چہ بلوچ راجی زْرمبشت ( بی این ایم ) ءِ نیمگ ءَ بلوچ آجوئی ءِ زْرمبشت ءِ بارہ ءَ مردماں سرپدی دیگ ءُ پاکستانی مھترھند ( ریاست ) ءِ دست ءَ مردمی اگبالانی لگتمالی ءِ سھرا کنگ ءَ برتانیا ءِ گْوستانکی شھر کیمبرج ءَ کمپئن کنگ بیتگ۔
بی این ایم ءِ باسکاں پہ وتی من ءُ مولانی بارہ ءَ مردمانی پلہ مرزی ءِ زیرگ ءَ گوں نودربر، شھرمنند ءُ ھندی واکداراں گپ جتگ۔ آیاں چہ میان استمانی تک ءِ مردماں لوٹ کرتگ کہ آ بلوچ راج ءِ سر ءَ بیوکیں ناروایانی نیمگ ءَ دلگوش بہ دے اَنت۔
لندن، لیڈز ، نیوکیسل ءُ مانچسٹر رنگیں مزنیں شھراں گْوستگیں کمپئنانی سوبمندی ءَ پد بی این ایم ءَ کمیبرج ءَ ھم کمپئن کرتگ داں میان استمانی تک ءَ بلوچ راج ءِ توار چست کنگ بہ بیت۔
کمپئن ءِ بارہ ءَ گپ جنان ، بی این ایم ءِ جھگیراں چہ پاکستانی مھترھند ءِ دست ءَ بلوچ راج ءِ بگیری ءَ مردمی اگبالانی لگتمالی ءِ گر ءُ دار ءِ ھژدری ئیں لوٹ ءِ سر ءَ دلگوش پرینتگ۔
آیاں گْوشتگ بلوچ راج ءِ اگبال ءُ آجوئی ءِ گپ جنگ ءَ میان استمانی ھم سنتی ءُ پلہ مرزی المی اِنت۔