چہ برتانیا ءِ شھرمنندانی سنگاں یکجاہ بیوکیں زر پہ بلوچ ءِ چکچینی ءَ کارمرد بیگ ءَ اَنت۔اے گپ چہ بلوچ راجی زْرمبشت ( بی این ایم ) ءِ نیمگ ءَ برجاہ دارگ بیتگیں آگاھی کمپئنے ءِ رد ءَ برمنگھم ءَ برتانیا ءِ شھرمننداں گْوشگ بیتگ۔
بی این ایم ءِ آگاھی کمپئن ءِ میان ءَ گوں شھرمننداں یک پہ یک گپ جنگ بیتگ۔شھرمنند ءُ پہ تر ءُ تاب ءَ اتکگیں مردماں پنتاک دیگ بیتگ کہ آیانی تہ ءَ بلوچ راجی زْرمبشت ءُ بلوچستان ءِ جاورانی بارہ ءَ سرپدی نبشتہ اَت۔
چہ بی این ایم ءِ نیمگ ءَ برتانیا ءِ شھرمننداں گْوشگ بیتگ کہ آ سھی بہ بہ اَنت کہ چہ آیانی سنگاں یکجاہ بیوکیں زراں برتانیا ءِ سرکار پاکستان ءَ کمک کنگ ءَ اِنت کہ آ ھار آماچیں مردم ، وازمندگی کمک ءُ دگہ شریں کاراں کارمرد بیگ ءِ جاہ ءَ بلوچ راج ءِ چکچینی ءَ کارمرد بیگ ءَ اَنت۔
آیاں گوں شھرمننداں گْوشتگ کہ آ وتی سرکار ءُ پارلیمانی جھگیرانی دیم ءَ اے جست ءَ ایر بہ کن اَنت ءُ اے گپ ءَ الم بہ کنائین اَنت کہ آیانی داتگیں سنگانی زر مردمگری ءِ بگیری ءَ کارمرد مہ بہ اَنت۔
بی این ایم ءِ باسکاں شھرمنند ءُ تر ءُ تاب ءَ اتکگیں مردم بلوچستان ءِ بارہ ءَ گْوشتگ اَنت کہ آ اود ءَ پاکستانی لشکر مردمی اگبالانی بدتریں بگیری کنگ ءَ اِنت۔پاکستان ءَ بلوچستان زور گرگ ءَ پد بلوچ راج آجوئی ءِ پجیگ ءَ چہ بنکی مردمی اگبالاں ھم زبھر کرتگ۔
آیاں گْوشتگ بلوچستان ءِ تیاب، مڈی ءُ زمین ءِ سر ءَ بلوچ ءِ واکداری پچ گرگ ءُ گوں ’چین ‘ ءِ ھمدستی ءَ اے مڈی بلوچ راج ءِ جاہ ءَ پہ پاکستانی مھترھند ءُ چین ءِ سیتاں کارمرد بیگ ءَ اَنت۔بلوچ راج ءِ گزرانکی ءُ چاگردی دیمروئی ءِ تک ءَ سرمایہ کاری بیگ ءَ نہ اِنت بلکیں بلوچ راج چہ آئی ءِ ابرمی گزرانکی پارستاں ھم زبھر کنگ بیتگ۔چینی ٹرالراں ماھی گرگ ءِ موکلی دیگ بیتگ کہ آیاں زری ساھدارانی توم چینی کرتگ ءُ زر سنٹ کرتگ ، مید سکا وامدار ، شد ءُ بے روزگاری ءِ آماچ اَنت۔
آیاں گْوشتگ چہ بلوچ راج ءَ آجوئی ءِ پچ گرگ ءَ پد آ چہ جاندْراھی ءُ وانگ رنگیں بنیادی آسراتیاں ھم زبھر کنگ بیتگ اَنت۔بلوچستان ءَ ھما دیمروئی ءِ کہ گپ بیگ ءَ اِنت راستی آئی ءِ چپگان اِنت۔ گوادر کہ سی پیک شوربندی ءِ دل گْوشگ بیتگ ، آ اود ءَ مردمانی کسانیں نادْراھیانی ھم درمان نہ بیت۔بلوچستان ءَ ڈک ڈک ءَ گروکیں نادْراھیانی گر ءُ دار نہ بیگ ءِ پد ءَ مرک ءُ میر ءِ کچ گیش بیتگ۔پرشتگیں دگانی پد ءَ سالے سداں مردم بیران بیت ءُ بلوچستان ءِ نودربر پہ وانگ ءَ دیریں ھند ءُ ھلکانی روگ ءَ لاچار اَنت۔وھدے کہ پاکستان چہ جتائیں پارستاں رس اتگیں کمکاں ھم بلوچ راج ءِ گھبود ءِ جاہ ءَ بلوچ راج ءِ بگیری ءَ کارمرد کنت۔
چہ بی این ایم ءِ نیمگ ءَ برتانیا ءِ شھرمنند ءُ میان استمان ءَ گْوشگ بیتگ کہ چہ آیانی کمک ءُ دلگوش ءَ بلوچستان ءِ مردمی اگبالانی جاور گھتر بوت کنت۔
اے ’ بلوچ زْرمبشت ءِ راستی‘ ءِ بنگپ ءَ برجاھیں بی این ایم برتانیا تک ءِ آگاھی کمپئن ءِ گڈی مراگش اَت کہ گوں سوبمندی ءَ ماں برمنگھم ءَ آسر بیتگ۔گڈی کمپئن اسٹاپ پورڈ شائر بنزہ ءِ چیردستی ءَ ھلائینگ بیتگ۔نام گپتگیں مھیم ءِ بنداتی ، دومی ءُ سیمی پدانک برتانیا ءِ شھر لندن، نیوکاسل ، کیمبرج ءُ مانچسٹر ءَ بیتگ اَنت۔