول بلوچستان ءَ برجاھیں زوراکی ءُ مردمی جیڑہ ءِ نیمگ ءَ میان راج ءِ دلگوش ءِ پرینگ اَت۔
زھرشانی ءَ مردمی اگبالانی بومی ئیں کارکن ، اھوالکار ءُ دگہ چاگردی مردماں بھرزرت۔ بھر زیروکاں جر نبشت ءُ کاگد گون بیتگ کہ آیانی سر ءَ زور بیگواھی ، در آمیدگسی کوش ءُ زور گریں پاکستانی لشکر ءِ زوراکیانی بگیری ءَ اوگام نبشتگ اَت۔
اے کار زار ءِ رد ءَ 3 مئی ءَ اتریخت سینٹرال ، 10 مئی آرنھم ءُ 11 مئی ماستریخت ءَ پنتاک بھر کنگ بیتگ۔
نمائش ءَ پیش کنگ بیتگیں عکسانی تہ ءَ بلوچستان ءِ ھلک ءُ دمگاں برجاھیں مردمی اگبالانی بگیری ، زور بیگواھیں مردمانی کھول ءُ زمینی راستیانی چھر ءُ شبین پدر کنگ بیتگ اَنت۔ اے عکسانی مول بلوچ راجی گْوستانک ، مڈیانی لٹ ءُ پل ءُ بلوچستان ءِ زمینی ارزشت ءِ سھرا کنگ اَت۔
چہ زھرشانیاں بلوچ راجی زْرمبشت ( بی این ایم ) نیدرلینڈز تک ءِ کماش مھیم عبدالرحیم ، واحد ، ڈاکٹر لطیف ، باسط ظہیر ءُ براھگ ءَ گپ جتگ۔ آیاں درائینتگ کہ اے زھرشانی چیدگی زھرشانی یے، چہ ایشی ءِ پارست ءَ ما جھانی گیھار ءَ ٹوھینگ لوٹ ایں۔ گْوستگیں ماھے ءِ تہ ءَ پاکستانی لشکراں چہ چل ءَ گیش زور بیگواھیں مردم کشتگ ءُ سداں آوار جنگ ءَ پد زور بیگواہ کنگ بیتگ۔
آیاں گْوشتگ دومی نیمگ ءَ بلوچ یکجھتی پتر ءِ راھشون ڈاکٹر ماہ رنگ ، بیبو ، گل زادی ، شاہ جی ءُ بیبگر ماں ھدہ زندان ءَ آزار دیگ بیگ ءَ اَنت۔ ما چہ راجانی سنت ءُ میان راجی مردمی اگبالانی گلاں دزبندی کن ایں کہ آ بلوچستان ءَ بیوکیں زوراکیانی سر ءَ زیت دلگوش بہ کن اَنت۔
مراگش ءِ گڈسر ءَ چہ میان راج ءَ لوٹ کنگ بیتگ کہ آ ماں بلوچستان ءَ مردمی اگبالانی سرسبزی ، زور بیگواھیانی آسر کنگ ءُ پہ سانمند بیتگیں کھولانی دادرسی ءَ زیت ءُ سانمندیں گامگیج بہ زیر اَنت۔
