چہ بلوچ راجی زْرمبشت ( بی این ایم ) ءِ نیمگ ءَ ماں نیدرلینڈز ءُ امریکا ءَ بلوچستان ءِ گْوستانک ءُ آجوئی ءِ بارہ ءَ پنتاک بھر کنگ بیتگ۔نیدرلینڈز ءِ مزنیں شھر ایمسٹرڈیم، دی ھیگ ، روٹرڈیم، ایندھون ءُ دگراں پنتاک بھر کنگ بیتگ۔
اے تکشام ءِ من میان استمانی تک ءَ یازدہ اگست ءِ گْوستانک ءِ سھرا کنگ اَت ، ھمے روچ ءَ بلوچستان ءَ چہ برتانیا ءَ آجوئی رس اِت ، بلوچستان سرکار ءَ مھترھند ءِ آجوئیں بستار ءِ جار جت ءُ وتی راجی مھترھند ءِ کیام (وڑ ءُ ڈول کہ چوں بہ بیت) پیش کرت۔
پنتاک ءَ گْوشگ بیتگ کہ 11 اگست 1947 ءَ انگریزاں چہ مزن پھناتیں ھندوستان ءَ در کپگ ءَ پد اے من اتگ کہ بلوچستان آجوئیں مھترھندے۔ بلے 27 مارچ 1948 ءَ پاکستان ءَ بلوچستان زور گپت۔ مارچ 1948 ءَ بہ گر داں مروچی پاکستانی زورگری ءِ بگیری ءَ بلوچ ءَ گھگیری کرتگ۔ زورگری ءِ روچ ءَ بہ گر داں مروچی پاکستان بلوچاں کشگ ءَ اِنت۔ بلوچانی سر ءَ برجاھیں زوراکیانی تہ ءَ زور بیگواھی ، درآمیدگسی کوش ، جنین ءُ چکاں آزار دیگ ، لٹ ءُ پل ھوار اَنت وھدے کہ ھزاراں مردمانی ژانگولیں کنٹ چگل دیگ بیتگ۔
اے وھد ءَ بلوچستان ءَ بدتریں مھترھندی زوراکی ءُ مردمی اگبالانی مزنیں بگیری برجاہ اَنت چہ اے زوراکیاں بلوچ راج ءِ زندمان شزار اِنت۔
پنتاک ءَ دزبندی کنگ بیتگ کہ آجوئیں جھان ءِ شھرمنند ماں بلوچستان ءَ پاکستانی قبضہ ءُ بلوچ چکچینی ءِ بگیری ءَ توار چست بہ کن اِنت۔ چہ اے جھد ءَ ناں ایوک ءَ بلوچستان ءِ مردماں دلبڈی رس ایت بلکیں اے پہ میان استمانی تک ءَ مزدانک ءُ مردمی اگبالانی پھریزگ ءَ ھم شریں کرد ءُ کارے بیت ءُ جھان ءَ اے گپ ءَ سھی بہ کن اَنت کہ بلوچستان ءَ چی بیگ ءَ اِنت۔